រដ្ឋចាប់ដៃជាមួយវិស័យឯកជន ដាក់ឱ្យប្រើប្រាស់កម្មវិធីឆែកប្លង់បញ្ចាំរបស់អតិថិជន

ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ១២ ខែធ្នូ ឆ្នាំ ២០២៤ បានចាប់​ដៃជា​មួយ​ក្រុមហ៊ុន ក្រេឌីត ប្យួរ៉ូ (ខេមបូឌា) ដាក់ឱ្យប្រើប្រាស់សេវាថ្មីរបស់ CBC ដែលសេវានេះអនុ​ញាត​ឲ្យគ្រឹះស្ថានហិរញ្ញវត្ថុ អាចឆែកព័ត៌មានពាក់ព័ន្ធ និងបណ្ណកម្មសិទ្ធិដែលអតិថិជនដាក់បញ្ចាំ តាមប្រព័ន្ធ CBC ដែលនឹងជួយសម្រួល និងកាត់បន្ថយចំណាយលើការ​វិភាគរបស់គ្រឹះស្ថាន​លើការឲ្យខ្ចី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្តល់សេវាផ្ទៀងផ្ទាត់អចលនទ្រព្យ ដោយសហការជាមួយក្រសួងរៀបចំដែនដី នគរូបនីយកម្ម និងសំណង់ នឹងអនុញ្ញាតឱ្យគ្រឹះស្ថានធនាគារនិងហិរញ្ញវត្ថុទាញយករបាយការណ៍អចលនទ្រព្យ សម្រាប់ជាមូលដ្ឋានមួយក្នុងការវិភាគនិង វាយតម្លៃមុនពេលសម្រេចផ្តល់​ឥណទានដល់​រូបវ័ន្ត​បុគ្គល និងនីតិបុគ្គល។

គ្រឹះស្ថានធនាគារ និងហិរញ្ញវត្ថុដែលមានបំណងស្វែងរកព័ត៌មានអចលនទ្រព្យ អាចទទួល​បានរបាយការណ៍បញ្ជាក់ភ្លាមៗ ពីស្ថានភាពអចលនទ្រព្យ អំពីម្ចាស់កម្មសិទ្ធិ ប្រវត្តិជួល​អចលនទ្រព្យ និងប្រវត្តិជាប់បន្ទុក តាមប្រព័ន្ធអនឡាញ ដោយមិនចាំបាច់ទៅឆែក ឬផ្ទៀង​ផ្ទាត់ព័ត៌មានអចលនទ្រព្យនៅមន្ទីរ ឬក្រសួងដោយផ្ទាល់ឡើយ។

លោក ច្រឹក សុខនីម អគ្គនាយកក្រុមហ៊ុន Century21 Mekong យល់ឃើញថា ការបើកច្រករបស់ក្រសួងរៀបចំដែនដី នគររូបនីយកម្ម និងសំណង់ គឺជាចំណុចវិជ្ជមានដែលផ្ដល់ភាពងាយស្រួលទៅដល់ភ្នាក់ងារប្រកបរបរវិជ្ជាជីវៈក្នុងការវាយតម្លៃ។

លោក ច្រឹក សុខនីម៖«ទី១ ចំណេញពេលវេលាសម្រាប់ភ្នាក់ងារស្របច្បាប់ អាចចូលយកទិន្នន័យ​​របស់ក្រសួងក្នុងការឆែកមើលពាក់ព័ន្ធនឹងប្រវត្តិដី និងផ្ទះ ពីមុនមក ទី២ យើងមានប្រភពព័ត៌មានច្បាស់លាស់ដែលអាចជឿជាក់បានសម្រាប់ការផ្ដល់ព័ត៌មានទៅអតិថិជន ទី៣ យើងអាចមានទំនាក់ទំនងគ្នាជាមួយគ្រឹះស្ថាន ដែលផ្ដល់ព័ត៌មានលក្ខណៈសាធារណៈជូនភ្នាក់ងារប្រកបវិជ្ជាជីវៈទៅថ្ងៃអនាគត៕