ព័ត៌មានអន្ដរជាតិ

ផលិតកម្មរថយន្តថៃ ២០២៤ ធ្លាក់ចុះ ២០ ភាគរយ ដល់កម្រិតទាបបំផុតក្នុងរយៈពេល ៤ ឆ្នាំ

បានផុស

១ year មុន

នៅ

ថ្ងៃពុធ ២៩ មករា ២០២៥

ដោយ

សហព័ន្ធឧស្សាហកម្មថៃបានឱ្យដឹងថា ផលិតកម្មរថយន្តថៃប្រចាំឆ្នាំ ២០២៤ បានធ្លាក់ចុះប្រមាណ ២០ ភាគរយ ធៀបនឹងឆ្នាំ ២០២៣ ដល់កម្រិតទាបបំផុតក្នុងរយៈពេល ៤ ឆ្នាំ ដោយសារតែកម្សោយតម្រូវការ និងការនាំចេញ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធបានឱ្យដឹងជាលម្អិតថា នៅឆ្នាំ ២០២៤ ផលិតកម្មរថយន្តបានធ្លាក់ចុះមកត្រឹម ១,៤៧ លានគ្រឿង ពី ១,៨៣ លានគ្រឿងក្នុងឆ្នាំ ២០២៣។ ផលិតកម្មបានធ្លាក់ចុះនៅខែធ្នូ ដែលជាការធ្លាក់ចុះ ១៧ ខែជាប់ៗគ្នា។

នៅឆ្នាំ ២០២៥ នេះ សហព័ន្ធរំពឹងថា ផលិតកម្មរថយន្តថៃនឹងកើនឡើងវិញ ២ ភាគរយ ត្រឹម ១,៥ លានគ្រឿង ដែលក្នុងនោះ ១ លានគ្រឿងសម្រាប់ការនាំចេញ និងសល់ប៉ុន្មានសម្រាប់លក់ក្នុងស្រុក។ លោក Surapong Paisitpattanapong អ្នកនាំពាក្យផ្នែកឧស្សាហកម្មរថយន្តរបស់សហព័ន្ធ បានលើកឡើងថា កំណើនឆ្នាំនេះ នឹងជំរុញដោយការផលិតរថយន្តអគ្គិសនីដែលទទួលបានការលើកទឹកចិត្តពីរដ្ឋ និងកំណើននៃការលក់ក្រោមវិធានការជំរុញសេដ្ឋកិច្ចផ្សេងៗ។

បើតាមលោក Surapong នៅឆ្នាំ ២០២៤ ការលក់ក្នុងស្រុកបានធ្លាក់ចុះ ២៦,២ ភាគរយ ដល់កម្រិតទាបបំផុតក្នុងរយៈពេល ១៥ ឆ្នាំ ត្រឹម ៥៧២ ៦៧៥ គ្រឿង ដោយសារតែតម្រូវការកាន់តែខ្សោយ ពេលធនាគារបានរឹតបន្តឹងប្រាក់កម្ចីរថយន្ត ចំពេលថៃមានបំណុលគ្រួសារខ្ពស់។

ជាមួយគ្នានោះ លោកបានបន្តថា ការនាំចេញរថយន្តវិញ បានធ្លាក់ចុះ ៨,៨ ភាគរយ មកត្រឹម ១ លានគ្រឿង ដោយសារតែបញ្ហាភូមិសាស្ត្រនយោបាយ ការប្រកួតប្រជែងពីរថយន្តអគ្គិសនី និងវិធានការបញ្ចេញកាបូនដ៏តឹងរ៉ឹងនៅក្នុងប្រទេសមួយចំនួន៕