សេដ្ឋកិច្ច

CRF៖ កម្ពុជានាំចូលអង្ករដំណើបតិចតួច សម្រាប់បំពេញតម្រូវការពេលបុណ្យទាន

បានផុស

៨ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

លោកឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា បានបញ្ជាក់ឱ្យដឹងថា ពាក់ព័ន្ធបញ្ហាតម្រូវការអង្ករដំណើបនៅក្នុងស្រុកកន្លងមកដោយសារតែមានការខ្វះខាតពេលរដូវបុណ្យទានផ្សេងៗ កម្ពុជាក៏មានការនាំចូលប្រភេទអង្ករដំណើបពីប្រទេសជិតខាងខ្លះៗដែរ ដូចជាប្រទេសវៀតណាម ថៃ ឡាវ ជាដើម ប៉ុន្តែការនាំចូលនេះមានចំនួនតិចតួចប៉ុណ្ណោះ គឺសម្រាប់តែបម្រើឱ្យតម្រូវការពេលមានបុណ្យទានប៉ុណ្ណោះ។

ពាក់ព័ន្ធនឹងការនាំចូលអង្ករដំណើបពីខាងក្រៅ លោក ឧកញ៉ា ឡាយ ឈុនហួរ ប្រាប់កម្ពុជាថ្មីនៅថ្ងៃទី ០៣ ខែកញ្ញា ឆ្នាំ ២០២៥ថា បញ្ហានេះនៅពេលដែលសហព័ន្ធស្រូវអង្ករកម្ពុជាបានសិក្សាយ៉ាងច្បាស់លាស់ ឃើញថាអង្ករដំណើបនោះគឺនាំចូលពីប្រទេសឡាវ ហើយតាមរយៈសំបកកញ្ចប់នោះ គឺទិញចូលពីក្រុមហ៊ុន IDP របស់ប្រទេសឡាវ។

យ៉ាងណាមិញ ពាក់ព័ន្ធនឹងអង្ករដំណើបនេះដែរ ប្រធានសហព័ន្ធរូបនេះ បានឱ្យដឹងដែរថា ខ្មែរយើងក៏មានការបង្កើតជាម៉ាកសញ្ញាមួយដែលមានឈ្មោះថា DSMK ដែលជាប្រភេទពូជមួយឈ្មោះ «ស្បែកមង្គល» ក៏ប៉ុន្តែការដាំដុះប្រភេទពូជនេះ គឺនៅមានកម្រិតនៅឡើយ ហើយប្រជាកសិករក៏នៅមិនទាន់មានការដាំដុះបានទូលំទូលាយ ដោយសារតែដំណើបស្បែកមង្គលនេះ ជាប្រភេទពូជប្រកាន់រដូវ ធ្វើការដាំដុះតែ ១ឆ្នាំម្តងតែប៉ុណ្ណោះ។

«ចំពោះពូជប្រភេទនេះដែរ កសិករអាចដាំដុះនៅក្នុងរង្វង់ខែឧសភា-មិថុនា ហើយអាចប្រមូលផលនៅក្នុងចុងខែតុលា ឬខែវិច្ឆិកា ការដាំដុះនេះ ក៏មិនទាន់ជាភាពទូលំទូលាយដែរ ដោយបច្ចុប្បន្ននេះ ប្រជាកសិករអាចមានដាំដុះនៅលើផ្ទៃដីក្នុងរង្វង់ប្រហាក់ប្រហែលជាក្រោម ១ ពាន់ហិតា តែប៉ុណ្ណោះ»។ លោក ឧកញ៉ា បន្ថែមបែបនេះ។

ជាមួយគ្នានេះដែរ លោកឧកញ៉ា ឡាយ ឈុនហួរ ក៏បានគូសបញ្ជាក់ដែរថា ជាក់ស្ដែងមកទល់ពេលបច្ចុប្បន្ន ពូជប្រភេទនេះគឺនៅមិនទាន់មានការនាំចេញនោះទេ ដោយយើងបាននិងកំពុងផ្សព្វផ្សាយ និងពង្រីកទីផ្សារបន្តសម្រាប់ប្រភេទពូជដំណើប «ស្បែកមង្គល» នេះ ដោយសារតែវាជាប្រភេទពូជល្អ និងជាពូជប្រណិតរបស់កម្ពុជា។

លោក ឧកញ៉ា បានអះអាងដែរថា សម្រាប់តម្រូវការអង្ករដំណើបនៅក្នុងប្រទេសកម្ពុជាក៏មានទៅតាមរដូវដូចគ្នាដែរ គឺអាចមានតម្រូវការខ្ពស់សម្រាប់រដូវបុណ្យទាន ដូចជាបុណ្យភ្ជុំ ឬក៏ចូលឆ្នាំជាដើម គឺកម្ពុជាមានភាពខ្វះខាត ដោយសារតែរដូវនេះផុតពីរដូវច្រូតកាត់យូរ ណាមួយរដូវភ្ជុំ គឺស្ថិតនៅក្នុងខែកញ្ញា ប៉ុន្តែសម្រាប់រដូវច្រូតកាត់ប្រភេទពូជស្បែកមង្គលនេះ គឺឈានចូលមកដល់នៅក្នុងរង្វង់ចុងខែតុលា ដូច្នេះជាហេតុធ្វើឱ្យតម្រូវការអង្ករដំណើបនៅក្នុងស្រុកមានការខ្វះខាត៕