សេដ្ឋកិច្ចចិននៅត្រីមាសទី ១ កើនលើសការរំពឹងទុក ទោះពន្ធ ត្រាំ បន្ថែមហានិភ័យ

កំណើនសេដ្ឋកិច្ចរបស់ប្រទេសចិនប្រចាំត្រីមាសទី១ នាដើមឆ្នាំ ២០២៥ បាន​កើនលើសការរំពឹងទុក ដែលជំរុញដោយភាពរឹង​មាំនៃការប្រើប្រាស់ និងផលិតកម្មឧស្សាហកម្ម បើទោះបីជា​គោលនយោបាយពន្ធគយរបស់​សហរដ្ឋអាមេរិក បន្ថែមហានិភ័យក៏ដោយ​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់រដ្ឋាភិបាលចិន​ ចេញផ្សាយ​នៅថ្ងៃពុធនេះ បាន​បង្ហាញថា ​ផលិតផលក្នុងស្រុកសរុប (GDP) របស់ប្រទេសចិន បានកើនឡើង ៥,៤ ភាគរយ នៅត្រីមាសចាប់ពីខែមករា ដល់ខែមីនា។ វា​​មិន​ផ្លាស់ប្ដូរពីអត្រានៅត្រីមាសមុន កាលពីចុងឆ្នាំ ២០២៤ នោះទេ ប៉ុន្តែខ្ពស់ជាងការរំពឹងទុក ៥,១ ភាគរយ របស់អ្នកវិភាគ​ក្នុងការស្ទង់មតិរបស់​រ៉យទ័រ​។

​សេដ្ឋវិទូមើលឃើញថា កំណើន ៥,៤ ភាគរយ គឺជា​ការចាប់ផ្ដើមល្អសម្រាប់សេដ្ឋកិច្ចចិន​ឆ្នាំ ២០២៥ ដោយ​គោលនយោបាយជំរុញរបស់រដ្ឋាភិបាល​បាន​ជួយដល់ការប្រើប្រាស់ និងការវិនិយោគក្នុងស្រុក។

យ៉ាងណាមិញ​ ទស្សនវិស័យសម្រាប់កំណើន រំពឹង​ថា​នឹង​ថយចុះ​ ក្រោយ​​ប្រធានាធិបតីអាមេរិក លោក ដូណាល់ ត្រាំ ប្រកាសដាក់ពន្ធធ្ងន់ធ្ងរលើការចូលទំនិញ​របស់​ប្រទេសចិន ដែលមាន​សហរដ្ឋអាមេរិក​ជាទីផ្សារដ៏សំខាន់មួយ។​

គួរគូសបញ្ជាក់ថា រដ្ឋាភិបាលចិន​បានកំណត់គោលដៅកំណើនសេដ្ឋកិច្ចប្រហែល ៥ ភាគរយ នៅឆ្នាំ ២០២៥ នេះ ខណៈប្រទេស​បន្តប្រឈមមុខនឹង​កម្សោយតម្រូវការ និងវិបត្តិអចលនទ្រព្យ បន្ថែមពីលើដោយ​វិធានការពន្ធគយរបស់ ត្រាំ៕
​