អាមេរិក និងចិន ព្រមព្រៀងគ្នាលើក្របខ័ណ្ឌបន្ធូរបន្ថយភាពតានតឹងពាណិជ្ជកម្ម

សហរដ្ឋអាមេរិក និងចិន បាន​ព្រមព្រៀងគ្នា​លើក្របខ័ណ្ឌបន្ធូរបន្ថយភាពតានតឹងពាណិជ្ជកម្មចុង​ក្រោយ ដោយ​រួមទាំងការដកការរឹតត្បឹតការនាំចេញរ៉ែកម្ររបស់ចិន និងវិលត្រឡប់ទៅរកអ្វីដែលទ្វេភាគីទាំង២ព្រមព្រៀងគ្នានៅក្រុងហ្សឺណែវ ប្រទេសស្វីស កាលពីខែឧសភា។

ការព្រមព្រៀងគ្នាចុងក្រោយ សម្រេចឡើងក្រោយការចរចាពាណិជ្ជកម្មនៅទីក្រុងឡុងដ៍ (ចក្រភពអង់គ្លេស) រយៈពេល ២ ថ្ងៃ ចន្ទ-អង្គារ ដែល​ដោយចូលរួមដោយ​​​រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick ​និងសមភាគីចិនដឹកនាំដោយ​ឧបនាយករដ្ឋមន្ត្រីចិន លោក ​ He Lifeng ។

លោក Lutnick បានប្រាប់អ្នកយកព័ត៌មាននៅយប់ថ្ងៃអង្គារ​ថា កិច្ចព្រមព្រៀងថ្មីបានបន្ថែមខ្លឹមសារទៅនឹងកិច្ចព្រមព្រៀងទីក្រុងហ្សឺណែវកាលពីខែមុន ដែលមានបំណងបន្ធូរបន្ថយពន្ធសងសឹកគ្នាទៅវិញទៅមកលើស ១០០ ភាគរយ។

ភាពតានតឹងបាន​កើនឡើងជាថ្មី ក្រោយ​ជុំវិញការបន្ត​ការរឹតត្បឹតការនាំចេញរ៉ែកម្ររបស់ចិន ​និងការរឹតត្បឹងការនាំចេញបច្ចេកវិទ្យាសំខាន់ៗរួមទាំងបន្ទះឈីបទំនើបទៅចិន រួមទាំងការចាត់វិធានការបែបរើសអើង ដោយការ​ឈប់ផ្ដល់ទិដ្ឋាការសម្រាប់សិស្សនិស្សិតចិន។

លោក Lutnick បាននិយាយថា កិច្ចព្រមព្រៀង​នៅក្រុងឡុងដ៍ នឹងដកចេញនូវការរឹតបន្តឹងការនាំចេញរបស់សហរដ្ឋអាមេរិកនាពេលថ្មីៗនេះ ប៉ុន្តែមិនបានផ្តល់ព័ត៌មានលម្អិតទេ។ លោកគូសបញ្ជាក់ថា ភាគីរៀងៗខ្លួន នឹង​យកក្របខណ្ឌថ្មី ទៅឱ្យមេដឹកនាំរៀងៗខ្លួន ដើម្បីទទួល​បាន​ការអនុម័ត មុនពេលអនុវត្ត។ ​

នៅក្នុងសន្និសីទកាសែតដាច់ដោយឡែក​ អនុរដ្ឋមន្ត្រីពាណិជ្ជកម្មចិន លោក Li Chenggang ក៏បាននិយាយថា ក្របខណ្ឌពាណិជ្ជកម្មថ្មីត្រូវបានឈានដល់ជាគោលការណ៍ ដែលនឹងត្រូវយកត្រឡប់ទៅមេដឹកនាំអាមេរិក និងចិន​ពិនិត្យមើល ប៉ុន្តែមិនផ្ដល់ព័ត៌មាន​លម្អិតឱ្យជ្រៅជាងនេះទេ។

យ៉ាង​ណា​មិញ លោក Lutnick បាននិយាយថា ការរឹតបន្តឹងរបស់​ចិនលើការនាំចេញ​រ៉ែ​កម្រទៅកាន់សហរដ្ឋអាមេរិក នឹងត្រូវបានដោះស្រាយជាផ្នែក​មួយ​នៃកិច្ចព្រមព្រៀងក្របខ័ណ្ឌចុងក្រោយ៕