ព័ត៌មានអន្ដរជាតិ

ថៃរំពឹងកិច្ចព្រមព្រៀងពន្ធពីអាមេរិកមុនថ្ងៃ ៩ កក្កដា និងក្នុងអត្រាល្អជាងវៀតណាម

បានផុស

២១ វិនាទី មុន

នៅ

ថ្ងៃសុក្រ ៤ កក្កដា ២០២៥

ដោយ

ប្រធានសភាពាណិជ្ជកម្មថៃ លោក Poj Aramwattananont ជឿជាក់ថា ថៃនឹងសម្រេចបាននូវកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក មុនកាលបរិច្ឆេទកំណត់នៅសប្ដាហ៍ក្រោយ ខណៈរំពឹងទៀតថា ថៃនឹងទទួលបាននូវអត្រាពន្ធល្អជាងវៀតណាម ព្រោះវៀតណាមមានអតិរេកពាណិជ្ជកម្មជាមួយអាមេរិកច្រើនជាង។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញភាពជឿជាក់យ៉ាងដូច្នេះ ធ្វើឡើងខណៈមន្រ្តីជាន់ខ្ពស់ថៃបើកកិច្ចប្រជុំផ្លូវការទ្វេរភាគីជាមន្រ្តីអាមេរិកដោយផ្ទាល់ផ្លូវការជាលើកដំបូងកាលពីថ្ងៃព្រហស្បតិ៍នៅទីក្រុងវ៉ាស៊ីនតោន ឌីស៊ី ដោយលទ្ធផលនៃកិច្ចប្រជុំរំពឹងចេញនៅថ្ងៃសុក្រនេះ។

លោក Poj រំពឹងថា កិច្ចព្រមព្រៀងថៃ និងអាមេរិកអាចសម្រេចឡើងមុនថ្ងៃ ៩ កក្កដា ជាពេលដែលពន្ធគយបដិការរំពឹងថានឹងចូលជាធរមានជាថ្មី បើមិនដូច្នោះទេ ថៃនឹងជាប់ពន្ធ ៣៦ ភាគរយ (អត្រាដើម) លុះត្រាតែសហរដ្ឋអាមេរិកយល់ព្រមលើការពន្យារពេលសម្រាប់ចរចា។

គួររំឭកថា កាលពីថ្ងៃពុធ ប្រធានាធិបតីអាមេរិក លោក ដូណាល់ ត្រាំ បានប្រកាសកិច្ចព្រមព្រៀងពាណិជ្ជកម្មជាមួយវៀតណាម ដោយដាក់ពន្ធវៀតណាម ២០ ភាគរយ សម្រាប់ទំនិញនាំចូលទៅទឹកដីរបស់អាមេរិក។ វៀតណាមគឺជាប្រទេសដំបូងគេនៅអាស៊ីអាគ្នេយ៍ ដែលសម្រេចបានការប្រកាសនេះ ក្រោយមានការចរចាជាច្រើនជុំ។

កាលពីថ្ងៃព្រហស្បតិ៍ម្សិលមិញ រដ្ឋមន្ត្រីក្រសួងហិរញ្ញវត្ថុថៃ Pichai Chunhavajira បានជួបប្រជុំគ្នានៅទីក្រុងវ៉ាស៊ីនតោន ឌីស៊ី ជាមួយតំណាងពាណិជ្ជកម្មអាមេរិក លោក Jamieson Greer ។ កន្លងមក មន្រ្តីទ្វេភាគីភាគច្រើនជួបប្រជុំគ្នាតាមអនឡាញ ដើម្បីបើកផ្លូវឱ្យមានការចរចាកាលពីថ្ងៃព្រហស្បតិ៍។

ខណៈគេមិនទាន់ដឹងថា ថៃនឹងទទួលរងនូវអត្រាពន្ធប៉ុណ្ណានៅឡើយ កន្លងមកមានការរាយការណ៍ថា អាមេរិកបានកំណត់ពន្ធលើថៃក្នុងអត្រា ១៨ ភាគរយ ដែលនេះជាអ្វីដែលលោក Pichai ច្រានចោល។ អ្នកជំនាញថៃខ្លះព្យាករថា អត្រាពន្ធលើថៃអាចនឹងមានចន្លោះពី ១៥-២០ ភាគរយ។

ជុំវិញបញ្ហានេះផងដែរ លោក Poj បានលើកឡើងថា សំណើចរចាពន្ធរបស់ថៃជូនទៅអាមេរិកមិនអាក្រក់នោះទេ ទោះគេទាន់ដឹងថា អាមេរិកទាមទារអ្វីខ្លះបន្ថែមទៀតនៅពេលនេះក៏ដោយ។ កន្លងមកថៃ បានដាក់ជូនសំណើធំៗរួមមានបង្កើនការនាំចូលពីអាមេរិក ទប់ស្កាត់ការក្លែងបន្លំប្រភពទំនិញ បង្កើនការវិនិយោគថៃនៅអាមេរិក បង្កើនកិច្ចសហប្រតិបត្តិការ និងបើកទីផ្សារជាដើម។

យ៉ាងណាមិញ អ្នកជំនាញថៃបានព្រួយបារម្ភថា ការបើកទីផ្សារថៃសម្រាប់ផលិតផលអាមេរិកអាចនឹងប៉ះពាល់ដល់ឧស្សាហកម្មក្នុងស្រុក ជាពិសេសឧស្សាហកម្មសាច់ជ្រូក ឬគោជាដើម។ ក្នុងកិច្ចព្រមព្រៀងកាលពីថ្ងៃពុធ វៀតណាមបានព្រមព្រៀងបើកទីផ្សារឱ្យទំនិញអាមេរិក ដោយអាមេរិកអាចនាំផលិតផលរបស់ខ្លួនមកវៀតណាមដោយសេរីជាមួយនឹងអត្រាសូន្យភាគរយ៕