ព័ត៌មានអន្ដរជាតិ

រ៉យទ័រ៖ ចិន ម៉ាឡេស៊ី ចរចាគ្នាលើគម្រោងចម្រាញ់រ៉ែកម្រ

បានផុស

៨ ខែ មុន

នៅ

ថ្ងៃព្រហស្បតិ៍ ២ តុលា ២០២៥

ដោយ

ទីភ្នាក់ងារសារព័ត៌មានរ៉យទ័រ បានរាយការណ៍នៅព្រឹកថ្ងៃព្រហស្បតិ៍នេះ ដោយស្រង់សម្ដីប្រភពមិនបញ្ចេញឈ្មោះ៤នាក់ថា ប្រទេសចិន និងម៉ាឡេស៊ី កំពុងចរចាគ្នាលើគម្រោងចម្រាញ់រ៉ែកម្រ ដោយមូលនិធិវិនិយោគរដ្ឋ Khazanah Nasional របស់ម៉ាឡេស៊ី និងចាប់ដៃគ្នាជាមួយក្រុមហ៊ុនរដ្ឋចិន ដើម្បីបង្កើតរោងចក្រចម្រាញ់នោះនៅម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រសិនបើការបណ្តាក់ទុនរួមគ្នាលើគម្រោងដំណើរការទៅមុខ វានឹងបង្ហាញពីការផ្លាស់ប្តូរគោលនយោបាយដ៏សំខាន់សម្រាប់ចិន។ ក្នុងនាមជាអ្នកផ្គត់ផ្គង់ និងកែច្នៃរ៉ែកម្រឈានមុខគេលើពិភពលោក ចិនបានហាមឃាត់ការនាំចេញបច្ចេកវិទ្យាកែច្នៃរ៉ែកម្ររបស់ខ្លួនទៅប្រទេសផ្សេងៗ ដើម្បីរក្សាអំណាចរបស់ខ្លួនលើពិភពលោកក្នុងឧស្សាហកម្មមួយនេះ។ ការអនុញ្ញាតឱ្យមានក្រុមហ៊ុនបណ្តាក់ទុនរួមគ្នាជាមួយម៉ាឡេស៊ី មានន័យថា ចិនបន្ធូរបន្ថយយុទ្ធសាស្រ្តបែបនេះ។

ប្រភព ២ នាក់ បានប្រាប់រ៉យទ័រថា ចិនត្រៀមរួចរាល់ក្នុងការអនុញ្ញាតឱ្យម៉ាឡេស៊ីប្រើប្រាស់បច្ចេកវិទ្យារបស់ខ្លួនដើម្បីទាញយករ៉ែកម្រដែលមានក្នុងស្រទាប់ផែនដីរបស់ប្រទេសអាស៊ីអាគ្នេយ៍មួយនេះ។ ហើយនេះអាចជាការយកប្រៀបប្រកួតប្រជែងទៅនឹងក្រុមហ៊ុនអូស្ត្រាលី Lynas Rare Earths ដែលមានរោងចក្រចម្រាញ់រ៉ែកម្រនៅភាគកណ្ដាលរដ្ឋ Pahang។

មកទល់ពេលនេះ មិនទាន់មានការបញ្ចេញប្រតិកម្ម ឬព័ត៌មានជុំវិញបញ្ហានេះ ពីភាគីពាក់ព័ន្ធរបស់ម៉ាឡេស៊ី ឬចិននៅឡើយទេ។

ទោះជាយ៉ាងណាក៏ដោយ ប្រភពបានអះអាងថា គម្រោងចម្រាញ់រ៉ែបានប្រឈមមុខនឹងឧបសគ្គជាច្រើន រួមទាំងការព្រួយបារម្ភរបស់ចិន ថាតើម៉ាឡេស៊ីអាចផ្គត់ផ្គង់វត្ថុធាតុដើមគ្រប់គ្រាន់សម្រាប់រោងចក្រដែរឬយ៉ាងណា។

ម៉ាឡេស៊ីឯណោះវិញ ក៏មានការព្រួយបារម្ភផងដែរចំពោះផលប៉ះពាល់បរិស្ថានដែលអាចកើតមាន និងឧបសគ្គផ្លូវច្បាប់ ដោយសារសកម្មភាពរុករករ៉ែជាធម្មតាទាមទារឱ្យមានការយល់ព្រម និងអាជ្ញាប័ណ្ណពីអាជ្ញាធររដ្ឋ និងសហព័ន្ធ។ ម៉ាឡេស៊ីបាននិយាយថា ខ្លួនមិនគាំទ្រការជីកយករ៉ែកម្រនៅក្នុងទីតាំងរសើប ដូចជាតំបន់ព្រៃបម្រុងអចិន្ត្រៃយ៍ និងតំបន់ស្តុកទឹកធម្មជាតិនោះទេ។

គួរគូសបញ្ជាក់ថា ក្រុមហ៊ុនផលិតកម្មសកល ដូចជាក្រុមហ៊ុនផលិតរថយន្តអគ្គិសនី កំពុងប្រជែងគ្នា ដើម្បីទទួលបានការផ្គត់ផ្គង់រ៉ែកម្រ ក្រោយចិនរឹតត្បឹតការនាំចេញរ៉ែកម្រ ដើម្បីឆ្លើយតបទៅនឹងការដាក់ពន្ធរបស់សហរដ្ឋអាមេរិក។

មែនទែនទៅ ម៉ាឡេស៊ីមានស្ដុករ៉ែកម្រចំនួន ១៦,១ លានតោន (តាមការប៉ាន់ស្មានរបស់រដ្ឋាភិបាល) ប៉ុន្តែខ្វះបច្ចេកវិទ្យាដើម្បីជីកយករ៉ែ និងចម្រាញ់វា។ កន្លងមក ម៉ាឡេស៊ីក៏បានហាមក្រុមហ៊ុនផ្សេងៗមិនឱ្យនាំចេញរ៉ែកម្រផងដែរ ដើម្បីកុំឱ្យបានបាត់ធនធានរបស់ខ្លួន៕