កូវីដ-១៩

តេស្តសំណាកលើទី៣ លើពលរដ្ឋរស់នៅផ្លូវ៣៥ នៃសង្កាត់ចាក់អង្រែក្រោម លទ្ធិផលអវិជ្ជមានទាំងអស់

បានផុស

៥ years មុន

នៅ

ថ្ងៃសៅរ៍ ២៨ សីហា ២០២១

ដោយ

រាជធានីភ្នំពេញ ៖ នៅវេលាល្ងាចថ្ងៃទី២៨ ខែសីហា ឆ្នាំ២០២១ ក្រុមគ្រូពេទ្យស្ម័គ្រចិត្តសម្តេចតេជោ បានបន្តចុះធ្វើសំណាកជាលើកទី៣ លើបងប្អូនពលរដ្ឋរស់នៅតាមបណ្តោយផ្លូវលេខ៣៥ ស្ថិតក្នុងភូមិព្រែកតាឡុង២ សង្កាត់ចាក់អង្រែក្រោម ខណ្ឌមានជ័យ ដែលបានជាប់ក្នុងការបិទខ្ទប់របស់អាជ្ញាធរ ពាក់ព័ន្ធនឹងវីរុសបម្លែងថ្មី ដែលតា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការតេស្តសំណាកលើកទី៣នេះ បានតេស្តពលរដ្ឋរស់នៅលើផ្លូវខាងលើ សរុប ៦៩នាក់ ហើយជាលទ្ធិផល បញ្ជាក់ថា ពួកគេអវិជ្ជមាននូវ វីរុសបម្លែងថ្មីដែលតា ទាំងអស់គ្នា ។ យ៉ាងណាមិញ គិតត្រឹមល្ងាចថ្ងៃខែដដែលនេះ ក្រុមពលរដ្ឋខាងលើ បានជាប់ក្នុងការបិទខ្ទប់អស់រយៈពេល១៦ថ្ងៃកន្លងទៅហើយ។

គួររំលឹកថា កាលពីថ្ងៃទី២៦ ខែសីហា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្តីសម្រេច បន្តការបិទខ្ទប់បណ្តោយផ្លូវលេខ៣៥ខាងលើ រយះពេល៧ថ្ងៃបន្តទៀត គិតចាប់ពីម៉ោងសូន្យថ្ងៃទី២៧ ខែសីហា ឆ្នាំ២០២១ ដល់ថ្ងៃទី២ ខែកញ្ញា ឆ្នាំ២០២១ ដើម្បីទប់ស្កាត់ និងកាត់ផ្តាច់ការឆ្លងរាលដាលនូវមេរោគបម្លែងខ្លួនថ្មី ប្រភេទដែលតា ( delta ) នៅក្នុងសហគមន៍។

ទន្ទឹមនឹងការចេញ សេចក្តីសម្រេចថ្មីនេះមក ពលរដ្ឋរស់នៅតាមបណ្តោយផ្លូវ៣៥ បានផ្ទុះការតវ៉ាទាមទារស្នើសុំឲ្យអាជ្ញាធរបិទបញ្ចប់ការបិទខ្ទប់ ខណះពួកគាត់ជាប់ក្នុងការបិទខ្ទប់១៤ថ្ងៃកន្លងទៅហើយ ដោយពុំបានចេញទៅប្រកបមុខរបររកស៊ីផ្សេងៗ ដើម្បីចិញ្ចឹមជីវភាពឡើយ។

បន្ទាប់ពីកើតមានការតវ៉ារួចមក អាជ្ញាធរសង្កាត់ចាក់អង្រែក្រោម ដឹកនាំដោយលោកជា សុខៃ ចៅសង្កាត់ បានចុះធ្វើការសម្របសម្រួល បងប្អូនពលរដ្ឋដែលតវ៉ា ដោយអោយពួកគាត់រក្សាភាពស្ងប់ស្ងាត់ និងសូមចូលតាមលំនៅឋានរៀងៗខ្លួនសិន អាជ្ញាធរសង្កាត់នឹងយកការស្នើរបស់បងប្អូន រាយការណ៍បន្តជូនដល់ថ្នាក់លើ ដើម្បីសុំគោលការណ៍សម្រេច ក្នុងការបង្កើតគណៈកម្មាការចុះវាយតម្លៃជាមុនសិន មុនអនុញ្ញាតឲ្យមានការបិទបញ្ចប់ការបិទខ្ទប់តាមការស្នើសុំរបស់បងប្អូនដែលកំពុងជាប់ក្នុងការបិទខ្ទប់ខាងលើនេះ។

