ព័ត៌មានជាតិ

តំបន់សេដ្ឋកិច្ចពិសេសទាំង ៥ កន្លែងនៅខេត្តព្រះសីហនុ មានទុនវិនិយោគជាង ២ ៦០០ លានដុល្លារអាមេរិក

បានផុស

៣ ខែ មុន

នៅ

ថ្ងៃអង្គារ ១៧ ធ្នូ ២០២៤

ដោយ

បើតាមអភិបាលខេត្តព្រះសីហនុថ្លែងនៅក្នុងវេទិកាវិនិយោគក្នុងខេត្តព្រះសីហនុនៅព្រឹកនេះថា តំបន់សេដ្ឋកិច្ចពិសេសទាំង ៥ ទីតាំង នៅខេត្តព្រះសីហនុកំពុងដំណើរការមានទុនវិនិយោគសរុបប្រមាណ ២ ៦០០ លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅចំពោះមុខវិនិយោគិនប្រមាណ ២០០ នាក់ នៅក្នុងវេទិកាវិនិយោគក្នុងខេត្តព្រះសីហនុ លោក ម៉ាង ស៊ីណេត អភិបាលនៃគណៈអភិបាលខេត្តព្រះសីហនុបានថ្លែងថា ខេត្តព្រះសីហនុមានតំបន់សេដ្ឋកិច្ចពិសេសចំនួន ១៦ ទីតាំង ហើយកំពុងដំណើរការមាន ៥ ទីតាំង ដោយមានរោងចក្រសហគ្រាស និងមានកិច្ចសន្យាជួល (គម្រោងវិនិយោគ) សរុបចំនួន ២៨៤ មានទុនវិនិយោគសរុប ២ ៦៥៨ ៣៨៤ ៦៧៦ ដុល្លារ។

តាមរយៈតំបន់សេដ្ឋកិច្ចពិសេសទាំង ៥ ទីតាំងបានទាញបានកម្លាំងពលកម្មសរុប ៤៦ ០១៨ នាក់។ នេះបើតាមលោក ម៉ាង ស៊ីណេត។

បន្ថែមពីនេះ បើតាមលោកអភិបាលខេត្ត ក្រៅពីរោងចក្រសហគ្រាសកំពុងដំណើរការនៅតំបន់សេដ្ឋកិច្ចពិសេស ខេត្តព្រះសីហនុ ក៏មានសហគ្រាសធុនតូច មធ្យម និងសិប្បកម្មចំនួន ១ ២៣២ មូលដ្ឋាន មានទុនវិនិយោគសរុបចំនួន ៣០ ៣៤០ ២៥៧ ដុល្លារ ដែលផ្តល់កម្លាំងពលកម្មសរុបចំនួន ៦ ១៧២នាក់៕