អាស៊ានស្របគ្នាថា កិច្ចព្រមព្រៀងពាណិជ្ជកម្ម​ជាមួយអាមេរិកណាមួយ មិនគួរ​ប៉ះពាល់ដល់ប្រទេសសមាជិកណាឡើយ

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាន​ឱ្យដឹងថា បណ្ដាមេដឹកនាំនៃសមាគមន៍ប្រជាជាតិអាស៊ីអាគ្នេយ៍ (អាស៊ាន) ​បានយល់ស្របគ្នាកាលពីថ្ងៃអង្គារថា​ កិច្ចព្រមព្រៀងពាណិជ្ជកម្មទ្វេភាគីណាមួយជាមួយ​សហរដ្ឋអាមេរិកជុំវិញបញ្ហាពន្ធគយ​ មិនគួរបង្កផលប៉ះពាល់ដល់សេដ្ឋកិច្ចនៃប្រទេសជាសមាជិកណាមួយ​ឡើយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

មេដឹកនាំម៉ាឡេស៊ី ដែល​ជាប្រធាននៃ​អាស៊ាន​ឆ្នាំនេះ បាននិយាយថា ​ក្រុមមេដឹកនាំបាន​ព្រមព្រៀងគ្នាក្នុងអំឡុង​កិច្ចប្រជុំកំពូលអាស៊ាននៅទីក្រុងគូឡា​ឡាំពួរថា កិច្ចព្រមព្រៀងណាមួយដែលបានចរចាជាមួយ​អាមេរិក ត្រូវតែធានាការការពារផលប្រយោជន៍នៃតំបន់ទាំងមូល​។

គួរគូស​បញ្ជាក់ថា កិច្ចប្រជុំអាស៊ាន​ធ្វើឡើងចំពេលមាន​ការប្រែប្រួលទីផ្សារពិភពលោក ​​​កំណើនយឺតយ៉ាវនៃសេដ្ឋកិច្ចសកល​ និងភាពមិនប្រាកដប្រជាជុំវិញសង្គ្រាមពាណិជ្ជកម្ម ក្រោមគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ រួមទាំងពន្ធគយបដិការ។ ​

ប្រទេសនៅអាស៊ីអាគ្នេយ៍ ស្ថិតក្នុងចំណោមតំបន់ដែលរងផលប៉ះពាល់ខ្លាំងបំផុត​ ជាមួយ​នឹងអត្រាពន្ឌចន្លោះពី ១០ ទៅ ៤៩ ភាគរយ។ ពន្ធនេះនឹងត្រូវអនុវត្ត ប្រសិនបើ​ការចរចាមិនសម្រេចបាន​មុនថ្ងៃទី ៩ កក្កដា ពោលគឺកាលផុតកំណត់នៃការពន្យារពេល ៩០ ថ្ងៃ របស់លោក ត្រាំ។

លោក អាន់វ៉ា បាន​និយាយទៀតថា៖ «ខណៈបន្តដំណើរការការចរចាទ្វេភាគី​ ការឯកភាពគ្នាបានកើនឡើងថា អាស៊ានគួរតែធ្វើការសម្រេចចិត្តដោយមិនធ្វើឱ្យប៉ះពាល់ដល់ប្រទេសណាមួយឡើយ»។ កាលពីថ្ងៃចន្ទ លោក អាន់វ៉ា បាន​សរសេរលិខិតទៅកាន់លោក​ត្រាំ ដោយស្នើឱ្យមាន​ជំនួបស្ដីពីពន្ធគយអាស៊ាន-អាមេរិក។

​អាស៊ាន ដែលជាតំបន់​មានផលិតផលក្នុងស្រុកសរុបជាង ៣,៨ ទ្រីលាន​ដុល្លារ ​កំពុងស្ថិតនៅក្នុងស្ថានភាព​មិនច្បាស់លាស់ទាក់ទងនឹង​សហរដ្ឋអាមេរិក ដែលជាទីផ្សារដ៏ធំបំផុតសម្រាប់ការនាំចេញ​ និងកំណើនសេដ្ឋកិច្ចរបស់ប្លុក។

ប្លុកដែលមានសមាជិកទាំង ១០ ប្រទេសនេះ កាលពីថ្ងៃអង្គារ បានចេញផ្សាយផែនការយុទ្ធសាស្រ្តរយៈពេល ៥ ឆ្នាំ ដើម្បីធ្វើឱ្យ​ប្រសើរឡើងនូវការធ្វើសមាហរណកម្មសេដ្ឋកិច្ច​។ កិច្ចប្រជុំកាលពីថ្ងៃអង្គារ ក៏បានរួមបញ្ចូលផងដែរនូវការ​ប្រជុំគ្នាផ្នែកសេដ្ឋកិច្ចរបស់មេដឹកនាំអាស៊ាន ជាមួយ​បណ្តាប្រទេសឈូងសមុទ្រ និង​ចិន ដែលតំណាងដោយនាយករដ្ឋមន្ត្រី លី ឈាំង៕

​

​