ព័ត៌មានអន្ដរជាតិ

វៀតណាមសម្ដែងការសោកស្ដាយ ចំពោះការដាក់ពន្ធ ៤៦ ភាគរយ ពី ត្រាំ

បានផុស

១៥ នាទីutes មុន

នៅ

ថ្ងៃសុក្រ ៤ មេសា ២០២៥

ដោយ

ក្រសូងការបរទេសវៀតណាម នៅថ្ងៃសុក្រនេះ បានសម្ដែងការសោកស្ដាយចំពោះការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ក្នុងការដាក់ពន្ធឆ្លើយតបលើទំនិញវៀតណាមរហូតដល់ ៤៦ ភាគរយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

អ្នកនាំពាក្យក្រសួងការបរទេសវៀតណាម លោកស្រី Pham Thu Hang បានប្រាប់រ៉យទ័រថា៖ «យើងជឿជាក់ថា ការសម្រេចចិត្តនេះមិនសមស្របនឹងការពិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្ម ដែលផ្ដល់ផលប្រយោជន៍ទៅវិញទៅមករវាងប្រទេសទាំង ២ នោះទេ»។

លោកស្រីបានបន្តថា៖ «វាមិនឆ្លុះបញ្ចាំងឱ្យឃើញច្បាស់ពីស្មារតីនៃភាពជាដៃគូយុទ្ធសាស្ត្រគ្រប់ជ្រុងជ្រោយសម្រាប់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនោះទេ។ ប្រសិនបើអនុវត្ត វានឹងជះឥទ្ធិពលអវិជ្ជមានដល់ទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ហើយប៉ះពាល់ដល់ផលប្រយោជន៍ប្រជាជន និងធុរកិច្ចនៃប្រទេសទាំង២»។

ទោះបីជាយ៉ាងណាក៏ដោយ លោកស្រី Hang បានគូសបញ្ជាក់ថា វៀតណាមនឹងបន្តស្វែងរកដំណោះស្រាយសម្រាប់ការអភិវឌ្ឍប្រកបដោយស្ថិរភាព និងនិរន្តរភាពនៃទំនាក់ទំនងសេដ្ឋកិច្ចទ្វេភាគីជាមួយសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរគូសបញ្ជាក់ថា វៀតណាម ដែលមានអតិរេកពាណិជ្ជកម្មជាមួយអាមេរិក ១២៣,៥ ប៊ីលានដុល្លារកាលពីឆ្នាំមុន គឺជាប្រទេសដែលជាប់ពន្ធរបស់ ត្រាំ ក្នុងអត្រាខ្ពស់បំផុតមួយ រួមជាមួយបណ្ដាប្រទេសក្នុងតំបន់ផ្សេងៗទៀត ដូចជាកម្ពុជា ឡាវ មីយ៉ាន់ម៉ា ឥណ្ឌូណេស៊ី និងថៃជាដើម។

ភ្លាមៗក្រោយការប្រកាសរបស់ ត្រាំ នាយករដ្ឋមន្ត្រីវៀតណាម លោក ផាម មិញ ឈិញ បានដឹកនាំកិច្ចប្រជុំជាមួយក្រសួង ស្ថាប័ននានានៅព្រឹកថ្ងៃព្រហស្បតិ៍ ដើម្បីដោះស្រាយបញ្ហានេះ ខណៈប្រមុខរដ្ឋាភិបាលបានបញ្ជាឲ្យបង្កើតក្រុមឆ្លើយតបភ្លាមៗ។ លោកបានចាត់ឲ្យឧបនាយករដ្ឋមន្ត្រីវៀតណាម លោក Ho Duc Phoc ដឹកនាំក្រសួង ស្ថាប័នពាក់ព័ន្ធ និងប្រមូលមតិយោបល់ពីអង្គភាពអាជីវកម្ម ជាពិសេសអ្នកនាំចេញធំៗ៕