ស្ដ្រីម្នាក់ដឹងខ្លួនឆ្លងកូវីដ​​រត់គេពីភ្នំពេញ​​ទៅស្រុកកំណើត​ អាជ្ញា​ធរ​កំពុងតាមប្រមាញ់

អាជ្ញាធរ និងសមត្ថកិច្ច ខណ្ឌមានជ័យ កំពុងតាមប្រមាញ់ស្ដ្រីម្នាក់មានជាប់ពាក់ព័ន្ធជាមួយអ្នកជំងឺកូវីដ១៩ ហើយពុំព្រមនៅព្យាបាល។

លោកស្រី ហួត ឃីម នាយករងរដ្ឋបាលសាលាខណ្ឌមានជ័យ បានឱ្យដឹងថា ស្ត្រីខាងលើរស់នៅបំរើតាមផ្ទះនៅសង្កាត់បឹងទំពន់២ ខណ្ឌមានជ័យ រាជធានីភ្នំពេញ ហើយនៅក្នុងផ្ទះដែលស្ត្រីរូបនេះកំពុងធ្វើការមានឆ្លងជំងឺកូវីដ១៩ ដែលត្រូវគ្រូពេទ្យដឹកយកទៅព្យាបាលនៅសល់តែគាត់ម្នាក់ដែលនឹងត្រូវដឹកយកទៅព្យាបាល​បែរ​ជារត់គេចបាត់កាលពីវេលាទៀបភ្លឺថ្ងៃទី ១០ខែសីហា ដែលគេដឹងថាមកផ្ទះជួល ភូមិដើមចាន់ សង្កាត់ច្បារអំពៅ​ទី២ ខណ្ឌច្បារអំពៅ រាជធានីភ្នំពេញ។

លោកស្រី ហួត ឃីម បានរាយការណ៍មកសាលាខណ្ឌច្បារអំពៅឱ្យជួយឃាត់ទុកព្រោះគាត់មានពាក់ពន្ធ័និងអ្នកជំងឺកូវីដ១៩។

ដោយឡែកអាជ្ញាធរខណ្ឌច្បារអំពៅបានរួសរាន់ផ្តល់ដំណឹងទៅសាលាសង្កាត់ច្បារអំពៅទី២ឱ្យចុះទៅរកស្ត្រីដែលគេចតែលទ្ធផលគឺបានគេចខ្លួនទៅស្រុកកំណើតឯភូមិស្នាញ ឃុំបាទី ស្រុកចន្រ្ទាខេត្តស្វាយរៀងបាត់ទៅហើយ។ ដូច្នេះសូមឱ្យអាជ្ញាធរនៅភូមិឃុំខាងលើជួយឃាត់ទុកផងព្រោះទប់ស្កាត់ជំងឺកូវីដឆ្លងរាលដាលបន្ត។

តាមច្បាប់ស្ត្រីដែលរត់គេចខ្លួនមិនព្រមទៅព្យាបាលជំងឺនិងប្រឈមមុខជាប់ទោសបន្ទាប់ពីរកឃើញហើយព្យា​បាលជំងឺឱ្យជាសះស្បើយសិន៕ ដោយៈ នរា