មន្ត្រីអាជ្ញាធរសង្កាត់មួយរូប បានប្រាប់ឲ្យដឹងថា ក្នុងរយៈពេលមួយសប្តាហ៍ចុងក្រោយនេះ ក្រុមគ្រូពេទ្យសហការគ្នាជាមួយក្រុមអាជ្ញាធរសង្កាត់ បានបន្តរកឃើញ អ្នកវិជ្ជមាន វីរុសបម្លែងថ្មីប្រភេទដែលតា លើពលរដ្ឋប្រមាណជិត៣០នាក់ ដែលរសនៅតាមបណ្តោយផ្លូវលំមួយ ជាប់កែងនឹងផ្លូវលេខ៣៥ខាងលើតែម្តង ។ យ៉ាងណាមិញ បច្ចុប្បន្នផ្លូវលំនោះក៏អាជ្ញាធរសម្រេចបិទខ្ទប់ជាបណ្តោះអាសន្នផងដែរ។

មន្ត្រីដដែលបន្តថា គិតចាប់តាំងកើតមាន វីរុសបម្លែង ថ្មីដែលតា ( Delta ) មក សម្រាប់ភូមិសាស្ត្រសង្កាត់ចាក់អង្រែក្រោម មានអ្នកវិជ្ជមានវីរុសនេះសរុប៣២នាក់ហើយ។

គួររំលឹកថា កាលពីវេលាយប់ថ្ងៃទី១២ ខែសីហា ឆ្នាំ២០២១ ក្រុមគ្រូពេទ្យ សហការជាមួយអាជ្ញាធរ បានចុះទៅធ្វើសំណាកលើក្រុមពលរដ្ឋរស់នៅតំបន់នោះចំនួន៧០នាក់ ហើយរកឃើញមានបុរសម្នាក់ វ័យ៣៥ឆ្នាំ មានវិជ្ជមាន វីរុសបម្លែងថ្មី ក៏រហូតដល់ព្រឹកថ្ងៃទី១៣ ខែឆ្នាំដដែល អាជ្ញាធរ បានសម្រេចធ្វើការបិទខ្ទប់បណ្តោយផ្លូវលេខ៣៥ខាងលើនេះទាំងស្រុងតែម្តងទៅ។

អធិការនគរបាលខណ្ឌមានជ័យ លោកវរសេនីយ៍ឯក ម៉េង វិមានតារ៉ា បានប្រាប់អោយដឹងថា មុនឈានដល់ការចុះយកសំណាកលើបងប្អូនពលរដ្ឋរស់នៅតំបន់ខាងលើ គឺដំបូងឡើយ ក្រុមគ្រូពេទ្យបានរកឃើញ កុមារីម្នាក់ ឈ្មោះ កៅ ចន្ធូ អាយុ០៧ឆ្នាំ មានវិជ្ជមាន វីរុសបម្លែងថ្មីដែលតា ដោយនាងជាអ្នករស់នៅទីនោះជាមួយឪពុកម្តាយ ។ ក្រោយពិនិត្យឃើញ មានវិជ្ជមានហើយនោះ ក៏ក្រុមគ្រូពេទ្យ ឈានទៅធ្វើការតេស្តសំណាកជាបន្តបន្ទាប់ រហូតដល់ព្រឹកថ្ងៃទី១៣ ខែសីហា ឆ្នាំ២០២១ រដ្ឋបាលរាជធានីភ្នំពេញ មានការសម្រេចធ្វើការបិទខ្ទប់បណ្តោយផ្លូវខាងលើតែម្តងទៅ។

គួរបញ្ជាក់ថា លំនៅឋានសរុបនៅបណ្តោយផ្លូវលេខ៣៥ខាងលើ មាន៤៣ខ្នងផ្ទះ ដែលមានចំនួនមនុស្សសរុប៧០នាក់ ។ បច្ចុប្បន្នបណ្តោយផ្លូវខាងលើ នៅបន្តបិទខ្ទប់ដដែល ដោយមានកម្លាំងអាជ្ញាធរចម្រុះ នៅប្រចាំយាមកាមការពារសន្តិសុខនៅជុំវិញតំបន់ផងដែរ៕

ដោយ ៖ លីហេង