ធនាគារកណ្ដាលថៃកាត់អត្រាការប្រាក់ ខណៈសេដ្ឋកិច្ចបន្តដុនដាប

ធនាគារកណ្ដាលថៃបាន​សម្រេច​កាត់បន្ថយអត្រាការប្រាក់ ដោយ​លើកឡើងពីហានិភ័យនៃសេដ្ឋកិច្ច និងភាពងាយរងគ្រោះរបស់សហគ្រាសធុនតូច និងមធ្យម ចំពេលដែល​ស្ថានភាព​សេដ្ឋកិច្ចរបស់ប្រទេសបន្តដុនដាបដោយ​បញ្ហាប្រឈម​​ផ្សេងៗ។

តាមការចុះផ្សាយរបស់កាសែត The Nation គណៈកម្មាធិការគោលនយោបាយរូបិយវត្ថុថៃ (MPC) នៃធនាគារកណ្ដាល​ថៃ បានបោះឆ្នោតជាឯកច្ឆ័ន្ទដើម្បីកាត់បន្ថយអត្រាការប្រាក់គោលនយោបាយ ០,២៥ ភាគរយ មកត្រឹម ១,៥០ ភាគរយ។ ​

អត្រាថ្មីនេះចូលជាធរមាន​ភ្លាមៗ។ លេខាធិការ​ MPC លោក Sakkapop Panyanukul បានប្រកាសពីការសម្រេចចិត្តកាលពីថ្ងៃពុធ ដោយ​និយាយថា ខណៈសេដ្ឋកិច្ចថៃ​រំពឹងថានឹង​កើនឡើង ប៉ុន្តែយឺតយ៉ាវ ដូចការព្យាករទុកសម្រាប់ឆ្នាំ ២០២៥ និង ឆ្នាំ ២០២៦ វិធានការពន្ធថ្មីរបស់សហរដ្ឋអាមេរិក​នឹង​បង្កផលប៉ះពាល់ដល់រចនាសម្ព័ន្ធសេដ្ឋកិច្ច និងការប្រកួតប្រជែងរបស់ថៃ។​

ចំណាត់ការរបស់គណៈកម្មាធិការ​ ​មានគោលបំណងបង្កើតបរិយាកាសរូបិយវត្ថុដែល «មានផាសុកភាព» បន្ថែមទៀត ដើម្បីជួយអាជីវកម្មថៃឱ្យ​សម្របខ្លួន និងបន្ធូរបន្ថយបន្ទុកហិរញ្ញវត្ថុលើក្រុមដែលងាយរងគ្រោះ។

គួរគូសបញ្ជាក់ថា សេដ្ឋកិច្ចថៃបាន​ញំញីទៅដោយ​បញ្ហា​ប្រឈមផ្សេងៗរួចទៅហើយ​ ​រួមទាំងបំណុលគ្រួសារខ្ពស់ ពន្ធគយរបស់សហរដ្ឋអាមេរិក វិបត្តិទេសចរណ៍ ព្យុះនយោបាយក្នុងស្រុក និងចុងក្រោយ​បំផុតគឺភាពតានតឹងព្រំដែនជាមួយកម្ពុជា។ ការណ៍ទាំងអស់នេះ បាន​ជះឥទ្ធិពលលើដំណើរការអាជីវកម្មថៃ រួមទាំងការបិទទ្វាររោងចក្រឬអាជីវកម្ម ហើយ​ប៉ះពាល់ដល់ការងារ និងទំនុកចិត្តវិនិយោគិន៕