បទវិភាគ៖ «តើក្រុមប្រឆាំងជ្រុលនិយមបានបំផ្លាញជាតិបែបណាខ្លះនៅពេលផ្ទុះសង្គ្រាមឈ្លានពានទឹកដី?»

ប្រជាពលរដ្ឋខ្មែរគ្រប់រូបពិតជាបានឃើញច្បាស់នូវទង្វើដែលមិនគួរឱ្យជឿរបស់ក្រុមប្រឆាំងជ្រុលនិយមនៅក្រៅប្រទេសមួយក្តាប់តូច ក្នុងអំឡុងពេលដែលកម្ពុជារងការឈ្លានពានពីប្រទេសថៃ។ ដូច្នេះ សំណួរថា«តើក្រុមនេះបានជួយអ្វីខ្លះដល់ប្រទេសជាតិ?» ពិតជាមិនអាចសួរកើតទេ ប៉ុន្តែសំណួរដែលត្រឹមត្រូវបំផុត គឺ«តើក្រុមប្រឆាំងជ្រុលនិយមទាំងនេះបានបំផ្លាញជាតិខ្លួនឯងបែបណាខ្លះ?»

ពិតណាស់ តើធ្វើនយោបាយដើម្បីអ្វី គឺដើម្បីជួយប្រទេសជាតិ និងប្រជាពលរដ្ឋរបស់ខ្លួនមែនដែរ ឬទេ? ដើម្បីអាចជួយប្រទេសជាតិបាន អ្នកនយោបាយត្រូវធ្វើសកម្មភាព ដើម្បីឱ្យប្រទេសជាតិរីកលូតលាស់ទៅមុខ និងឱ្យប្រជាពលរដ្ឋមានសេចក្តីសុខ និងរស់នៅក្នុងសន្តិភាពយូរអង្វែង។ លើសពីនេះ អ្នកនយោបាយត្រូវចេះបែងចែកអ្វីជារឿងនយោបាយផ្ទៃក្នុង និងអ្វីជានយោបាយការបរទេស ដែលត្រូវទប់ទល់ជាមួយឥទ្ធិពលពីខាងក្រៅ ជាពិសេស ពេលប្រទេសជួបគ្រោះ ដូចជា ការរំលោភបំពានរបស់ថៃមកលើបូរណភាពទឹកដីកម្ពុជាជាដើម។

សម្រាប់នយោបាយថ្នាក់ជាតិ អ្នកនយោបាយប្រកួតគ្នាដើម្បីរកសេចក្តីរីកចម្រើនជូនជាតិ និងប្រជាជន តាមរយៈការដាក់ចេញគោលនយោបាយ និងសកម្មភាពជាក់ស្តែង។ ការរិះគន់គ្នា បើទោះជាពេលខ្លះ មានសភាពខ្លាំងក្លាយ៉ាងណាក៏ដោយ ក៏ជារឿងធម្មតាឱ្យតែក្នុងក្របខណ្ឌនៃការប្រកួតប្រជែងគ្នាផ្នែកគំនិត និងបញ្ញា។ ប៉ុន្តែ ក្រុមប្រឆាំងជ្រុលនិយមដែលមានទណ្ឌិត សម រង្ស៊ី និងគូកនមួយក្តាប់តូច ដូចជា អ៊ុំ សំអាន ជាសេនាធិការ មិនដែលប្រកាន់យកគំនិតនយោបាយបែបជឿនលឿននេះមកអនុវត្តទេ។

ផ្ទុយទៅវិញ ពួកគេបែរជាប្រកាន់យកទស្សនៈនយោបាយចាស់គំរឹល ហួសសម័យ តាមបែបគំនុំសងសឹក ផ្ទាល់ខ្លួនទៅវិញ បើទោះបីជាប្រវត្តិសាស្ត្របង្ហាញថា ទស្សនៈនយោបាយនេះបានបង្កគ្រោះថ្នាក់ធំធេងជាបន្តបន្ទាប់ដល់ប្រទេសជាតិ និងប្រជាពលរដ្ឋក៏ដោយ។ ក្នុងផ្នត់គំនិតរបស់ទណ្ឌិត សម រង្ស៊ី និងបក្ខពួក របស់ខ្លួន គឺមិនមែនធ្វើនយោបាយដើម្បីជាតិទេ តែដើម្បីប្រឆាំងស្លាប់រស់ជាមួយនឹងគណបក្សប្រជាជនកម្ពុជា ដែលមានលោក ហ៊ុន សែន ជាប្រធាន និងលោក ហ៊ុន ម៉ាណែត ជានាយករដ្ឋមន្ត្រី។ នេះជាគោលដៅតែមួយគត់របស់ទណ្ឌិតរូបនេះ បើទោះបីជាគាត់ដឹងថា «នេះគ្រាន់តែជាក្តីស្រមៃដែលមិនអាចទៅរួចក៏ដោយ»។ គំនិតប្រឆាំងងប់ងល់ហួសសម័យនេះ បានបំផ្លាញខ្លួនគាត់បន្តិចម្តងៗ ហើយបានជួយជំរុញឱ្យលោក ហ៊ុន សែន និងគណបក្សប្រជាជនកម្ពុជាកាន់តែមានអំណាចរឹងមាំឡើងជាលំដាប់។

