ព័ត៌មានអន្ដរជាតិ

ត្រាំ៖ អាមេរិកគ្មានគម្រោងបន្ថែមពន្ធលើចិន ដោយសារទិញប្រេងរុស្ស៊ីឥឡូវទេ

បានផុស

១១ ខែ មុន

នៅ

ថ្ងៃសៅរ៍ ១៦ សីហា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃសុក្រថា សហរដ្ឋអាមេរិកគ្មានគម្រោងដាក់ពន្ធពិន័យលើប្រទេសចិន ចំពោះការទិញប្រេងរុស្ស៊ីនោះទេ ភ្លាមៗនាពេលនេះ ប៉ុន្តែអាចនឹងសម្រេចលើបញ្ហានេះក្នុងរយៈពេល ២-៣ សប្ដាហ៍ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោកបានថ្លែងក្នុងបទសម្ភាសន៍មួយជាមួយទូរទស្សន៍ Fox News ក្រោយជំនួបជាមួយមេដឹកនាំរុស្ស៊ីលោក វ្ល៉ាឌីមៀរ ពូទីន នៅរដ្ឋអាឡាស្កា យ៉ាងដូច្នេះថា៖ «ដោយសារតែអ្វីដែលកើតឡើងនៅថ្ងៃនេះ ខ្ញុំមិនគិតថា ខ្ញុំគួរតែគិតលើរឿងនោះទេ»។ លោកឆ្លើយទៅនឹងសំណួរថាតើលោកនឹងដាក់ពន្ធលើចិនចំពោះការទិញប្រេងរុស្ស៊ីឬយ៉ាងណា។

លោក ត្រាំ បានបន្តយ៉ាងដូច្នេះថា៖ «ឥឡូវនេះ ខ្ញុំប្រហែលជាត្រូវគិតអំពីវាក្នុងរយៈពេល២សប្តាហ៍ ឬ ៣ សប្តាហ៍ ឬអ្វីមួយ ប៉ុន្តែយើងមិនចាំបាច់គិតអំពីវាឥឡូវនេះទេ។ ខ្ញុំគិតថា អ្នកដឹងហើយ កិច្ចប្រជុំ(ជាមួយពូទីន) បានដំណើរការយ៉ាងល្អ»។

គួរគូសបញ្ជាក់ថា លោក ត្រាំ បានគំរាមដាក់ពន្ធលើប្រទេសណាដែលទិញប្រេងរុស្ស៊ី ដើម្បីជាគំនាបឱ្យរុស្ស៊ីបញ្ឈប់ការឈ្លានពានអ៊ុយក្រែន។ កាលពីសប្ដាហ៍មុន លោកបានដំឡើងពន្ធលើឥណ្ឌាដល់ ៥០ ភាគរយ ខណៈមានចម្ងល់ថាលោកនឹងដាក់ពន្ធលើចិន ដែលជាអតិថិជនប្រេងដ៏ធំរបស់រុស្ស៊ីដែរឬយ៉ាងណា។

មកទល់ពេលនេះ លោក ត្រាំ និងចិន មិនទាន់ដោះស្រាយគ្នារួចស្រេច លើសង្រ្គាមពាណិជ្ជកម្មពន្ធគយ ដែលផ្ទុះឡើងកាន់តែខ្លាំងនៅដើមខែមេសា ក្រោយលោក ត្រាំ ប្រកាសពន្ធគយបដិការ នៅឡើយទេ៕