កម្ពុជាប្ដេជ្ញាចិត្តក្នុងកិច្ចព្រមព្រៀងអាសិប ដើម្បីធ្វើពិពិធកម្មសេដ្ឋកិច្ច

មន្រ្តីជាន់ខ្ពស់របស់រដ្ឋាភិបាលបានលើកឡើងថា កម្ពុជាទទួលបានកំណើនពាណិជ្ជកម្មពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ហើយនិងពង្រីកតួនាទីរបស់ខ្លួនជាមជ្ឈមណ្ឌលផលិតកម្ម និងកសិផល​កែច្នៃ​ក្នុង​តំបន់។

លោក សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធាន​គណៈ​កម្មាធិ​ការ​​ផ្តល់​យោបល់លើគោលនយោបាយពាណិជកម្ម បានចូលរួមវេទិកាធុរកិច្ចអូស្ត្រាលី-អាស៊ាន​ឆ្នាំ​២០២៥ ក្នុងអំឡុងពេល ៥ ថ្ងៃ (២៣-២៨) ខែសីហា ឆ្នាំ ២០២៥ នៅទីក្រុងអាដែលឡែត ប្រទេសអូស្ត្រាលី។

វេទិកាឆ្នាំនេះបានផ្តោតលើការជំរុញកិច្ចសហការ ការវិនិយោគ និងភាពច្នៃប្រឌិតក្នុងវិស័យសំខាន់ៗ ដែលមានសារៈ​សំ​ខាន់​ចំពោះការរីកចម្រើនប្រកបដោយចីរភាពរួមមាន ថាមពលកកើតឡើងវិញ​ និងសេដ្ឋកិច្ចបៃតង ការផ្លាស់ប្តូរ ឌីជីថលនិងបញ្ញាសិប្បនិម្មិត (AI) កសិកម្ម និងសន្តិសុខស្បៀង ធនធានមនុស្ស និងការអភិវឌ្ឍជំនាញ ពាណិជ្ជកម្ម និងការវិនិយោគ និងការពង្រឹងសមត្ថភាព​សហគ្រាសធុនមីក្រូ តូច និងមធ្យម។

លោកបណ្ឌិតសភាចារ្យបានផ្តល់កិត្តិយសថ្លែងសុន្ទរកថាគន្លឹះស្តីពី៖ «ការជំរុញរបៀបវារៈចីរភាអាស៊ាន» ដោយបានលើកឡើងអំពីសារៈសំខាន់ជាយុទ្ធសាស្ត្រ​មួយរបស់កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលជាកិច្ចព្រមព្រៀងពាណិជ្ជកម្មសេរីដ៏ធំបំផុតនៅក្នុងពិភពលោក និងជាកម្លាំងស្ថិរភាព​មួយដែលបង្រួបបង្រួម សេដ្ឋកិច្ច​ដែលមានភាពចម្រុះ ក៏ដូចជាបំពេញបន្ថែម​កិច្ចព្រមព្រៀងដែលមានស្តង់ដារខ្ពស់ដូចជាកិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក និងពង្រឹងភាពរឹងមាំទៅនឹងសម្ពាធភូមិសាស្ត្រនយោបាយ។

លោកបណ្ឌិតសភាចារ្យបានសង្កត់ធ្ងន់លើអត្ថប្រយោជន៍របស់កិច្ចព្រមព្រៀងអាសិប សម្រាប់​ប្រទេសអភិវឌ្ឍន៍ដែលជា សមាជិក និងដែលកំពុងអភិវឌ្ឍន៍ ដោយកត់សម្គាល់ថា កម្ពុជា​បាន​ទទួលកំណើនពាណិជ្ជកម្មដ៏សំខាន់រួចហើយពីកិច្ចព្រមព្រៀងនេះ ហើយនឹងពង្រីកតួនាទី​របស់​ខ្លួនជាមជ្ឈមណ្ឌលផលិតកម្ម និងកសិផលកែច្នៃក្នុងតំបន់ផងដែរ។

លោកបណ្ឌិតសភាចារ្យ ក៏បានបញ្ជាក់សារជាថ្មីអំពីការប្តេជ្ញាចិត្តរបស់​កម្ពុជាក្នុងកិច្ចព្រមព្រៀង​អាសិប ដែលអាចផ្តល់ផលប្រយោជន៍យុទ្ធសាស្ត្រ ក្នុងរយៈ ពេលវែង ដើម្បីធ្វើពិពិធកម្មសេដ្ឋកិច្ច និងធានាបាននូវស្ថិរភាពក្នុងតំបន់ ក្នុងភាពមិនប្រាកដប្រជាជាសកល។

លើសពីនេះទៀត លោកបណ្ឌិតសភាចារ្យ បានដឹកនាំកិច្ចពិភាក្សាកម្រិតខ្ពស់ស្តីពី៖ “ការពង្រឹងវិបុលភាព៖ តួនាទីអាស៊ានក្នុងការដាក់បញ្ចូល កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ដើម្បីធ្វើឱ្យទំនាក់ទំនងរបស់អូស្ត្រាលីជាមួយនឹងទ្វីបអាស៊ី កាន់តែស៊ីជម្រៅ» ដោយបានបាន​លើក​ឡើងអំពីការរួមចំណែកយ៉ាងសកម្មរបស់កម្ពុជាក្នុងការជំរុញភាពជាកណ្តាលរបស់ អាស៊ាន និង​ជំរុញខ្សែសង្វាក់ផ្គត់ផ្គង់ក្នុងតំបន់ដែលមានភាពធន់ ចម្រុះ និងនិរន្តរភាព៕