វៀតណាមបញ្ជាក់​ការប្រើប្រាស់នុយក្លេអ៊ែរ សម្រាប់ការអភិវឌ្ឍប្រកបដោយចីរភាព

វៀតណាមបានបញ្ជាក់​ជាថ្មីនូវការប្តេជ្ញាចិត្ត​ក្នុងកិច្ចសហប្រតិបត្តិការយ៉ាងជិតស្និទ្ធជាមួយទីភ្នាក់ងារថាមពលបរមាណូអន្តរជាតិ (IAEA) ​ដើម្បីប្រើប្រាស់បច្ចេកវិទ្យានុយក្លេអ៊ែរ​ក្នុងគោលបំណងអភិវឌ្ឍន៍​ប្រកបដោយចីរភាព។ នេះបើតាមការចុះផ្សាយរបស់កាសែត Viet Nam News។

ឯកអគ្គរដ្ឋទូត លោក​ Vũ Lê Thái Hoàng តំណាងអចិន្ត្រៃយ៍របស់វៀតណាមប្រចាំនៅអង្គការសហប្រជាជាតិ និងអង្គការអន្តរជាតិនានានៅទីក្រុងវីយែន បាន​លើកឡើងពីការប្តេជ្ញាចិត្តរបស់ប្រទេស​ ក្នុងអំឡុង​សុន្ទរកថា​នៅសម័យប្រជុំពេញអង្គលើកទី ៦៩ នៃសន្និសីទទូទៅរបស់ IAEA ។

លោកបានបន្ថែមថា វៀតណាមសន្យាចូលរួមយ៉ាងសកម្មក្នុងគំនិតផ្តួចផ្តើមអន្តរជាតិដូចជា ZODIAC ស្តីពីការប្រយុទ្ធប្រឆាំងនឹងជំងឺ Zoonotic, គំនិតផ្តួចផ្ដើម NUTEC Plastics ស្តីពីការកាត់បន្ថយមីក្រូផ្លាស្ទិកមហាសមុទ្រ, គំនិតផ្តួចផ្ដើម Atoms4Food លើការលើកកម្ពស់ការផលិត និងសុវត្ថិភាពចំណីអាហារ និង​គំនិតផ្ដួចផ្ដើម Rays of Hope លើការការពារ និងព្យាបាលជំងឺមហារីក ជាដើម។

ដោយកោតសរសើរការងាររបស់ IAEA ក្នុងការលើកកម្ពស់ថាមពលនុយក្លេអ៊ែរដោយសន្តិវិធី លោក Hoang បានកត់សម្គាល់ថា នៅខែវិច្ឆិកា ឆ្នាំមុន រដ្ឋសភាវៀតណាមបានអនុម័តបន្តអភិវឌ្ឍគម្រោងថាមពលនុយក្លេអ៊ែរនៅខេត្ត Ninh Thuận​ ​ក្នុង​គោលបំណងពង្រឹងហេដ្ឋារចនាសម្ព័ន្ធថាមពល ធានាសន្តិសុខថាមពលរយៈពេលវែង ជំរុញវិទ្យាសាស្ត្រ និងបច្ចេកវិទ្យា និងបណ្តុះបណ្តាលកម្លាំងពលកម្មជំនាញ៕