ព័ត៌មានអន្ដរជាតិ

WTO ព្យាករពីការធ្លាក់ចុះនៃពាណិជ្ជកម្មសកលឆ្នាំ ២០២៥ ដោយសារពន្ធ

បានផុស

៤២ វិនាទី មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

អង្គការពាណិជ្ជកម្មពិភពលោក (WTO) កាលពីថ្ងៃពុធ បានផ្លាស់ប្ដូរការព្យាករណ៍របស់ខ្លួនសម្រាប់ពាណិជ្ជកម្មសកល ពីកំណើនដ៏រឹងមាំទៅជាការធ្លាក់ចុះវិញ ដោយនិយាយថា ការដំឡើងពន្ធគយរបស់សហរដ្ឋអាមេរិក និងផលប៉ះពាល់ អាចនាំឱ្យមានការធ្លាក់ចុះនៃពាណិជ្ជកម្មសកលខ្លាំងបំផុតរាប់តាំងពីវិបត្តិកូវីដ១៩។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WTO បានរំពឹងថា ពាណិជ្ជកម្មទំនិញរបស់សកល នឹងធ្លាក់ចុះ ០,២ ភាគរយ នៅឆ្នាំនេះ ធៀបនឹងការព្យាករអំពីកំណើន ៣ ភាគរយ កាលពីខែតុលា ឆ្នាំមុន។

អគ្គនាយក WTO លោកស្រី Ngozi Okonjo-Iweala បានប្រាប់អ្នកយកព័ត៌មាននៅទីក្រុងហ្សឺណែវថា៖ «ខ្ញុំមានការព្រួយបារម្ភយ៉ាងខ្លាំង។ ការធ្លាក់ចុះនៃកំណើនពាណិជ្ជកម្មទំនិញសកល គឺជាការព្រួយបារម្ភដ៏ធំ»។

ការធ្លាក់ចុះនៃពាណិជ្ជកម្មសកលនេះ មានការជាប់ទាក់ទងដោយផ្ទាល់ទៅនឹងវិធានការពន្ធគយរបស់ប្រធានាធិបតីអាមេរិក លោក ដូណាល់ ត្រាំ ដែលបានបង្កើនពន្ធលើទំនិញនាំចូលសហរដ្ឋអាមេរិក ដូចជាដែកថែប អាលុយមីញ៉ូម និងរថយន្ត និងពន្ធគយបដិការដែលផ្ដោតស្ទើរតែលើគ្រប់មុខទំនិញ។ តួយ៉ាង ត្រាំ បានប្រកាសពន្ធបន្តបន្ទាប់ សរុបគ្នា ២៤៥ ភាគរយ លើទំនិញចិន ហើយចិនវាយបកវិញ ជាមួយជាវិធានការពន្ធសងសឹកបន្តបន្ទាប់ សរុប ១២៥ ភាគរយ។ សហភាពអឺរ៉ុប ក៏ដូចជាកាណាដា ក៏បានប្រកាសពីពន្ធគយសងសឹកផងដែរ មុនពេលផ្អាកបណ្ដោះអាសន្នសិន ក្រោយ ត្រាំ ប្រកាសផ្អាកពន្ធគយបដិការ ៩០ ថ្ងៃ ដើម្បីចរចា លើកលែងតែជាមួយចិន។

ក្រោមបញ្ហានេះ WTO បាននិយាយថា ប្រសិនបើ ត្រាំ ដាក់ឡើងវិញនូវអត្រាពន្ធពេញទំហឹងលើគ្រប់មុខទំនិញរបស់លោក នោះវានឹងកាត់បន្ថយកំណើនពាណិជ្ជកម្មទំនិញដោយ ០,៦ ពិន្ទុភាគរយ ឬក៏ឈានដល់ ០,៨ ភាគរយ ដោយសារតែផលប៉ះពាល់ផ្សេងៗហួសពីទំនាក់ទំនងពាណិជ្ជកម្មជាមួយអាមេរិក។ ការធ្លាក់ចុះអាចឈានដល់ ១,៥ ភាគរយ ដែលធ្ងន់ធ្ងរបំផុតរាប់តាំងពីឆ្នាំ ២០២០។

*អគ្គនាយក WTO លោកស្រី Ngozi Okonjo-Iweala*

លោកស្រី Okonjo-Iweala បានបន្ថែមថា៖ «ប្រសិនបើយើងមានការធ្លាក់ចុះនៃទំនិញសកល ផលប៉ះពាល់នឹងមានលើកំណើនផលិតផលក្នុងស្រុកសរុប (GDP)។ យើងបានមើលឃើញថា កង្វល់ពាណិជ្ជកម្មអាចមានជះផលអវិជ្ជមានចូលទៅក្នុងទីផ្សារហិរញ្ញវត្ថុ និងវិស័យផ្សេងទៀតនៃសេដ្ឋកិច្ច»។ លោកស្រីក៏បានលើកឡើងអំពីការប៉ះពាល់ដល់ប្រទេសកំពុងអភិវឌ្ឍន៍ផងដែរ។

ប្រមុខ WTO ដដែល បានថ្លែងថា ក្តីបារម្ភដ៏ធំបំផុតរបស់លោកស្រី គឺការបាក់បែកគ្នាផ្នែកសេដ្ឋកិច្ចរវាងចិន និងសហរដ្ឋអាមេរិក។ WTO រំពឹងថា ពាណិជ្ជកម្មរវាងប្រទេសទាំង២ នឹងធ្លាក់ចុះ ៨១ ភាគរយ និងអាចដល់ទៅ ៩១ ភាគរយ ប្រសិនបើ ត្រាំ មិនប្រកាសពីការលើកលែងពន្ធលើស្មាតហ្វូន និងគ្រឿងអេឡិចត្រូនិកកាលពីថ្មីៗទេនោះ។ នៅក្នុងសេណារីយ៉ូនេះ GDP សកលអាចធ្លាក់ចុះ ៧ ភាគរយ ក្នុងរយៈពេលវែង ដែលធ្ងន់ធ្ងរ ហើយអូសបន្លាយ។

កាលពីព្រឹកថ្ងៃពុធ ទីភ្នាក់ងារពាណិជ្ជកម្ម និងអភិវឌ្ឍន៍របស់អង្គការសហប្រជាជាតិបាននិយាយថា កំណើនសេដ្ឋកិច្ចពិភពលោកអាចធ្លាក់ចុះមកត្រឹម ២,៣ ភាគរយ ដោយសារភាពតានតឹងពាណិជ្ជកម្ម និងភាពមិនច្បាស់លាស់ដែលជំរុញឱ្យមាននិន្នាការធ្លាក់ចុះនៃសេដ្ឋកិច្ច៕