ខ្ញុង សុំមហាជនម្នាក់ ១ដុល្លារទុកឲ្យកូនៗ ខណៈខ្លួនប្រឈមជាប់ពន្ធនាគារ រឿងបំណុលជាង ៥០ម៉ឺនដុល្លារ

តារាកំប្លែង ខ្ញុង បានដាច់ចិត្តទម្លាយការពិត នូវរឿងរ៉ាវដែលខ្លួនជំពាក់បំណុលគេ រហូតដល់ទៅជាង ៥០ម៉ឺនដុល្លារអាមេរិក។ ការទម្លាយនេះ បានធ្វើឲ្យមហាជន​ និងអ្នកគាំទ្រ មានការភ្ញាក់ផ្អើលជាខ្លាំង។

យ៉ាងណាមិញទន្ទឹមគ្នា នៃការទម្លាយការពិត ដោយគ្មានការលាក់លៀម ឬគេចវេសពីសំណាក់ ខ្ញុង នេះដែរគេឃើញមានទស្សនិកជនមួយចំនួន បានបង្ហាញការអាណិត និងខ្លះទៀតរិះគន់ដល់នាង។ ចំណែកមួយចំនួនទៀត ក៏បានលើកទឹកចិត្តផងដែរ។

តាមការរៀបរាប់នោះ ខ្ញុង បានសារភាពថា អ្នកនាងពិតជាបានខ្ចីបំណុល ម្ចាស់បំណុលជាច្រើនទាំងមានសែក គ្មាន សែក។ អ្នកនាងពិតជាអស់លទ្ធភាព ក្នុងការរកប្រាក់មកសងបំណុលតទៅទៀតហើយ។ ដូច្នេះនាងមានតែត្រូវជាប់ពន្ធនាគារ ដែលមូលហេតុមិនមានប្រាក់សងម្ចាស់បំណុល តទៅទៀតទេ។

អ្នកនាង ខ្ញុង បានលើកឡើងទាំងទឹកភ្នែកទៀតថា «ដោយនាងខ្ញុំអាណិតកូនប្រុសទាំងពីរនាក់ ដែលមានម្ដាយនឹងត្រូវជាប់ពន្ធនាគារដូចនេះហើយ ដើម្បីឲ្យកូនខ្ញុំបានបន្តរៀនសូត្រ នឹងបានបាយហូបសូមបងប្អូន ដែលធ្លាប់គាំទ្រនាងខ្ញុំជួយអនុគ្រោះផ្តល់ជូនខ្ញុំ ១ដុល្លារផងចុះ នាងខ្ញុំពិតជាអរគុណបងប្អូនទាំងអស់គ្នាទុកជាមុន និងជូនពរបងប្អូនទាំងអស់គ្នា ជួបតែសំណាងល្អ សូមកុំជួបរឿងដូចខ្ញុំអី»។

តារាកំប្លែង ខ្ញុង ក្រៅតែចូលខ្លួនសារភាពនៅសាលាដំបូងរាជធានីភ្នំពេញ អ្នកនាងក៏បានអំពាវនាវដោយការអង្វរ និងស្នើសុំការយោគយល់ ពីម្ចាស់បំណុលទាំងអស់ មេត្តាទុកឱកាសជាថ្មី ដើម្បីឲ្យអ្នកនាងមានពេលរកស៊ី ដោះបំណុលទាំងនេះផង ព្រោះនាងមិនបានរត់គេចវេសឡើយ៕

អត្ថបទ៖ ចាន់ រ៉ា