ទំនុកចិត្តអ្នកប្រើប្រាស់ថៃធ្លាក់ចុះ ខណៈសេដ្ឋកិច្ចថៃមិនសូវស្រួល

ទំនុកចិត្តរបស់អ្នកប្រើប្រាស់នៅក្នុងប្រទេសថៃ បានធ្លាក់ចុះដល់កម្រិតទាបបំផុតក្នុងរយៈពេល ២៧ ខែ ដែល​បង្កើនក្ដីបារម្ភពី​​ការធ្លាក់ចុះសេដ្ឋកិច្ច​ ខណៈ​​​ប្រទេសថៃបច្ចុប្បន្ន កំពុងរងនូវហានិភ័យផ្សេងៗ​រួមទាំងគោលនយោបាយពន្ធគយរបស់អាមេរិក និងការជាប់គាំងសេដ្ឋកិច្ចក្នុងស្រុក។ នេះបើតាមការចុះផ្សាយរបស់កាសែត The Nation។

សន្ទស្សន៍ទំនុកចិត្តអ្នកប្រើប្រាស់ (CCI) បានធ្លាក់ចុះពី ៥៥,៤ ពិន្ទុ នៅខែមេសា មកត្រឹម ៥៤,២ ពិន្ទុ នៅខែឧសភា​ ដែលជាការធ្លាក់ចុះប្រចាំខែទី៤ជាប់ៗគ្នា​។ នេះបើយោងតាមការស្ទង់មតិទូទាំងប្រទេសលើ​ប្រជាជន ២ ២៤២ នាក់ ដែល​ធ្វើឡើងដោយ​​សាកលវិទ្យាល័យសភាពាណិជ្ជកម្មថៃ (UTCC)។

សន្ទស្សន៍​នេះ ស្ថិតនៅចំណុចទាបបំផុតចាប់តាំងពីខែមីនា ឆ្នាំ ២០២៣ ជាមួយនឹងសូចនាករសេដ្ឋកិច្ចសំខាន់ៗផ្សេងទៀត ក៏ជួបប្រទះនឹងការធ្លាក់ចុះ​ផងដែរ។ សន្ទស្សន៍ទំនុកចិត្តសេដ្ឋកិច្ចថៃសរុប បានធ្លាក់ចុះដល់ ៤៨,១ ពិន្ទុ ខណៈ​សន្ទស្សន៍ទំនុកចិត្តឱកាសការងារ បានធ្លាក់ចុះមកត្រឹម ៥១,៩ ពិន្ទុ​ ហើយ​សន្ទស្សន៍ទំនុកចិត្តប្រាក់ចំណូលនាពេលអនាគត បានធ្លាក់ចុះដល់ ៦២,៧ ពិន្ទុ។ ​ ​

អ្នកជំនាញថៃ​បាន​លើកឡើងថា ការធ្លាក់ចុះទាំងនេះបណ្ដាលមកពីក្ដីបារម្ភរបស់ពលរដ្ឋថៃ ពាក់ព័ន្ធនឹង​គោលនយោបាយ​របស់សហរដ្ឋអាមេរិក​ ដែលអាចដាក់ពន្ធគយបដិការ ៣៦ ភាគរយ លើទំនិញថៃ ខណៈដែលអ្នកប្រើប្រាស់ថៃ​លើកឡើងពីការស្ទុះងើបឡើងវិញយឺតយ៉ាវនៃសេដ្ឋកិច្ចរបស់ប្រទេស និងភាពលំបាកក្នុងការទទួលបាន​ឥណទានជាដើម។

ថ្មីនេះៗ ធនាគារពិភព​លោក​បានព្យាករថា សេដ្ឋកិច្ចថៃនឹងបន្តដើរអូសជើង​ដោយ​កើនឡើងត្រឹម ១,៨ ភាគរយ ប៉ុណ្ណោះ ខណៈសេដ្ឋកិច្ចវិទូព្រមានពីវិបត្តិបរិត្តផរណា ដែលញាំញីដោយ​បំផុលគ្រួសារខ្ពស់ កម្សោយតម្រូវការក្នុងស្រុក និងកម្សោយផលិតកម្ម ដែលរងការប្រកួតប្រជែងកាន់តែខ្លាំងពីលំហូរទំនិញពីចិនជាដើម​៕