តម្លៃមាសធ្លាក់ចុះជាគំហុកជាថ្មី ជុំវិញ​ការធូរស្រាលនៃសង្រ្គាមពាណិជ្ជកម្ម

តម្លៃមាសអន្តរជាតិសម្រាប់ការជួញដូរនៅថ្ងៃពុធ បានធ្លាក់ចុះជាគំហុកជាថ្មីដល់កម្រិតទាបបំផុតក្នុងរយៈពេលជាង ១ ខែ ​ដោយសារតែការស្រាកស្រាន្តនៃភាពតានតឹងសង្រ្គាមពាណិជ្ជកម្ម​​សហរដ្ឋអាមេរិក និងចិន ដែលធ្វើឱ្យ​វិនិយោគិនងាកទៅរកជម្រើសវិនិយោគដទៃ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃមាសជួញដូរដោយផ្ទាល់ បានធ្លាក់ចុះ ៧១,៥៨ ដុល្លារ ឬ ២,២១ ភាគរយ ដោយជួញដូរនៅតម្លៃ ៣ ១៧២,៦ ដុល្លារ/អោន គិតត្រឹម៉ោង ១០ និង ២២ នាទីយប់ថ្ងៃពុធ នៅទីក្រុងញូវយ៉ក (ម៉ោង ៩ និង ២២ ព្រឹក ថ្ងៃព្រហស្បតិ៍ នៅកម្ពុជា)។ ​តម្លៃមាសនាពេលអនាគត​របស់សហរដ្ឋអាមេរិក បានធ្លាក់ចុះ ១,៨ ភាគរយ ដោយបញ្ចប់ការជួញដូរថ្ងៃពុធ នៅ ៣ ១៨៨,៣ ដុល្លារ/អោន។ ​

អ្នកជំនាញលើកឡើងថា ការធ្លាក់ចុះនៃតម្លៃមាសនាពេលនេះ បណ្ដាលមកពីការធូរស្រាលនៃជម្លោះពាណិជ្ជកម្ម ក្រោយសហរដ្ឋអាមេរិក និងចិន ព្រមព្រៀងទម្លាក់អត្រាពន្ធខ្ពស់កប់ពពករបស់ខ្លួន ក្នុងរយៈពេល ៩០ ថ្ងៃ ដោយចូលជាធរមានពីម្សិលមិញតទៅ។

ក្នុងបទសម្ភាសន៍មួយកាលពីថ្ងៃអង្គារ ប្រធានាធិបតីអាមេរិក លោក ដូណាល់ ត្រាំ បាននិយាយ​ថា លោក​អាចឃើញខ្លួនឯងដោះស្រាយដោយផ្ទាល់ជាមួយប្រធានាធិបតីចិន លោក ស៊ី ជីនពីង លើ​សេចក្ដីលម្អិតនៃកិច្ចព្រមព្រៀងពាណិជ្ជកម្ម។ ​លោកបន្ថែមផងដែរ កិច្ចព្រមព្រៀងជាមួយឥណ្ឌា ជប៉ុន និងកូរ៉េខាងត្បូង កំពុងដំណើរការនាពេលនេះ។ ​

គួរគូសបញ្ជាក់ថា មាស ដែលគេរាប់ថាជាទ្រព្យសម្បត្តិសុវត្ថិភាពនៅពេលមានភាពមិនប្រាកដប្រជា កើនឡើងខ្ពស់បំផុតក្នុងប្រវត្តិសាស្រ្តជាបន្តបន្ទាប់ រហូតដល់ ៣ ៥០០ ដុល្លារ/អោន នៅថ្ងៃទី ២២ ខែមេសា មុនពេលវាធ្លាក់ចុះមកត្រឹមតម្លៃបច្ចុប្បន្ន។ ទោះបីជាយ៉ាងនេះក្ដី តម្លៃមាសនៅតែកើនឡើងប្រមាណ ២១,៣ ភាគរយ ធៀប​នឹង​អត្រាតម្លៃកាលពីដើមឆ្នាំនេះ៕