សេដ្ឋកិច្ច

អ្នកដំណើរជិត ២ លាននាក់ ចេញ-ចូល កម្ពុជាតាមជើងហោះហើរនៅត្រីមាសទី១

បានផុស

១ year មុន

នៅ

ថ្ងៃសុក្រ ២៥ មេសា ២០២៥

ដោយ

នៅក្នុងត្រីមាសទី១ ឆ្នាំ ២០២៥ កម្ពុជាទទួលបានអ្នកដំណើរចេញ-ចូលតាមជើងហោះហើរជិត ២ លាននាក់ (១ ៩៦០ ៦៣៥) កើនឡើង ១៩% ធៀបនឹងរយៈពេលដូចគ្នានៅឆ្នាំ ២០២៤ ខណៈមន្រ្តីនៃអាកាសចរណ៍ស៊ីវិលអះអាងអំពីភាពកាន់តែប្រសើរឡើងនៃការមកដល់ភ្ញៀវទេចរតាមផ្លូវអាកាសក្នុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអាកាសចរណ៍ស៊ីវិល នៅក្នុងត្រីមាសទី១ ឆ្នាំ ២០២៥ អាកាសយានដ្ឋានអន្តរជាតិទាំង ៣ របស់កម្ពុជា ទទួលបានជើងហោះហើរចំនួន ១៧ ៤៣៤ ជើង កើន ១៩ ភាគរយ ក្នុងនោះអ្នកដំណើរចំនួន ១ ៩៦០ ៦៣៥ នាក់ កើន ១៩ ភាគរយ និងទំនិញចេញ-ចូលជិត ២ ម៉ឺនតោន ១០ ភាគរយ ធៀបនឹងរយៈពេលដូចគ្នាលកាលពីឆ្នាំមុន។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលប្រាប់កម្ពុជាថ្មីនៅថ្ងៃទី ២៥ ខែមេសា ឆ្នាំ ២០២៥ថា វិស័យដឹកជញ្ជូនតាមផ្លូវអាកាស ទើបតែងើបឡើងវិញជាលំដាប់បានប្រមាណ ៦៨ ភាគរយ ធៀបនឹងស្ថានភាពមុនវិបត្តិជំងឺកូវីដ១៩។

ជើងហោះហើរចេញ-ចូល ជាមធ្យមក្នុងមួយថ្ងៃ នៅអាកាសយានដ្ឋានទាំង ៣ មានក្រុមហ៊ុនអាកាសចរណ៍ជាតិ និងអន្តរជាតិ ចំនួន ៣១ កំពុងហោះហើរចេញ-ចូល ក្នុងនោះអាកាសយានដ្ឋានអន្តរជាតិភ្នំពេញ មានចំនួន ១៣៣ ជើងក្នុងមួយថ្ងៃ អាកាសយានដ្ឋានខេត្តសៀមរាបអង្គរ មានចំនួន ៤៩ ជើង ក្នុងមួយថ្ងៃ និងអាកាសយានដ្ឋានខេត្តព្រះសីហនុចំនួន ៦ ជើងក្នុងមួយថ្ងៃ។

យោងតាមអាកាសចរណ៍ស៊ីវិល នៅក្នុងឆ្នាំ ២០២៤ កម្ពុជាទទួលបានអ្នកដំណើរចេញ-ចូលតាមជើងហោះហើរជាង ៦ លាននាក់ កើនឡើង ២២% ធៀបនឹងឆ្នាំ ២០២៣។

អាកាសចរណ៍ស៊ីវិល រំពឹងថា វិស័យដឹកជញ្ជូនតាមផ្លូវអាកាសនឹងអាចសម្រេចបាននូវការដឹកជញ្ជូនអ្នកដំណើរ ចំនួន ៧,៥ លាននាក់ និងទំនិញចំនួន ៨០ ពាន់តោន នៅក្នុងឆ្នាំ ២០២៥៕