ព័ត៌មានជាតិ

អូស្ត្រាលីបន្តគាំទ្រកម្ពុជាក្នុងភាពជាដៃគូរសម្រាប់ការត្រៀមចាកចេញឆ្ពោះទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០

បានផុស

២ ខែ មុន

នៅ

ថ្ងៃសុក្រ ៦ ធ្នូ ២០២៤

ដោយ

ស្របពេលដែលកម្ពុជាបានដាក់ផែនការ ដើម្បីសម្រេចបាននូវបង្គោលចរ (Milestone) ដើម្បីប្រែក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងឆ្ពោះទៅសម្រេចបាននូវ ចក្ខុវិស័យកម្ពុជាឆ្នាំ២០៥០ ប្រែក្លាយជាប្រទេសមានចំណូលខ្ពស់ លោក Derek Yip ឯកអគ្គរដ្ឋទូតអូស្ត្រាលីប្រចាំកម្ពុជាបានប្តេជ្ញាក្នុងការធ្វើការភាពជាដៃគូរសម្រាប់ដំណើរចាកចេញនេះប្រកបដោយបរិយាប័ន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Derek Yip បានលើកឡើងបែបនេះក្នុងជំនួបជាមួយលោក កាលពីថ្ងៃទី៥ ខែធ្នូ ជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) នៅទីស្តីការក្រសួងដោយបានពិភាក្សាអំពីការពង្រឹងកិច្ចសហប្រតិបត្តិការលើវិស័យជាច្រើន រួមមានវិស័យទឹកស្អាត ឧស្សាហកម្ម សហគ្រាសធុនតូចនិងមធ្យម សេដ្ឋកិច្ចក្រៅប្រព័ន្ធ ផលិតភាព និងហេដ្ឋារចនាសម្ព័ន្ធគុណភាពជាតិ។

លោកទូត បានបញ្ជាក់ការប្តេជ្ញាចិត្តរបស់អូស្ត្រាលីចំពោះការអភិវឌ្ឍនៅកម្ពុជា ជាពិសេសសម្រាប់ការត្រៀមចាកចេញពីក្រុមប្រទេសអភិវឌ្ឍន៍តិចតួចនៅឆ្នាំ២០២៩។ លោកក៏បានលើកឡើងអំពីវិស័យអាទិភាពរបស់រដ្ឋាភិបាលអូស្ត្រាលី ដែលរួមមានការអភិវឌ្ឍមូលធនមនុស្ស បរិវត្តន៍កម្មថាមពលស្អាត ការពង្រីកលទ្ធភាពចូលទៅកាន់ទីផ្សារ និងការអភិវឌ្ឍហេដ្ឋារចនាសម្ព័ន្ធនិងសេដ្ឋកិច្ច។

លោករដ្ឋមន្រ្តី ហែម វណ្ណឌី បានថ្លែងអំណរគុណដល់អូស្ត្រាលីដែលជាមិត្តដ៏ល្អរបស់កម្ពុជា និងបានស្នើឱ្យអូស្ត្រាលីផ្តល់ជំនួយបច្ចេកទេស ដើម្បីជួយឱ្យផលិតផលកម្ពុជាអនុលោមតាមស្តង់ដារ។ លោកថា៖ «ស្តង់ដារមានសារៈសំខាន់ណាស់សម្រាប់ឱ្យផលិតផលកម្ពុជាអាចចូលទៅទីផ្សារប្រទេសអូស្ត្រាលី និងទីផ្សារអន្តរជាតិ»។

លោករដ្ឋមន្ត្រីក៏បានស្នើឱ្យអូស្ត្រាលីបង្កើនការវិនិយោគរបស់ខ្លួននៅកម្ពុជា ពិសេសពង្រីកប្រតិបត្តិការអាជីវកម្មនៃក្រុមហ៊ុនអូស្ត្រាលីដែលកំពុងប្រតិបត្តិការស្រាប់នៅក្នុងតំបន់។ លើសពីនោះទៅទៀតលោកបានបានលើកឡើងពីភាពចាំបាច់នៃការលើកកម្ពស់ការផលិតក្នុងស្រុក ពិសេសការផលិតវត្ថុធាតុដើម និងផលិតផលពាក់កណ្តាលសម្រេច ដើម្បីបំពេញលក្ខខណ្ឌតម្រូវកាន់តែខ្ពស់នៃការប្រើប្រាស់វត្ថុធាតុដើមក្នុងស្រុក។

លោក ហែម វណ្ណឌីបានបន្ថែមថា៖ «យើងពិតជាវាយតម្លៃខុ្ពស់ចំពោះការគាំទ្ររបស់អូស្ត្រាលីលើការអភិវឌ្ឍរបស់កម្ពុជា ហើយយើងលើកទឹកចិត្តឱ្យអ្នកវិនិយោគអូស្ត្រាលីនៅក្នុងតំបន់ ពង្រីកមូលដ្ឋានអាជីវកម្មរបស់ខ្លួនមកកម្ពុជា ពិសេសនៅក្នុងតំបន់ឧស្សាហកម្មសម្រាប់វិស័យជាក់លាក់»។

