គ្រួសារសពនៅស្ទឹងមានជ័យព្រួយបារម្ភខ្លាចវិជ្ជមានកូវីដមិនបានធ្វើបុណ្យជូនសាច់ញាតិ

គ្រួសារសពបុរសម្នាក់ ស្ថិតនៅក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ កំពុងរង់ចាំលទ្ធផលពីក្រុមគ្រូពេទ្យចុះធ្វើតេស្តពិនិត្យសំណាក។

ជាក់ស្តែងនៅវេលាម៉ោង១០និង៣០នាទីព្រឹកថ្ងៃទី១០ខែមិថុនានេះក្រុមគ្រូពេទ្យមន្ទីរសុខាភិបាលរាជធានីភ្នំពេញបានចុះទៅយកសំណាកសពបុរសម្នាក់ស្ថិតក្នុងសង្កាត់ស្ទឹងមានជ័យទី២ខណ្ឌមានជ័យខណះដែលក្រុមគ្រួសារកំពុងរងចាំមើលលទ្ធផលពីគ្រូពេទ្យពិនិត្យសំណាកថាអាចធ្វើបុណ្យបានឬមិនបានអាស្រ័យដោយគ្រូពេទ្យចេញលទ្ធផលសិន។

លោក សេង វ៉ាន់ថា ចៅសង្កាត់រងទី១ សង្កាត់ស្ទឹងមានជ័យបានឱ្យកម្ពុជាថ្មីដឹងថា រាល់សាកសពទាំងអស់មុនពេលអនុញ្ញាតឱ្យធ្វើបុណ្យតាមប្រពៃណីគឺតម្រូវឱ្យគ្រូពេទ្យមកពិនិត្យសំណាកជាមុន ហើយប្រសិនបើសពរកឃើញវិជ្ជមាន គឺមិនអនុញ្ញាតឱ្យធ្វើបុណ្យឡើយ ព្រោះខ្លាចឆ្លងទៅដល់ក្រុមគ្រួសារព្រមទាំងញាតិមិត្តជិតឆ្ងាយដែលមកចូលរួមក្នុងពិធីបុណ្យសព។

លោក សេង វ៉ាន់ថា បានបញ្ជាក់ទៀតថា កន្លងមកគឺមានសពមួយចំនួនពេលគ្រូពេទ្យពិនិត្យសំណាកឃើញមានវិជ្ជមានកូវីដ១៩គឺគ្រូពេទ្យមិនអនុញ្ញាតឱ្យធ្វើបុណ្យឡើយដោយគ្រូពេទ្យចុះមកវិចខ្ចប់យកទៅបូជាតាមលក្ខណៈបច្ចេកទេសសុខាភិបាល។

ដូច្នេះគ្រួសារសពភាគច្រើនលើសលុបលោកមានការព្រួយបារម្មណ៍ពេលដែលមានសមាជិកក្នុងគ្រួសារទទួលមរណភាពគឺពួកគាត់ភ័យខ្លាចសពមានវិជ្ជមានកូវីដ១៩នោះគឺគ្រួសារខកខានធ្វើបុណ្យដើម្បីជូនដំណើរជាលើកចុងក្រោយនោះ៕ អត្ថបទ៖នរា