ម្ចាស់ស្ថាប័ន MU ឆ្លើយតបរឿងកូឌីវ័រលាលែងតំណែង តែបែរត្រូវគេររិះគន់ព្រោងព្រាត

បន្ទាប់ពីរាជិនីសម្រស់កូឌីវ័រនាង Olivia Yace បានប្រកាស បោះបង់តំណែងជាបវរកញ្ញាលំដាប់រងលេខ៤ និងជាបវរកញ្ញាចក្រវាលអាហ្វ្រិក និងអូសេអានី ខណៈគណៈកម្មាធិការរៀបចំបវរកញ្ញាចក្រវាល និងជាអ្នកជំនួញម៉ិកស៊ិក គឺលោក Raul Rocha នៅតែទទួលការរិះគន់ឥតឈប់ឈរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៥ ខែវិច្ឆិកា គេហទំព័រសម្រស់បានរាយការណ៍ថា លោក Raul Rocha បានបង្ហាញខ្លួននៅក្នុងបទសម្ភាសន៍មួយ និងបានចែករំលែកគំនិតផ្ទាល់ខ្លួន លើភាពចម្រូងចម្រាសជុំវិញការប្រកួតបវរកញ្ញាចក្រវាលឆ្នាំ២០២៥។

ប្រធានកម្មវិធី Miss Universe (MU) បានបញ្ជាក់ថា បវរកញ្ញាតំណាងឲ្យប្រទេសកូឌីវ័រ មិនអាចគ្រងមកុដបវរកញ្ញាចក្រវាលឆ្នាំ២០២៥បានទេ ដោយសារតែលិខិតឆ្លងដែនកូឌីវ័ររបស់នាងគ្មានអនុភាពខ្លាំងក្លា ដែលតម្រូវឲ្យមានទិដ្ឋាការដើម្បីចូលទៅក្នុងប្រទេសចំនួន១៧៥ ជុំវិញពិភពលោក។ នេះត្រូវបានគេនិយាយថា ប៉ះពាល់ដល់ការធ្វើដំណើរអន្តរជាតិរបស់សម្រស់ ប្រសិនបើនាងត្រូវបានគ្រងមកុដ។

មិនតែប៉ុណ្ណោះ សេចក្តីថ្លែងការណ៍របស់លោក Raul បានធ្វើឲ្យនាង Ophély Mezino ជាស្រីស្អាតមកពីប្រទេស Guadeloupe មានការខឹងសម្បារយ៉ាងខ្លាំង។ នាងបានបង្ហោះអត្ថបទមួយដែលរិះគន់លោកថា ម្ចាស់បវរកញ្ញាចក្រវាលមានអាកប្បកិរិយារើសអើងជាតិសាសន៍ចំពោះប្រទេសតូចៗ ប៉ុន្តែកំពុងរកលុយពីប្រទេសទាំងនេះទៅវិញ។

ស្រីស្អាតរូបនេះបានបន្ថែមថា «ខ្ញុំបានតាមដានកម្មវិធីប្រកួតបវរកញ្ញាអស់រយៈពេលជាច្រើនទសវត្សរ៍មកហើយ ហើយនេះគឺជាការប្រមាថ និងមិនគោរពចំពោះអ្នកចូលរួមប្រកួត និងក្រុមគ្រួសាររបស់ពួកគេ។ អ្នកតំណាងជាតិបានខិតខំប្រឹងប្រែងយ៉ាងខ្លាំងទៅលើម៉ាកយីហោរបស់អ្នក។ តើអ្នកអាចមិនគោរពប្រទេសទាំងនោះដោយរបៀបណា?»។

នៅក្នុងបទសម្ភាសន៍ លោក Raul ក៏បានបន្ថែមថា គណៈវិនិច្ឆ័យមានលក្ខណៈវិនិច្ឆ័យវាយតម្លៃសំខាន់ៗចំនួន ៣ រួមមាន ឈុតហែលទឹក រ៉ូបល្ងាច និងការប្រកួតសម្ភាសន៍ ប៉ុន្តែពិន្ទុភាគច្រើនគឺផ្អែកលើអ្វីដែលកើតឡើងនៅពីក្រោយឆាកក្នុងអំឡុងពេលជួបជុំ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

បវរកញ្ញា កូតឌីវ័រ លាលែងតំណែងលំដាប់រងលេខ៤ ព្រោះគេរើសអើង និងខ្វះតម្លាភាព