ព័ត៌មានអន្ដរជាតិ

ចិនកំណត់គោលដៅកំណើនសេដ្ឋកិច្ចប្រហែល ៥ ភាគរយ ឆ្នាំនេះ

បានផុស

៤ សប្តាហ៍ មុន

នៅ

ថ្ងៃពុធ ៥ មីនា ២០២៥

ដោយ

ប្រទេសចិនបានកំណត់គោលដៅកំណើនសេដ្ឋកិច្ច ៥ ភាគរយ នៅឆ្នាំ ២០២៥ នេះ ដែលជាអត្រាដដែលៗរាប់តាំងពីឆ្នាំ ២០២៣ ចំពេលមានបញ្ហាប្រឈមកាន់តែច្រើនឡើងៗ ជាពិសេសហានិភ័យពាណិជ្ជកម្មពីខាងក្រៅ។ នេះបើតាមការចុះផ្សាយរបស់កាសែតរដ្ឋចិន Global Times។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសពីគោលដៅនេះ ធ្វើឡើងដោយនាយករដ្ឋមន្រ្តីចិន លោក លី ឈាំង នៅពេលលោកបង្ហាញរបាយការណ៍ការងាររបស់រដ្ឋាភិបាលទៅកាន់សភាជាតិ ដែលបានចាប់ផ្តើមសម័យប្រជុំប្រចាំឆ្នាំរបស់ខ្លួន នៅព្រឹកថ្ងៃពុធនេះ។

អ្នកជំនាញលើកឡើងថា ដើម្បីឱ្យសម្រេចបាននូវគោលដៅនេះ ចិនត្រូវជម្នះបញ្ហាប្រឈមធំៗជាច្រើនទាំងសម្ពាធក្នុង និងក្រៅស្រុក។

កាលពីឆ្នាំមុន ចិនសម្រេចបានកំណើនគោលដៅ ៥ ភាគរយ របស់ខ្លួន ដោយផលិតផលក្នុងស្រុកសរុប (GDP) កើនដល់ ១៨,៧៧ ទ្រីលានដុល្លារ ប៉ុន្តែសេដ្ឋកិច្ចរបស់ប្រទេសនៅតែបន្តញុំញីដោយកម្សោយតម្រូវការ និងវិបត្តិអចលនទ្រព្យដែលបន្តអូសបន្លាយអស់រយៈពេលជាច្រើនឆ្នាំមកហើយ។

បន្ថែមពីលើនោះ ឆ្នាំ ២០២៥ ចិនរងសម្ពាធនឹងសង្រ្គាមពាណិជ្ជកម្មជាមួយអាមេរិកកាន់តែខ្លាំងឡើងៗ នៅពេលដែលប្រធានាធិបតីអាមេរិក លោក ដូណាល់ ត្រាំ ប្រើគោលនយោបាយការពារនិយម ដោយដាក់ពន្ធ ២០ ភាគរយ លើទំនិញចិន។ នេះគឺជាបញ្ហាប្រឈមដ៏ធំមួយ ដោយអ្នកជំនាញសំអាងថា ចិនត្រូវពឹងផ្អែកលើការនាំចេញខ្លាំងដើម្បីជំរុញសេដ្ឋកិច្ច ដោយសារតែសម្ពាធក្នុងស្រុក ដែលរួមបញ្ចូលទាំងកម្សោយតម្រូវការ កំណើនយុវជនគ្មានការងារធ្វើ និងភាពចំណាស់នៃប្រជាសាស្រ្តជាដើម៕