ព័ត៌មានអន្ដរជាតិ

តម្លៃប្រេងអន្តរជាតិកើនឡើង ដោយសុទិដ្ឋិនិយមនៃការចរចាពន្ធ

បានផុស

១២ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

តម្លៃប្រេងអន្តរជាតិ បានបន្តកើនឡើងនៅពេលបើកការជួញដូរនៅថ្ងៃអង្គារនេះ ដោយសារតែសុទិដ្ឋិនិយមនៃសកម្មភាពសេដ្ឋកិច្ចនាពេលខាងមុខ ក្រោយសហរដ្ឋអាមេរិក និងសហភាពអឺរ៉ុប (EU) សម្រេចបានកិច្ចព្រមព្រៀងពាណិជ្ជកម្មកាលពីថ្ងៃអាទិត្យ រួមជាមួយកត្តាផ្សេងៗទៀត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងម៉ាក Brent បានកើនឡើង ២៤ សេន ឬ ០,៣៤ ភាគរយ ដោយជួញដូរនៅតម្លៃ ៧០,២៨ ដុល្លារ/បារ៉ែល នៅព្រឹកថ្ងៃអង្គារនេះ ខណៈប្រេងអាមេរិកម៉ាក West Texas Intermediate (WTI) បានកើនឡើង ២២ សេន ឬ ០,៣៣ ភាគរយ ដោយជួញដូរនៅតម្លៃ ៦៦,៩៣ ដុល្លារ/បារ៉ែល។

តម្លៃប្រេងទាំង២ បានកើនឡើងជាង ២ ភាគរយ ពេលបញ្ចប់ការជួញដូរកាលពីថ្ងៃចន្ទ។

កំណើនតម្លៃប្រេងនាពេលនេះ កើតឡើងក្រោយអាមេរិកព្រមព្រៀងដាក់ពន្ធ ១៥ ភាគរយ លើទំនិញ EU ដែលធ្វើឱ្យវិនិយោគិនមើលឃើញពីសុទិដ្ឋិនិយមនៃសកម្មភាពសេដ្ឋកិច្ចពីប៉ូលសេដ្ឋកិច្ចរបស់ពិភពលោកទាំង២។

កំណើនក៏ជំរុញផងដែរ ដោយសារតែការចរចាពាណិជ្ជកម្មជាថ្មីរវាងចិន និងសហរដ្ឋអាមេរិក កាលពីថ្ងៃចន្ទ ហើយរំពឹងបន្តមកដល់ថ្ងៃអង្គារនេះ។ ជំនួបដែលធ្វើឡើងនៅប្រទេសស៊ុយអែតនេះ គ្រោងសម្រេចលើការពន្យារពេលមិនអនុវត្តពន្ធខ្ពស់ ចាប់ពីពាក់កណ្ដាលខែសីហា ពោលគឺពេលដែលការព្រមព្រៀងចាស់ផុតសុពលភាព។

ទន្ទឹមនឹងនោះ លោក ត្រាំ ឯណោះវិញ បានដាក់កំណត់ឱ្យរុស្ស៊ីបង្កើតវឌ្ឍនភាពបញ្ចប់សង្រ្គាមឈ្លានពានអ៊ុយក្រែនក្នុងរយៈពេលពី «១០ ឬ ១២ ថ្ងៃ» បើមិនដូច្នោះទេ លោកនឹងបន្ថែមទណ្ឌកម្មធ្ងន់ធ្ងរលើរុស្ស៊ី និងប្រទេសទិញប្រេងរុស្ស៊ី។ រុស្ស៊ីគឺជាប្រទេសផ្គត់ផ្គង់ប្រេងដ៏ធំរបស់សកល បែបនេះទើបធ្វើឱ្យតម្លៃប្រេងអាចកើនឡើង ប្រសិនបើមានការរាំងស្ទះណាមួយ៕