ព័ត៌មានអន្ដរជាតិ

ម៉ាឡេស៊ីជំរុញការនាំចេញទុរេនទៅចិន

បានផុស

១ year មុន

នៅ

ថ្ងៃចន្ទ ៣ មីនា ២០២៥

ដោយ

ម៉ាឡេស៊ីជំរុញការនាំចេញទុរេនទៅចិន ដោយរំពឹងថាវានឹងកើនឡើងដល់ ២០-២៥ ភាគរយ នៅឆ្នាំនេះ ចំពេលដែលតម្រូវការកើនឡើង ហើយម៉ាឡេស៊ីបង្កើនការដាំដុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត The Star បានចុះផ្សាយដោយស្រង់ព័ត៌មានពីអាជ្ញាធរទីផ្សារកសិកម្មសហព័ន្ធ ថា ការព្យាករពីកំណើនការនាំចេញទុរេនទៅចិន គឺផ្អែកលើការពង្រីកដីកសិកម្មសម្រាប់ការដាំដុះ និងកន្លែងកែច្នៃទុរេន ហើយពង្រឹងទំនាក់ទំនងពាណិជ្ជកម្ម គួបផ្សំនឹងគំនិតផ្តួចផ្តើមផ្សព្វផ្សាយផ្សេងៗនៃផ្លែឈើប្រភេទនេះ។

មន្រ្តីអាជ្ញាធរបាននិយាយថា រដ្ឋម៉ាឡេស៊ីមួយចំនួនកំពុងធ្វើវិធានការជំរុញការដាំដុះទុរេន។ ជា ឧទាហរណ៍ ខេត្ត Kelantan បានកំណត់ផ្ទៃដី ៣ ០០០ ហិចតា សម្រាប់ចម្ការទុរេនប្រភេទ Musang King ដែលជាប្រភេទទុរេនល្បីរបស់ម៉ាឡេស៊ី។

កសិករដាំទុរេនបានលើកឡើងថា ការរឹតបន្តឹងការនាំចូលថ្មីៗរបស់ចិនលើផ្លែទុរេនស្រស់ថៃ និងវៀតណាម នឹងជួយបង្កើនតម្រូវការផ្លែទុរេនរបស់ម៉ាឡេស៊ី។

ចិនបាននាំចូលទុរេនក្នុងតម្លៃ ៦,៩៩ ប៊ីលានដុល្លារកាលពីឆ្នាំមុន កើនឡើង ៤,១ ភាគរយ បើធៀបនឹងឆ្នាំ ២០២៣ ។ ប្រទេសផ្គត់ផ្គង់កំពូលរបស់ចិន រួមមានថៃ បន្ទាប់មកគឺវៀតណាម ម៉ាឡេស៊ី និងហ្វីលីពីន។

ជាមួយគ្នានឹងការជំរុញទៅចិន លោក Sam Tan ប្រធានសមាគមអ្នកនាំចេញទុរេនម៉ាឡេស៊ី បានអំពាវនាវឱ្យរដ្ឋាភិបាលបង្កើតគោលនយោបាយហាមឃាត់ការកាត់ផ្លែទុរេនមុនទុំ ដើម្បីការពារគុណភាពផ្លែទុរេនម៉ាឡេស៊ី។ លោកអះអាងថា កសិករនៅថៃ និងវៀតណាម តែងបេះទុរេនមុនពេលទុំ ដើម្បីងាយស្រួលក្នុងការដឹកជញ្ជូន៕