EU មិនទំនងដាក់ពន្ធលើឥណ្ឌា ចិន តាមសំណើរបស់ ត្រាំ ទេ

ទីភ្នាក់ងារសារព័ត៌មាន​រ៉យទ័រ បាន​រាយការណ៍ដោយស្រង់សម្ដីពីប្រភពជាមន្រ្តី​សហភាពអឺរ៉ុប (EU) ថា ប្លុកទំនងមិនដាក់ពន្ធ ១០០ ភាគរយ លើឥណ្ឌា និងចិន ចំពោះការទិញប្រេងរុស្ស៊ី ទៅតាមសំណើរបស់ប្រធានាធិបតីអាមេរិក លោក ដូណាល់ ត្រាំ នោះទេ។

សេចក្ដីរាយការណ៍ចុងក្រោយជុំវិញបញ្ហានេះ ធ្វើឡើងក្រោយ​គណៈប្រតិភូសហភាពអឺរ៉ុប រួមទាំងប្រធានទទួលបន្ទុកការដាក់ទណ្ឌកម្មរុស្ស៊ីរបស់ EU បានធ្វើដំណើរទៅអាមេរិក​ក្នុងសប្តាហ៍នេះ ដើម្បីពិភាក្សាអំពីរបៀបដែលភាគីទាំង​២ អាចសម្របសម្រួលលើការដាក់ទណ្ឌកម្មប្រឆាំងនឹងរុស្ស៊ី ជុំវិញការ​បន្តឈ្លានពានអ៊ុយក្រែន។ ទាំងមន្រ្តីអាមេរិក​ និង EU បាន​ឱ្យដឹងថ្មីៗនេះថា លោក​ ត្រាំ ជំរុញឱ្យ EU ដាក់ទណ្ឌកម្មលើឥណ្ឌា និងចិន ដើម្បីបង្ខំឱ្យរុស្ស៊ីបញ្ចប់សង្រ្គាម ហើយអាមេរិកនឹង​ធ្វើដូចគ្នា ប្រសិនបើ EU ធ្វើវា។​

​ខណៈមិនទាន់មាន​ការអត្ថាធិប្បាយជាផ្លូវការណាមួយពីមន្រ្តីអឺរ៉ុប​មកទល់ពេលនេះ ប្រភព​ជាមន្រ្តីការទូត EU ម្នាក់បាននិយាយយ៉ាងដូច្នេះថា៖ «មិន​មាន​ការពិភាក្សា អំពីលទ្ធភាពនៃការដាក់ពន្ធលើឥណ្ឌា ឬចិននោះទេ»​។

​ផ្ទុយទៅវិញ EU កំពុងត្រៀមបិទបញ្ចប់ការពិភាក្សាលើ​កិច្ចព្រមព្រៀងពាណិជ្ជកម្មជាមួយឥណ្ឌា ​ហើយប្លុកទំនងជាមិនចង់​ធ្វើឱ្យវារងផលប៉ះពាល់នោះទេ។

ប្រភព​ពី EU មួយរូបទៀត​ បាននិយាយថា ពន្ធគយ​មានគ្រោះថ្នាក់ ហើយអាចមានលក្ខណៈទូលំទូលាយពេក ​ដូចនេះវាមានភាព​ងាយស្រួលក្នុងការដាក់ទណ្ឌកម្មលើ​អង្គភាពជាក់លាក់ ​ហើយដកចេញវិញប្រសិនបើអង្គភាពទាំងនោះ ដកទំនាក់ទំនងអាជីវកម្មជាមួយរុស្ស៊ី។

បច្ចុប្បន្ននេះ EU គ្រោងនឹងរាប់បញ្ចូលធនាគារនៅ​​នៅក្នុងប្រទេសអាស៊ីកណ្ដាលចំនួន២ ​ទៅក្នុងកញ្ចប់ទណ្ឌកម្មទី ១៩ របស់ខ្លួន ​ហើយរួមទាំងរោងចក្រចម្រាញ់ប្រេងរបស់ចិនផងដែរ។

គួរគូសបញ្ជាក់ថា EU បានដាក់ទណ្ឌកម្មធ្ងន់ធ្ងរលើរុស្ស៊ី ហើយ​ក្នុងកញ្ចប់ទណ្ឌកម្ម​ចុងក្រោយរបស់ខ្លួន​កាលពីខែកក្កដា ប្លុក​បានកំណត់គោលដៅលើធនាគារចិនចំនួន២ និងរោងចក្រចម្រាញ់ប្រេងឥណ្ឌាដ៏ធំមួយផងដែរ។ យ៉ាងណាមិញ ពន្ធគយអាចប្រើក្នុងរបៀបផ្សេងពីនេះ។ ប្រភពការទូត EU បាន​និយាយថា EU ដាក់ពន្ធលុះត្រាតែមានការស៊ើបអង្កេតអស់រយៈពេលជាច្រើនខែ ដើម្បី​ធានាថាមានហេតុផលផ្លូវច្បាប់​រឹងមាំ៕