ត្រាំ ចេញបញ្ជាដកកសិផលនាំចូលមួយចំនួន​​ចេញពីបញ្ជីជាប់ពន្ធបដិការ

ប្រធានាធិបតីសហរដ្ឋអាមេរិក លោក ដូណាល់​ ត្រាំ កាលពីសប្ដាហ៍មុន​ បានចុះហត្ថលេខាលើអធិបញ្ជាមួយ​ ដែលដក​កសិផលនាំចូលមួយចំនួន ចេញពីបញ្ជីជាប់ពន្ធបដិការរបស់រដ្ឋបាល​លោក។

ក្នុងសេចក្ដីប្រកាសរបស់សេតវិមាន ដែលចេញផ្សាយកាលពីថ្ងៃសុក្រ ​កសិផលទាំងនោះរួមមាន​ កាហ្វេ និងតែ ផ្លែឈើ,​ និងទឹកផ្លែឈើត្រូពិក, កាកាវ និងគ្រឿងទេស, ចេក ក្រូច និងប៉េងប៉ោះ, និងសាច់គោ។ ជីកសិកម្ម ក៏ត្រូវបាន​ដកចេញពីពន្ធបដិការផងដែរ។ ​ពន្ធនេះ ចូលជាធរមានតាំងតែពីថ្ងៃទី ១៣ វិច្ឆិកា ម្ល៉េះ។

លោក ត្រាំ បានប្រាប់អ្នកយកព័ត៌មានកាលពីថ្ងៃសុក្រនៅលើយន្តហោះ Air Force One ថា ការលើកលែងពន្ធគយ នឹង​ធ្វើឱ្យតម្លៃធ្លាក់ចុះ ហើយភាគច្រើនវាត្រូវបានអនុវត្តចំពោះអាហារដែល​ពឹងផ្អែកលើការនាំចូលទៅអាមេរិក ដូចជាចេក ជាដើម។

លោក​ថ្លែងយ៉ាងដូច្នេះថា៖ «យើងមិនផលិតវា​ក្នុងប្រទេស​យើងទេ ដូច្នេះ​មិនចាំបាច់ការការពារឧស្សាហកម្ម ឬផលិតផលអាហាររបស់យើងទេ»។

គួរគូសបញ្ជាក់ថា រាប់តាំងពីឡើងកាន់អំណាចមក លោក​ ត្រាំ បាន​ដាក់ពន្ធស្ទើរគ្រប់ប្រទេសក្នុងអត្រាចន្លោះពី ១០% ទៅ ៤០% ឬលើសនេះផងក៏មាន​ ដោយ​សម្អាងថា វានឹងជួយការពារ​ និងពង្រឹកផលិតកម្មក្នុងស្រុក។ យ៉ាងណាមិញ ការដកទំនិញកសិកម្មសំខាន់ៗពីក្នុងបញ្ជីពន្ធបដិការរបស់លោកនៅពេលនេះ ធ្វើឡើងចំពេលដែលរដ្ឋបាលរបស់ខ្លួនប្រឈមនឹង​សម្ពាធនៃអតិរផណា ពោលគឺបញ្ហា ដែលលោក ត្រាំ បាន​សន្យាដោះស្រាយ មុនជាប់ឆ្នោតជាប្រធានាធិបតី។

កន្លងមក ត្រាំ ទទូចថា ពន្ធរបស់លោកមិនមែនជាកត្តាធ្វើឱ្យតម្លៃទំនិញអាមេរិកហក់ឡើងនោះទេ។ ប៉ុន្តែយោងតាមទិន្នន័យរដ្ឋាភិបាល​សហព័ន្ធ តម្លៃម្ហូបអាហារនៅអាមេរិក​បានកើនឡើង ៣,១% រាប់តាំងពីដើមឆ្នាំដល់ខែកញ្ញា ​(​ទាបជាងកម្រិតកំពូល ១១,៤% នៅឆ្នាំ ២០២២)។ តម្លៃសាច់គោ បានកើនឡើង ១២,៩%​ ធៀបនឹងខែកញ្ញាឆ្នាំមុន ខណៈតម្លៃផ្លែចេកបានកើនឡើង ៦,៩% និងកាហ្វេកើន 6.9% និងកាហ្វេលីញ ១៨,៩%៕ ​