ចំពោះនយោបាយការបរទេសវិញ ជាធម្មតាក្នុងនាមជាខ្មែរ គឺអ្នកនយោបាយត្រូវតម្កល់ផលប្រយោជន៍ជាតិជាធំដោយត្រូវមើលប្រយោជន៍ជាតិឱ្យហួសពីគណបក្សមួយដែលជាគូបក្ខដិបក្ខរបស់ខ្លួន។ ជាក់ស្តែង ក្នុងអំឡុងពេលដែលប្រទេសជាតិរងការរំលោភបំពានប្រដាប់អាវុធដើម្បីដណ្តើមទឹកដី អ្នកនយោបាយទោះជាស្ថិតនៅក្នុងនិន្នាការណាក៏ដោយ ត្រូវតែចេញមុខប្រឆាំងអំពើរំលោភបំពាននោះជាដាច់ខាត ដោយ ទុករឿងប្រកួតប្រជែងផ្ទៃក្នុងមួយឡែកសិន។ ពួកគេត្រូវយល់ថា ការពារជាតិឱ្យបានសិន ទើបមានឱកាសប្រកួតជាមួយគណបក្សនយោបាយផ្សេង។ តែបើជាតិបាត់បង់ ពួកគេគ្មានឱកាសរួមចំណែកជួយជាតិបានទេ។

តើទណ្ឌិត សម រង្ស៊ី និងគូកនមានទស្សនៈបែបនេះទេ? គ្មានទាល់តែសោះ។ ផ្ទុយទៅវិញ ពួកគេបែរជាគិតថា នេះជាឱកាសល្អដែលត្រូវឆ្លៀតរុញបន្ថែម ដើម្បីឱ្យរដ្ឋាភិបាលគណបក្សប្រជាជនកម្ពុជា ពិសេស លោក ហ៊ុន សែន និងលោក ហ៊ុន ម៉ាណែត រងគ្រោះ និងចុះខ្សោយអំណាច។ តែពួកគេភ្លេចគិតថា អ្នកដែលបំពានលើកម្ពុជានោះ គឺមានបំណងចង់បានទឹកដីខ្មែរ និងបំផ្លាញកម្លាំងរស់របស់ជាតិខ្មែរ។ នេះគេហៅថា អ្នកនយោបាយឱកាសនិយម ដោយមិនខ្វល់ពីការបែងចែកស និងខ្មៅ ហើយប្រឹងធ្វើសកម្មភាពទោះបីជាត្រូវដើរបញ្ច្រាសទិសប្រជាជនមួយនគរក៏ដោយ។

ជាក់ស្តែង នៅក្នុងអំឡុងនៃការផ្ទុះសង្គ្រាមដែលរដ្ឋាភិបាលកម្ពុជាមិនចង់ឃើញ ក្រុមទណ្ឌិត សម រង្ស៊ី បានឈរខាងសត្រូវទាំងស្រុង។ ពួកគេអួតសរសើរពីទាហានថៃដែលបំពានទឹកដីខ្មែរថាធ្វើត្រឹមត្រូវ បាញ់ត្រង់ ចំគោលដៅ តាមពាក្យឃោសនារបស់ថៃ បើទោះបីជាពលរដ្ឋខ្មែរស្លូតត្រង់៣១នាក់បានស្លាប់ ជិត១០០នាក់ រងរបួស និងជាង ៦៤ម៉ឺននាក់ត្រូវរត់ភៀសសឹក ដោយសារការទម្លាក់គ្រាប់បែក និងកាំភ្លើងផ្លោងរបស់ទាហានថៃក៏ដោយ។ ពួកគេចោទប្រកាន់រដ្ឋាភិបាលដែលរងគ្រោះដោយសារការរំលោភបំពានថា ជាអ្នកបង្កហេតុដូចពាក្យចោទរបស់ថៃទាំងស្រុង។ ពួកគេឆ្កឹះឆ្កៀល ចាក់រុក ញុះញង់តាមគ្រប់មធ្យោបាយ ដើម្បីឱ្យខ្មែរបែកបាក់ តាមបំណងរបស់សត្រូវ ខណៈដែលខ្មែរត្រូវការការរួបរួមគ្នាជាកម្លាំងដើម្បីការពារបូរណភាព ទឹកដី។

