សេដ្ឋកិច្ច

SMEs ជិត ២ ពាន់មូលដ្ឋានបិទទ្វារ នៅក្នុងឆ្នាំ ២០២៤

បានផុស

១ year មុន

នៅ

ថ្ងៃពុធ ២៦ កុម្ភៈ ២០២៥

ដោយ

នៅក្នុងឆ្នាំ ២០២៤ មានសហគ្រាសធុនតូច និងមធ្យម និងសិប្បកម្មចំនួន ១ ៩៥០ បានបិទទ្វារ ដែលធ្វើឱ្យកម្លាំងពលកម្មថយចុះចំនួន ១៣ ៥៧៦ នាក់ ខណៈមន្រ្តីអះអាងថាការថមថយនៃសហគ្រាសក្នុងឆ្នាំមុនដោយសារតែការធ្លាក់ចុះនៃសេដ្ឋកិច្ចសកល និងតំបន់។ នេះតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ទន្ទឹមនេះ ក្រសួងឧស្សាហកម្មបានបញ្ជាក់ថា នៅក្នុងឆ្នាំ ២០២៤ ការចុះបញ្ជីសហគ្រាសធុនតូច និងមធ្យម និងសិប្បកម្មផ្នែកកម្មន្តសាលថ្មីបានចំនួន ១ ២៩២ មូលដ្ឋាន និងបានចេញវិញ្ញបនបត្រដំណើរការចំនួន ១ ០៥២ មូលដ្ឋាន និងវិញ្ញាបនបត្របន្តចំនួន ១ ៣៣៨ មូលដ្ឋាន ដែលបង្កើតការងារថ្មីចំនួន ២៥ ៨៣៣នាក់។

លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា កម្ពុជានៅតែអាចរក្សាបាននូវស្ថិរភាពម៉ាក្រូសេដ្ឋកិច្ច ធានាបាននូវអត្រាការងារខ្ពស់ ទាក់ទាញការវិនិយោគ និងការបង្កើតរោងចក្រសហគ្រាសជាបន្តបន្ទាប់ រហូតទទួលបានកំណើននៃការនាំចេញ ជាពិសេសការដាក់ចេញវិធានការជាបន្តបន្ទាប់របស់ប្រមុខដឹកនាំរាជរដ្ឋាភិបាលក្នុងការជួយដល់សហគ្រាសធុនតូច និងមធ្យម ដែលជាឆ្អឹងខ្នងនៃកំណើនសេដ្ឋកិច្ចជាតិ ដើម្បីរក្សាបានដំណើរការផលិតកម្ម ធុរកិច្ច និងការវិនិយោគនានា ក៏ដូចជារក្សាបានការងារជូនប្រជាពលរដ្ឋ។

គិតត្រឹមដំណាច់ឆ្នាំ ២០២៤ សហគ្រាសធុនតូច និងមធ្យម និងសិប្បកម្មសរុបមានចំនួន ៤៣ ៩៧០ មូលដ្ឋាន និងកម្លាំងពលកម្មចំនួន ៤៧៦ ២២៣ នាក់។

យោងតាមជំរឿនឆ្នាំ២០២២ របស់វិទ្យាស្ថានជាតិស្ថិតិនៃក្រសួងផែនការ កម្ពុជាមានសហគ្រាសធុនមីក្រូ តូច និងមធ្យមចំនួន ៧៥៣,៦៧០ មូលដ្ឋាន មានកម្លាំងពលកម្មសរុប ២,៩៨០,៥៦៩ នាក់ ក្នុងនោះស្រ្តីមាន១,៨៤១,៣៦២នាក់។

វិស័យនេះរួមចំណែក ៦៣% នៃផលិតផលក្នុងស្រុកសរុប និងផ្តល់ការងារជាង ៧០% ដោយទាន់មិនរាប់បញ្ចូលវិស័យកសិកម្ម៕

អត្ថបទ៖ ឡេង ដេត