សេដ្ឋកិច្ច

កម្ពុជាមានបំណុលសាធារណៈជាង ១១,៧៨ ប៊ីលានដុល្លារ

បានផុស

១ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

កម្ពុជាមានបំណុលសាធារណៈសរុបចំនួន ១១,៧៨ ប៊ីលានដុល្លារ គិតត្រឹមត្រីមាសទី៣ ឆ្នាំ ២០២៤ ដោយគិតទាំងបំណុលមរតក និងបានទូទាត់សងបំណុលជាង ៤៥៦ លានដុល្លារ ខណៈអ្នកវិភាគសេដ្ឋកិច្ចបានលើកឡើងថា កម្ចីទាំងនេះត្រូវបានរដ្ឋាភិបាលយកមកប្រើប្រាស់ក្នុងការសាងសង់ហេដ្ឋារចនាសម្ព័ន្ធចាំបាច់នានាដើម្បីជំរុញសកម្មភាពសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ក្រសួងសេដ្ឋកិច្ច ចេញផ្សាយនៅថ្ងៃទី ០៥ ខែធ្នូ ឆ្នាំ ២០២៤ បង្ហាញថា ត្រឹមដំណាច់ត្រីមាសទី៣ ឆ្នាំ ២០២៤ កម្ពុជាមានសន្និធីបំណុលសាធារណៈសរុបចំនួន ១១,៧៨ ប៊ីលានដុល្លារ ក្នុងនោះ ៩៩% ត្រូវនឹងប្រមាណ ១១,៦៧ ប៊ីលានដុល្លារ ជាបំណុលសាធារណៈ ក្រៅប្រទេស និង ១% ស្មើនឹង ១១៥ លានដុល្លារ ជាបំណុលសាធារណៈក្នុងប្រទេស។

សមាសភាគបំណុលសាធារណៈទាំងនេះ រួមមាន ៤៥% ជា ដុល្លារអាម៉េរិក, ១៩% ជាអេសដេអ៊ែ, ១២% ជាយ័នជប៉ុន, ១១% ជាយ័នចិន, ៨% ជាអឺរ៉ូ, និង ៥% ទៀត ជារូបិយ វត្ថុជាតិនិងរូបិយប័ណ្ណផ្សេងៗ។

លោកឧបនាយករដ្ឋមន្ត្រី អូន ព័ន្ធមុនីរ័ត្ន បានលើកឡើងនៅក្នុងរបាយការណ៍ថា បំណុលសាធារណៈ របស់កម្ពុជា នៅតែត្រូវបានស្ថិតក្នុងភាពអាចគ្រប់គ្រងបានស្ថិតក្នុងហានិភ័យកម្រិតទាប។

ការរក្សាបាននូវចីរភាពបំណុលសាធារណៈ អាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈដ៏រឹងមាំ ជាពិសេសគោលការណ៍គន្លឹះទាំង ៥ សំដៅបន្តពង្រឹងប្រសិទ្ធភាពខ្ពស់រួមមាន៖ ខ្ចីឥណទានក្នុងទំហំសមស្របដែលស្ថានភាពថវិកា និងសេដ្ឋកិច្ចអាចទ្រាំទ្របាន, ខ្ចីតែឥណទានដែលមានកម្រិតសម្បទាន ឬលក្ខខណ្ឌអនុគ្រោះ, ខ្ចីសម្រាប់តែវិស័យអាទិភាព ទ្រទ្រង់ជីវភាព នៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាពផលិតកម្ម និងការប្រើប្រាស់ឥណទាន ប្រកបដោយតម្លាភាព គណនេយ្យភាព ប្រសិទ្ធភាព និងប្រើប្រាស់ឥណទានសម្រាប់ហិរញ្ញប្បទានគម្រោងវិនិយោគលើហេដ្ឋារចនាសម្ព័ន្ធសាធារណៈ ដែលត្រូវមានស្ដង់ដា និងគុណភាពខ្ពស់។

សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់កម្ពុជាថ្មីកាលពីពេលថ្មីៗនេះថា សម្រាប់ប្រាក់កម្ចីនេះ រាជរដ្ឋាភិបាលត្រូវខិតខំរៀបចំយុទ្ធសាស្រ្តថ្មីៗបន្ថែមទៀតដើម្បីទាក់ទាញឱ្យផ្នែកឯកជនទាំងក្នុងស្រុក និងក្រៅស្រុកឱ្យមកវិនិយោគផ្ទាល់នៅកម្ពុជាឱ្យបានកាន់តែច្រើន ពិសេសនៅក្នុងការកសាងហេដ្ឋារចនាសម្ព័ន្ធតាមរយៈរូបមន្តសាងសង់ ប្រើប្រាស់ និងផ្ទេរ(BOT)។

លោកបាននិយាយថា៖«ដោយសារកម្ពុជាជាប្រទេសកំពុងអភិវឌ្ឍន៍ ដូច្នេះតម្រូវការថវិកាសម្រាប់យកទៅវិនិយោគសាធារណៈផ្សេងៗពិតជាមានច្រើន ដូចជា ការកសាងហេដ្ឋារចនាសម្ព័ន្ធ ធនធានមនុស្ស ដើម្បីអាចបង្កើតការងារ ជាដើម។ ប្រសិនបើរាជរដ្ឋាភិបាលអាចទាក់ទាញឱ្យផ្នែកឯកជនចូលមកវិនិយោគតាមរូបមន្ត BOT កាន់តែច្រើន គឺកាន់តែល្អ»។

លោកបានលើកឡើងទៀតថា កម្ពុជាត្រូវតែខិតខំបន្ថែមទៀតក្នុងការបង្កើននូវសក្តានុពលរបស់ខ្លួនក្នុងការទាក់ទាញភ្ញៀវទេសចរ និងវិនិយោគិនបរទេសឱ្យចូលមកកម្ពុជាបានកាន់តែច្រើនបន្ថែមទៀតដើម្បីបង្កើនចំណូលចូលជាតិ។

លើសពីនេះ នៅក្នុងត្រីមាសទី១ ឆ្នាំ២០២៤ រាជរដ្ឋាភិបាលបាន ទូទាត់សេវាបំណុលសរុបចំនួន ១៨១,៥៥ លានដុល្លារអាមេរិក រួមមាន ក្របខ័ណ្ឌបំណុលសាធារណៈ ក្រៅប្រទេសមាន ចំនួនប្រមាណ ១៨១ លានដុល្លារអាមេរិក ក្នុងនោះ ប្រាក់ ដើម ១៤២,៤០ លានដុល្លារអាមេរិក និង ការប្រាក់និងកម្រៃ ផ្សេងៗ ៣៨,៦០ លានដុល្លារអាមេរិក និង ក្របខ័ណ្ឌ បំណុលសាធារណៈក្នុងប្រទេស មានចំនួនប្រមាណ ៤៥៥ លាន ដុល្លារអាមេរិក។ ដោយឡែក, បើធៀបនឹងរយៈពេលដូចគ្នាកាលពី ឆ្នាំទៅ ការទូទាត់សេវាបំណុលក្នុងត្រីមាសទី១ ឆ្នាំ២០២៤ នេះ មានកំណើនប្រមាណ ០,៥%៕