កាលពីខែមិថុនាក្នុងពិធីប្រគល់សញ្ញាបត្រជូនដល់និស្សិត នៃសាកលវិទ្យាល័យ លីមកុងវីងលោកនាយករដ្ឋមន្រ្តី សម្តេចធិបតី ហ៊ុន ម៉ាណែត បានបញ្ជាក់ជំហរជាថ្មីថា កម្ពុជាបានត្រៀមខ្លួនជាស្រេចដើម្បីចាកចេញពីប្រទេសដែលមានការអភិវឌ្ឍន៍តិចតួច (LDC) ហើយក្លាយជាប្រទេសអ្នកមាននៅឆ្នាំ ២០៥០ តាមរយៈការពង្រឹងធនធានមនុស្ស និងពង្រឹងឯករាជ្យភាពយរបស់ខ្លួនក្នុងការកសាងប្រទេស។

សម្តេចធិបតី ហ៊ុន ម៉ាណែត បានថ្លែងថា កម្ពុជាកំពុងតែនៅលើផ្លូវដើរចេញពីប្រទេសដែលមានការអភិវឌ្ឍន៍តិចតួច ទោះបីជួបបញ្ហាប្រឈមច្រើនក៏ដោយ។ បញ្ហាប្រឈមដែលសំដៅនោះ គឺនៅពេលដែលរួចផុតពីប្រទេសមានការអភិវឌ្ឍន៍តិចតួច កម្ពុជានឹងបាត់បង់ការលើកទឹកចិត្តផ្នែកពន្ធ ឬប្រយោជន៍ផ្សេងៗពីអន្តរជាតិ ។

លោកស្រី ចម និម្មល រដ្ឋមន្រ្តីក្រសួងពាណិជ្ជកម្មថ្លែងនៅក្នុងកម្មវិធី «ខួប ២០ ឆ្នាំនៃកម្ពុជាចូលជាសមាជិកអង្គការពាណិជ្ជកម្មពិភពលោក” កាលពីថ្ងៃ ១៤ តុលាថា តាមរយៈកំណើនសេដ្ឋកិច្ចប្រកបដោយភាពធន់ក្នុងរយៈពេលជាង ៣០ ឆ្នាំ ថ្មីៗនេះគណៈកម្មាធិការគោលនយោបាយអភិវឌ្ឍន៍របស់អង្គការសហប្រជាជាតិ បានផ្ដល់អនុសាសន៍ឱ្យប្រទេសកម្ពុជា ចាកចេញពីចំណាត់ថ្នាក់ប្រទេសអភិវឌ្ឍន៍តិចតួចនៅឆ្នាំ២០២៩។

ការចាកចេញពីឋានៈជាប្រទេសអភិវឌ្ឍន៍តិចតួចរបស់កម្ពុជានៅក្នុងឆ្នាំ ២០២៩ បើតាមលោកស្រីក៏ធ្វើឲ្យកម្ពុជាប្រឈមផលប៉ះពាល់ ដូចជាការបាត់បង់ភាពអនុគ្រោះពន្ធគយ និងវិធានដើមកំណើតទំនិញកាន់តែរឹតត្បិតជាងមុន ដែលនឹងបង្កផលប៉ះពាល់ដល់ភាពប្រកួតប្រជែងរបស់កម្ពុជាក្នុងទីផ្សារសំខាន់ៗ ។

លោកស្រីថា កម្ពុជាចាំបាច់ត្រូវប្រែក្លាយបញ្ហាប្រឈមទាំងនេះ ជាកាលានុវត្តភាពក្នុងការពង្រឹងនិងជំរុញបន្ថែមនូវសមត្ថភាពប្រកួតប្រជែង ការចូលរួមក្នុងច្រវាក់ផ្គត់ផ្គង់តំបន់និងច្រវាក់តម្លៃសកល តាមរយៈការធ្វើពិពិធកម្មទីផ្សារ និងបង្កើនភាពប្រកួតប្រជែង ការពង្រីកមូលដ្ឋានផលិតកម្ម ការបង្កើនតម្លៃបន្ថែម ការតភ្ជាប់ខ្សែច្រវាក់តម្លៃនិងផ្គត់ផ្គង់សកល ពង្រឹងកិច្ចសម្រួលពាណិជ្ជកម្ម ព្រមទាំងបង្កើនការទាក់ទាញវិនិយោគក្នុងឧស្សាហកម្មថ្មីៗដែលជាមូលដ្ឋាននៃការគាំទ្រកំណើនប្រកបដោយចីរភាពនិងភាពធន់៕