ព័ត៌មានអន្ដរជាតិ

EU ផ្អាកពន្ធសងសឹកអាមេរិក ដើម្បីបើកផ្លូវចរចា

បានផុស

១ សប្តាហ៍ មុន

នៅ

ថ្ងៃសុក្រ ១១ មេសា ២០២៥

ដោយ

សហភាពអឺរ៉ុប (EU) បានផ្អាកជាបណ្ដោះអាសន្ននូវវិធានការពន្ធសងសឹករបស់ខ្លួន ប្រឆាំងនឹងសហរដ្ឋអាមេរិក ដើម្បីបន្តបើកផ្លូវកិច្ចចរចាជាមួយរដ្ឋបាលរបស់ប្រធានាធិបតីអាមេរិក ដូណាល់ ត្រាំ។ នេះបើតាមការចុះផ្សាយរបស់បណ្ដាញទូរទស្សន៍ Euronews កាលពីថ្ងៃយប់ថ្ងៃព្រហស្បតិ៍។

*ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្អាកនេះនឹងរយៈពេលពេលយ៉ាងហោចណាស់ ៩០ ថ្ងៃ ពោលគឺប្រហែលនឹងចំនួនថ្ងៃ ដែលលោក ត្រាំ ផ្អាកវិធានការពន្ធគយបដិការរបស់លោក លើប្រទេសស្ទើរទាំងអស់ លើកលែងតែចិន។

ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន បាននិយាយក្នុងសេចក្តីថ្លែងការណ៍ខ្លីមួយកាលពីរសៀលថ្ងៃព្រហស្បតិ៍ថា៖ «យើងចង់ផ្តល់ឱកាសឱ្យមានការចរចា»។ លោកស្រីបន្ថែមថា៖ «ខណៈបញ្ចប់ការអនុម័តវិធានការតបតរបស់សហភាពអឺរ៉ុបដោយទទួលបានការគាំទ្រយ៉ាងខ្លាំងពីប្រទេសជាសមាជិករបស់យើង យើងនឹងផ្អាកវារយៈពេល ៩០ ថ្ងៃ សិន»។

លោកស្រីគូសបញ្ជាក់យ៉ាងដូច្នេះថា៖ «ប្រសិនបើការចរចាមិនត្រូវគ្នាទេ វិធានការឆ្លើយតបរបស់យើងនឹងចូលជា ធរមាន»។

គួរគូសបញ្ជាក់ថា ពន្ធសងសឹក ដែលជាវិធានការឆ្លើយតបទៅនឹងពន្ធលើដែកថែប និងអាលុយមីញ៉ូមរបស់ ត្រាំ ត្រូវបានអនុម័តកាលពីថ្ងៃពុធដោយរដ្ឋជាសមាជិករបស់ប្លុក ដោយកំណត់គោលដៅលើទំនិញអាមេរិកតម្លៃ ២១ ប៊ីលានអឺរ៉ូ ដូចជាសណ្តែកសៀង ទង់ដែង ដែក ម៉ូតូ ទូក និងទឹកក្រូចជាដើម។

លោកស្រី វ៉ុនឌែរ ឡេយែន បានកត់សម្គាល់ថា ការងារផ្ទៃក្នុងដើម្បីរៀបចំ «វិធានការណ៍តបតបន្ថែមទៀត» នឹងបន្ត ដោយសារតែភាពមិនប្រាកដប្រជានៃគោលនយោបាយរបស់លោក ត្រាំ។ លោកស្រីបន្ថែមថា សហភាពអឺរ៉ុបនៅតែមានជម្រើសជាច្រើន ដើម្បីឆ្លើយតប៕