ពិតទេ? Zayn ប្រើអំពើហិង្សាលើម្តាយ Gigi ទើបធ្វើឲ្យអ្នកទាំងពីរចែកផ្លូវគ្នា

គូស្នេហ៍តារាបង្ហាញស្រីលំដាប់ពិភពលោក នាង Gigi Hadid និងកំពូលតារាចម្រៀងប្រុស លោក Zayn Malik ត្រូវបានសារព័ត៌មាននានា រាយការណ៍ថា បានចែកផ្លូវគ្នាជាផ្លូវការហើយ បន្ទាប់ពីគូស្នេហ៍នេះធ្លាប់ឈ្លោះបែកៗ ជាច្រើនលើកច្រើនសារកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណឹងបឋមបានឱ្យដឹងថា មូលហេតុដែលនាំឱ្យឈានដល់ផ្លូវបំបែករវាងគូស្នេហ៍កូនមួយនេះដែរ ដោយសារលោក Zayn ត្រូវបានចោទប្រកាន់ពីការប្រើអំពើហិង្សាទៅលើម្តាយរបស់ Gigi អំឡុងពេលឈ្លោះគ្នា។

រឿងរ៉ាវបែកបាក់នេះ បានកើតឡើងនៅពេលដែលម្តាយរបស់តារាម៉ូឌែល Gigi ទម្លាយថា លោក Zayn បានវាយគាត់ កំលុងពេលឈ្លោះប្រកែកគ្នា។ ពេលនេះអ្នកស្រី Yolanda Hadid ដែលជាម្ដាយ Gigi កំពុងពិចារណាដាក់ពាក្យបណ្ដឹងទៅខាងប៉ូលិស ដើម្បីចាត់ការតាមផ្លូវច្បាប់។

ដោយឡែក ខាង Zayn លោកបានចេញមកបដិសេធការចោទប្រកាន់នេះ ដោយបានឆ្លើយតបនៅលើគណនី Twitter របស់លោកថា ការចោទប្រកាន់របស់អ្នកស្រី Yolanda Hadid សុទ្ធតែជារឿងមិនពិត។ តាមរយៈសារបង្ហោះដដែលរបស់តារាប្រុសរូបនេះ ទំនងជាលោកមានបញ្ហាឈ្លោះប្រកែកគ្នាពិតមែន ប៉ុន្តែលោកបានសុំទោសរួចអស់ហើយ។

ងាកទៅ​ខាងកំពូលតារាបង្ហាញម៉ូដ Gigi Hadid វិញ បន្ទាប់ពីមានរឿងផ្ទុះឡើង នាងមិនបានចេញមុខបកស្រាយអ្វីឡើយ។ យ៉ាងណាមិញ អ្នកតំណាងរបស់តារាស្រីរូបនេះ បានចេញសេចក្តីថ្លែងការណ៍មួយ ដោយបញ្ជាក់ថា ពេលនេះ Gigi គិតតែពីរឿងកូនប៉ុណ្ណោះ ហើយសុំមិនឆ្លើយតបអ្វីទេ ដោយចង់រក្សា​ឯកជន​ភាពមួយរយៈសិន៕

ប្រែសម្រួល៖ សន្យា

ចុចអាន៖ អ្នកគាំទ្ររង់ចាំ Lisa ច្រៀងឆ្លងឆ្នាំនៅថៃ ត្រូវខកចិត្ត