ពួកគេអំពាវនាវឱ្យប្រជាពលរដ្ឋក្រោកឈរប្រឆាំងនឹងអំណាចលោក ហ៊ុន សែន និងលោក ហ៊ុន ម៉ាណែត តាមបំណងចង់បានរបស់សត្រូវ ខណៈដែលប្រជាពលរដ្ឋទាំងក្នុង និងក្រៅប្រទេសបានក្រោកឈរដើម្បីប្រឆាំងការរំលោភបំពានឈ្លានពានទឹកដី និងរួមគ្នាគាំទ្ររាជរដ្ឋភិបាល ថ្នាក់ដឹកនាំ និងវីរកងទ័ពដែល បាន និងកំពុងយកទ្រូងទៅពាំងដើម្បីការពារជាតិ ប្រជាជន និងមាតុភូមិ។ ពួកគេបន្តុះបង្អាប់កងទ័ព និងញុះញង់ឱ្យកងទ័ពបាក់ទឹកចិត្ត ដូចដែលថៃចង់បាន ខណៈដែលជាតិខ្មែរត្រូវការការលើកទឹកចិត្តកងទ័ពដើម្បីប្រយុទ្ធតតាំងយ៉ាងស្វិតស្វាញ ដើម្បីការពារទឹកដី។

នៅពេលដែលរដ្ឋាភិបាលអត់ធ្មត់ដើម្បីបញ្ចៀសសង្គ្រាម ពួកគេស្រែកជេរដោយបង្អាប់ថា រដ្ឋាភិបាលខ្លាចថៃ។ ប៉ុន្តែ នៅពេលដែលបន្ទាត់ក្រហមបានចូលមកដល់ ដែលថ្នាក់ដឹកនាំត្រូវសម្រេចចិត្តប្រើសិទ្ធិការពារខ្លួន ពួកគេបែរជាស្រែកថា ថ្នាក់ដឹកនាំកម្ពុជាជាអ្នកបង្កសង្គ្រាម។ នៅពេលដែលថៃប្រើសង្គ្រាមចិត្តសាស្ត្រ ដោយផ្សាយព័ត៌មានបំផ្លើសបំភ្លៃ ដើម្បីបំបាក់ស្មារតីខ្មែរ ពួកគេជួយបន្ទរឱ្យកាន់តែលឺកងរំពងថែមទៀត។ លើសពីនេះ ពួកគេបានបង្កើតមាតិកានានា ដើម្បីវាយប្រហារ មួលបង្កាច់រដ្ឋាភិបាលកម្ពុជា ដើម្បីបម្រើឱ្យប្រព័ន្ធឃោសនាថៃយកទៅបន្ទរ។

ប្រវត្តិសាស្ត្របង្ហាញថា រាល់ពេលមានការឈ្លានពានពីប្រទេសជិតខាង តែងតែមានអ្នកនយោបាយខ្មែរមួយក្រុម ជួយបំបែកខ្មែរដើម្បីផ្តល់ភាពងាយស្រួលដល់សត្រូវឈ្លានពានតាមរបៀប«ហុចដងដាវឱ្យសត្រូវ»។ ក្រុមអ្នកនយោបាយបែបនេះ មិនទាន់ផុតរលត់នៅឡើយទេមកទល់សម័យទំនើបនេះ។ ដូច្នេះ ប្រជាពលរដ្ឋខ្មែរអាចមើលឃើញហើយថា តើក្រុមអ្នកនយោបាយជ្រុលនិយមដឹកនាំដោយទណ្ឌិត សម រង្ស៊ី បានបំផ្លាញជាតិបែបណា? ហើយតើប្រជាពលរដ្ឋ និងរដ្ឋាភិបាលកម្ពុជា គួរបន្តទុកឱ្យអ្នកនយោ​បាយបែបនេះ មានអស្ថិភាពតទៅទៀតដែរ ឬទេ?

បើតាមមើលនិន្នាការនៃការធ្លាក់ចុះទាបបំផុតនៃការគាំទ្រ គេអាចសន្និដ្ឋានបានថា បន្ទាប់ពីឆ្លងកាត់សង្គ្រាមរំលោភបំពានទឹកដីពីសំណាក់កងទ័ពថៃចុងក្រោយនេះ ក្រុមនយោបាយជ្រុលនិយមមួយនេះ នឹងត្រូវផុតរលត់ពីសង្គមខ្មែរតាមរយៈការផ្តន្ទាទោសរបស់ប្រជាពលរដ្ឋ និងការដាក់ទោសរបស់រដ្ឋាភិបាលតាមច្បាប់ជាធរមាន។ មានពលរដ្ឋខ្មែរជាច្រើនឆ្ងល់ថា តើក្រុមនោះធ្វើនយោបាយដើម្បីអ្វី បើពួកគេក្បត់ប្រយោជន៍ជាតិខ្លួនឯង ហើយដើរបញ្ច្រាសទិសប្រជាពលរដ្ឋបែបនេះ? ដូច្នេះ នយោបាយជ្រុលនិយម និងចង្រៃជាតិមួយនេះ នឹងផុតរលត់ជាក់ជាមិនខាន ដែលជាបច្ច័យនៃទង្វើជួយខ្មាំងសត្រូវ និងបំផ្លាញជាតិ និងប្រជាជនរបស់ខ្លួន៕

ដោយ៖ វង្ស មករា សាស្ត្រាចារ្យនិងជាអ្នកវិភាគសង្គមនយោបាយ