ម៉ាឡេស៊ី និងចិន ចុះកិច្ចព្រមព្រៀងចំនួន ៣១ ស្តីពី AI ពាណិជ្ជកម្ម ទេសចរណ៍ ក្រោមទស្សនកិច្ចរបស់ ស៊ី ជីនពីង

ប្រទេសម៉ាឡេស៊ី និង​ចិន បានចុះហត្ថលេខាលើអនុស្សរណៈនៃការយោគយល់គ្នា (MoU) ចំនួន ៣១ លើ​កិច្ចសហប្រតិបត្តិការជាច្រើន រួមមាន បញ្ញាសិប្បនិម្មិត (AI) សេដ្ឋកិច្ចឌីជីថល ទេសចរណ៍ ​ក្នុងចំណោមវិស័យជាច្រើនទៀត។ នេះបើតាម​ការចុះផ្សាយរបស់​កាសែត New Straits Times។

​ការចុះកិច្ចព្រមព្រៀមទាំងនេះ បាន​ធ្វើឡើង​ក្រោមវត្តមានរបស់នាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម និង​ប្រធានាធិបតីចិន​ លោក ស៊ី ជីនពីង កាលពីថ្ងៃពុធ អំឡុងដំណើរទស្សនកិច្ចរបស់លោក ស៊ី ទៅម៉ាឡេស៊ី។ ​

ក្រោមក្រសួងការបរទេស ឯកសារចំនួន ៣ ត្រូវបាន​ចុះ MoU រវាងលោក​រដ្ឋមន្រ្តី Mohamad Hasan និងរដ្ឋមន្ត្រីការបរទេសចិន លោក Wang Yi ។ ទាំងនេះរួមបញ្ចូលកិច្ចព្រមព្រៀងដើម្បីរួមគ្នាលើកកម្ពស់កិច្ចសហប្រតិបត្តិការក្រោមគំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល ក៏ដូចជាពង្រឹងកិច្ចសហប្រតិបត្តិការអភិវឌ្ឍន៍ និងគាំទ្រការអនុវត្តគំនិតផ្តួចផ្តើមអភិវឌ្ឍន៍សកល។

កិច្ចព្រមព្រៀងលើកលែងទិដ្ឋាការ​ចំពោះគ្នាទៅវិញទៅមកសម្រាប់អ្នកកាន់កិច្ចការសាធារណៈ និងលិខិតឆ្លងដែនធម្មតា ក៏ត្រូវបានចុះហត្ថលេខាផងដែរ​។

ទន្ទឹមនឹងនោះ ទ្វេភាគីចិន ម៉ាឡេស៊ី ដដែល​ ​បាន​ចុះ​ MoU លើឯកសារចំនួន ៣ ​ក្នុងវិស័យពាណិជ្ជកម្ម​​ផ្សេងទៀត ដោយ​​គ្របដណ្តប់លើពាណិជ្ជកម្មលើសេវាកម្ម កិច្ចសហប្រតិបត្តិការស្តង់ដារ និងការលើកកម្ពស់គំនិតផ្តួចផ្តើម «ប្រទេស២ សួន​២​»។ យោងតាម​រដ្ឋមន្ត្រីពាណិជ្ជកម្ម និងឧស្សាហកម្មម៉ាឡេស៊ី លោក​ Zafrul Abdul Aziz ​កិច្ចព្រមព្រៀងទាំង៣ ​នឹងត្រួសត្រាយផ្លូវសម្រាប់ការនាំចេញកាន់តែច្រើនទៅ​ចិន​ ខណៈ​ទាក់ទាញការវិនិយោគរបស់ចិន ដើម្បីពង្រឹងវិស័យបច្ចេកវិទ្យារបស់​​ម៉ាឡេស៊ី​។

ប្រទេសទាំង ២ ក៏បានចុះហត្ថលេខាលើកិច្ចព្រមព្រៀងមួយ ដើម្បីបង្កើនកិច្ចសហប្រតិបត្តិការក្នុងវិស័យផ្លូវដែកផងដែរ។ ក្នុងវិស័យ​ឌីជីថល អនុស្សរណៈ ២ ត្រូវបានផ្លាស់ប្តូររវាងក្រសួងឌីជីថល និងគណៈកម្មការកំណែទម្រង់ជាតិរបស់ចិន (NDRC) ដោយផ្តោតលើកិច្ចសហប្រតិបត្តិការក្នុងវិស័យ AI និងសេដ្ឋកិច្ចឌីជីថល។

គួរគូសបញ្ជាក់ថា កិច្ចព្រមព្រៀងចុងក្រោយ​បង្ហាញពីការពង្រឹងទំនាក់ទំនងកាន់តែខ្លាំងរវាង​ចិន និងម៉ាឡេស៊ី ចំពេល​ដែល​លោក​ ស៊ី កំពុងធ្វើដំណើរទស្សនកិច្ចនៅអាស៊ីអាគ្នេយ៍ រួមមាន​វៀតណាម ម៉ាឡេស៊ី និងចុងក្រោយកម្ពុជា​ ស្របពេលដែល​ភាពមិនប្រាកដប្រជាសកលកើនឡើង ដោយសារតែគោលនយោបាយពន្ធគយរបស់សហរដ្ឋអាមេរិក៕