ការហោះហើរសាកល្បងនៅអាកាសយានដ្ឋានអន្តរជាតិតេជោ នឹងធ្វើឡើងម្ដងទៀត​នៅ​ដើម​ខែកញ្ញា

ការហោះហើរសាកល្បងរបស់អា​កាស​យានដ្ឋានអន្តរជាតិតេជោ នឹងរៀបចំធ្វើឡើងម្ដងទៀតនៅ​​ដើមខែកញ្ញា ឆ្នាំ ២០២៥ ខាងមុខនេះ មុនពេលបើកដំណើរការអាជីវកម្មនៅថ្ងៃទី ០៩ ខែកញ្ញា ឆ្នាំ ២០​២៥។

ការ​​​​ហោះហើរសាកល្បងលើកដំបូង​នៅអាកាស​យានដ្ឋាន​អន្តរ​​​​​ជាតិតេជោបានធ្វើឡើង​ម្ដងរួច​មកហើយ កាលពីថ្ងៃទី ១៥ ខែសីហា ឆ្នាំ ២០២៥ ជាមួយនឹងលទ្ធផលដំណើរការជោគជ័យ។

លោកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) មាន​​​ប្រសាសន៍ថា៖« យើងនឹងមានការធ្វើតេស្តធំមួយទៀត នៅដើមខែកញ្ញា ដោយប្រើយន្ត​ហោះ​ធំពីររបស់ក្រុមហ៊ុនសិង្ហបុរី និង Air Cambodia»។

អាកាសយានដ្ឋានអន្តរជាតិតេជោ លំដាប់ 4F តម្លៃ ២ ពាន់លានដុល្លារ នឹងដាក់ឱ្យដំណើរ​ការ​នៅ​ថ្ងៃទី ០៩ ខែកញ្ញា ឆ្នាំ ២០២៥។ អាកាសយានដ្ឋានអន្តរជាតិតេជោសាងសង់ឡើងដោយកូនខ្មែរ ដែលបានអភិវឌ្ឍចំណុច​ពិសេស​ជា​ច្រើន ដោយ​ការរចនាដំបូលអាគារមានរាងជាអង្រុត និងបំពាក់បច្ចេកវិទ្យា​ទាញ​យក​ពន្លឺ​ពីខាងក្រៅ ដើម្បីសន្សំសំចៃថាមពល។

គម្រោងវិនិយោគអាកាសយានដ្ឋានអន្តរជាតិតេជោលំដាប់ 4F មានផ្ទៃដីទំហំ ២ ពាន់ ៦០០ ហិកតា មាន ៣ ដំណាក់កាល ដំណាក់កាលទី១ តម្លៃ ២ ពាន់លានដុល្លារ​បានបញ្ចប់ការសាង​សង់ទាំង​ស្រុង នឹងត្រៀមបើក​ដំណើរ​ការនៅ​ថ្ងៃទី ០៩ ខែកញ្ញា ឆ្នាំ ២០២៥ ដែលអាចដឹកអ្នកដំណើរ ១៣ លាននាក់។

ដំណាក់កាលទី២ នឹងទទួលអ្នកដំណើរ ៣០ លាននាក់ក្នុងមួយឆ្នាំ និងដំណាក់​កាល​ទី៣ នៅឆ្នាំ ២០៥០ នឹងទទួលអ្នកដំណើរ ៥០ លាននាក់ក្នុងមួយឆ្នាំ៕

អត្ថបទ៖ ឡេង ដេត