Adidas និង Puma គ្រោងដំឡើងថ្លៃនៅអាមេរិក ដូច Nike ដែរ

ក្រុមហ៊ុនសម្លៀកបំពាក់កីឡា និងស្បែកជើង Adidas និង Puma គ្រោងដំឡើងថ្លៃផលិតផលរបស់ខ្លួននៅលើទីផ្សារសហរដ្ឋអាមេរិក ដោយសារតែពន្ធគយរបស់ប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រកាលពីថ្ងៃព្រហស្បតិ៍ ដោយស្រង់សម្ដីអ្នកវិភាគ និងវិនិយោគិន។

ការរាយការណ៍នេះ ធ្វើឡើងក្រោយក្រុមហ៊ុន Nike បានប្រកាសកាលពីថ្ងៃពុធថា ​ខ្លួននឹងដំឡើងតម្លៃផលិតផលខ្ពស់រហូតដល់ ១០ ដុល្លារ លើផលិតផលមួយចំនួន ដែលមាន​តម្លៃលើស ១៥០ ដុល្លារ ដោយចាប់ផ្ដើមនៅសប្ដាហ៍ក្រោយ។ ផលិតផលក្រោម ១០០ ដុល្លារ និងសម្រាប់កូនក្មេង មិនមានការដំឡើងថ្លៃនោះទេ។

អ្នកវិភាគទំនិញកីឡានៅធនាគារវិនិយោគ UBS លោក Robert Krankowski បាននិយាយថា៖ «នោះគឺជាពេលដែល Adidas និង Puma កំពុងរង់ចាំ»។

ក្រុមហ៊ុនម៉ាកសម្លៀកបំពាក់កីឡាអាល្លឺម៉ង់ទាំង២នាពេលថ្មីៗនេះ បាននិយាយថា ពួកគេមិនមែនជាអ្នកដំបូងគេដែលនឹងដំឡើងថ្លៃនោះទេ ផ្ទុយទៅវិញ កំពុងរងចាំមើលចំណាត់ការរបស់គូប្រជែង។ ​

លោក Krankowski ក្រុមហ៊ុន Adidas និង Puma អាច​នឹង​ដំឡើងថ្លៃ ព្រោះតែវាជាបញ្ហា​ទូទាំងឧស្សាហកម្មរួម មិនមែនតែចំពោះ Nike ទេ ដែលរងផលប៉ះពាល់ពីពន្ធរបស់ លោក ត្រាំ។

គួរគូស​បញ្ជាក់ថា ក្រុមហ៊ុនសម្លៀកបំពាក់ជាច្រើន ពឹងផ្អែកលើផលិតកម្មនៅក្នុងប្រទេសចិន និងវៀតណាម រួមជាមួយបណ្ដាលប្រទេសក្បែរខាងផ្សេងទៀត​។ លោក ត្រាំ ដាក់ពន្ធ ១៤៥ ភាគរយ លើទំនិញនាំចូលពីចិន ហើយកាលពីសប្ដាហ៍មុន បាន​ទម្លាក់មកត្រឹម ៣០ ភាគរយ ជាបណ្ដោះអាសន្នរយៈពេល ៩០ ថ្ងៃ។ លោកបានដាក់ពន្ធគយបដិការ ៤៦ ភាគរយ លើវៀតណាម ប៉ុន្តែអនុវត្តត្រឹម ១០ ភាគរយ សិន រហូតដល់ដើមខែកក្កដា៕