ហ្វីយ៉ាតា ប្រាប់មូលហេតុដែលមិនចង់ខកខានបង្ហាញខ្លួនលើឆាកប្រកួត Miss Universe ទោះធ្វើនៅថៃ

ជិតមួយខែហើយ ដែលកម្មវិធី Miss Universe Cambodia បានរកឃើញនូវរាជិនីម្ចាស់មកុដថ្មី MUC 2025 ដែលបានទៅលើបវរកញ្ញាពេញដោយសមត្ថភាព ថៃ នារីសុជាតា ហៅ ហ្វីយ៉ាតា ខណៈម្ចាស់មកុដនេះ ក៏ត្រូវតំណាងកម្ពុជាដើម្បីចូលរួមប្រកួតលើឆាកអន្តរជាតិ Miss Universe ឆ្នាំ២០២៥ ។ ចំណែកឯការប្រកួតកម្មវិធីអន្តរជាតិមួយនេះ គ្រោងរៀបចំធ្វើឡើងនៅឯប្រទេសថៃ ចាប់ពីថ្ងៃទី ១៩ ដល់ថ្ងៃទី ២១ ខែវិច្ឆិកា ឆ្នាំ២០២៥ ខាងមុខនេះ ជាហេតុធ្វើឱ្យអ្នកគាំទ្រ មានក្តីបារម្ភចំពោះសុវត្ថិភាពរបស់ ហ្វីយ៉ាតា ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីគ្រងមកុដដ៏នេះ មក ឃើញថា ហ្វីយ៉ាតា បានបង្ហាញការត្រៀមខ្លួនហ្វឹកហាត់យ៉ាងស្វាហាប់។ ដ្បិតមិនទាន់មានការសម្រេចចិត្តច្បាស់ក្នុងដំណើរឆ្ពោះទៅប្រកួតលើឆាកអន្តរជាតិយ៉ាងណាក៏ដោយ តែតាមរយៈបទសម្ភាសក្នុងកម្មវិធីដ៏មានប្រជាប្រិយមួយ ហ្វីយ៉ាតា ក៏បានលើកឡើងទាក់ទងនឹងការសម្រេចចិត្តរបស់ខ្លួន ក្នុងការប្រកួតលើអន្តរជាតិផងដែរ ដោយបានបញ្ជាក់យ៉ាងច្បាស់ៗថា នឹងទៅចូលរួមប្រកួត។

ជាមួយគ្នានេះ ហ្វីយ៉ាតា ក៏បានប្រាក់ពីមូលហេតុដែលជំរុញចិត្តរបស់នាងដែលត្រូវតែទៅប្រកួតផងដែរ។ ហ្វីយ៉ាតា បានរៀបរាប់ថា “ចាប់តាំងពីចូលមកប្រកួតយើងដឹងហើយថាកម្មវិធីនឹងប្រព្រឹត្តនៅប្រទេសណា ហើយខ្ញុំតែងតែប្រាប់ខ្លួនឯងថា បើសិនជាខ្ញុំឈ្នះមកុដ ឆាកអន្តរជាតិទាំងមូលអត់អាចខ្វះទង់ជាតិរបស់ប្រទេសកម្ពុជាយើងបានទេ ហើយពាក្យហ្នឹងគឺនៅក្នុងខួរក្បាលខ្ញុំវិលទៅវិលមករហូត។ ហើយពេលនេះ ខ្ញុំអាចឈ្នះបានមកុដតំណាងឱ្យប្រទេសកម្ពុជាហើយ ហេតុអីបានខ្ញុំអត់អាចយកទង់ជាតិខ្មែរយើងទៅលើឆាកហ្នឹងបាន អ៊ីចឹងខ្ញុំគិតថា ទោះបីជាមានឧបសគ្គធំនៅខាងមុខ ឬក៏មិនមាន ឬណាយ៉ាងណាក៏ដោយ តែការប្ដេជ្ញាចិត្តរបស់ខ្ញុំដែលត្រូវយកទង់ជាតិកម្ពុជាទៅលើឆាកអន្តរជាតិត្រូវតែបន្ត”។

ម្យ៉ាងទៀត បវរកញ្ញារូបនេះ ក៏ទទួលបានដំណឹងពី ND ផ្ទាល់ ដែលបានពិភាក្សាជាមួយខាងកម្មវិធីអន្តរជាតិ ហើយខាងកម្មវិធី MU ក៏ផ្ដាំទៅ ND កម្ពុជាវិញថា គេមិនចង់ឱ្យបាត់បង់បេក្ខភាពពីប្រទេសណាមួយទេ គឺគេចង់ស្វាគមន៍យើង ឱ្យយើងទៅប្រកួតទាំងអស់គ្នា៕