ព័ត៌មានជាតិ

កសិករក្រុមថ្មី ៧០ គ្រួសារបន្ថែមទៀតនៅខេត្តកំពង់ធំ ចូលជាសហគមន៍កសិកម្មទំនើប

បានផុស

១២ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

កសិករក្រុមថ្មីចំនួន ៧០ គ្រួសារបន្ថែមទៀត នៅឃុំសានគរ ស្រុកកំពង់ស្វាយ ខេត្តកំពង់ធំ ស្ម័គ្រចិត្តចូលរួមជាមួយសហគមន៍កសិកម្មទំនើប។ នេះបើតាមការបញ្ជាក់ឱ្យដឹងពីលោក ឃឹម ហ្វីណង់ អ្នកនាំពាក្យក្រសួងកសិកម្មនៅព្រឹកថ្ងៃទី៣០ ខែកក្កដា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើបណ្តាញទំនាក់ទំនងសង្គមផ្លូវការ លោក ឃឹម ហ្វីណង់ បានលើកឡើងថា ចាប់ផ្តើមបន្តការងារសហគមន៍នៅតាមមូលដ្ឋានឡើងវិញ ដើម្បីឱ្យទាន់ការបង្កបង្កើនផលរដូវកាលថ្មី។ មិនថាស្ថានការណ៍នៅតាមព្រំដែនបែបណាទេ ការដោះស្រាយជីវភាពប្រចាំថ្ងៃរបស់ប្រជាកសិករនៅតែចាំបាច់ ជាពិសេសការបន្តនិរន្តភាពនៃផលិតកម្មស្បៀងក្នុងកាលៈទេសៈបែបនេះ។

ជាក់ស្តែងកសិករក្រុមថ្មីចំនួន ៧០ គ្រួសារ ជាមួយនឹងផ្ទៃដីជាង ១០០០ហិកតា នៅឃុំសានគរ ស្រុកកំពង់ស្វាយ ខេត្តកំពង់ធំ ស្ម័គ្រចិត្តចូលរួមជាមួយសហគមន៍កសិកម្មទំនើប ដោយចំណុះឱ្យសហគមន៍«អភិវឌ្ឍន៍ដំណាំស្រូវកំពង់ធំ» ដែលជាសហគមន៍មានស្រាប់នៅក្នុងស្រុកតែមួយ ធ្វើឱ្យសហគមន៍ទំនើបមួយនេះនឹងមានផ្ទៃដីលិតកម្មកើនដល់ចន្លោះពី ៣០០០-៤០០០ហិកតា ក្នុងរដូវកាលថ្មី សម្រាប់ផលិតកម្មស្រូវស្រង៉ែស្រាល និងស្រូវសែនក្រអូប។

សហគមន៍កសិកម្មទំនើបអភិវឌ្ឍន៍ដំណាំស្រូវកំពង់ធំ ត្រូវបានចុះបញ្ជីសហគមន៍នៅថ្ងៃទី២៥ ខែមិនា ឆ្នាំ២០២៥ កន្លងទៅនេះ ដោយមានសមាជិកប្រមាណ ៣១២គ្រួសារ មានផ្ទៃដីកសិកម្មសរុបប្រមាណ ៤២១១ហិតា។

ជាមួយគ្នានេះដែរ បើគិតពីចំនួនសហគមន៍កសិកម្ម និងសហគមន៍កសិកម្មទំនើបទាំងអស់នៅប្រទេសកម្ពុជា គិតត្រឹមខែមិថុនា ឆ្នាំ២០២៥ នេះ មានចំនួនសរុបប្រមាណ ១ ៤៣០ សហគមន៍ ដែលមានកសិករសមាជិកសរុបចំនួន ១៩៣ ៨៨៩នាក់ ដែលក្នុងនោះ មានសមាជិកជានារីចំនួន ១១៤ ០៣០នាក់ និងមានដើមទុនសរុបចំនួនប្រមាណ ១០៦ ៨៦៩ ០៤៤ ៨៩៥ រៀល៕