ជីវិតកម្សាន្ដ

ពិធីករ សុខ រ៉ាស៊ី បញ្ជាក់ថា ករណីបណ្ដឹងលោកមិនទាន់មានពន្លឺយុត្តិធម៌ និងសំណងទេ

បានផុស

២ ខែ មុន

នៅ

ថ្ងៃអង្គារ ១៧ មករា ២០២៣

ដោយ

ពិធីករសម្បូរវោហារស័ព្ទលោក សុខ រ៉ាស៊ី បានបញ្ជាក់ប្រាប់កម្ពុជាថ្មីឲ្យដឹងថា គិតរហូតមកដល់ពេលនេះ ករណីបណ្ដឹងរបស់លោកទៅលើលោក អ៊ិន សុភិន នៅមិនទាន់មានច្រកចេញ ឬដំណោះស្រាយនៅឡើយទេ ខណៈពាក្យបណ្ដឹងនោះ គឺលោក សុខ រ៉ាស៊ី បានដាក់ចូលទៅតុលាការរយៈពេលប្រមាណជា ១ ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារតែហេតុផលស្ងប់ស្ងាត់ ជាថ្មីម្ដងទៀត លោក សុខ រ៉ាស៊ី បានចេញមុខស្នើ និងអំពាវនាវយ៉ាងទទូចដល់ប្រព័ន្ធច្បាប់ឲ្យជួយរកយុត្តិធម៌ និងពន្លឿនរឿងក្ដីនេះផង ដើម្បីស្វែងរកយុត្តិធម៌ចំពោះជនរងគ្រោះដូចជារូបលោកផ្ទាល់។

លោក សុខ រ៉ាស៊ី បានថ្លែងប្រាប់តាមសារអេឡិចត្រូនិកកាលពីព្រឹកថ្ងៃទី ១៧ ខែមករា ឆ្នាំ ២០២៣ ថា “ចំពោះរឿងក្ដីរបស់ខ្ញុំ គឺពុំទាន់មានដំណោះស្រាយសមស្របណាមួយនៅឡើយទេ ដូច្នេះសូមឲ្យតុលាការជួយពន្លឿនរឿងក្ដីផង”។

លោក សុខ រ៉ាស៊ី បាននិយាយទៀតថា ចំណែកឯសំណងក៏លោកនៅមិនទាន់ទទួលបានសូម្បីតែ១០០ លុយខ្មែរដែរ ព្រោះកន្លងមកខាងតុលាការបានទុកពេលឲ្យសម្រុះសម្រួលគ្នាក្រៅផ្លូវច្បាប់សិន ហើយមេធាវីរបស់គាត់(លោក អ៊ិន សុភិន) ព្យាយាមចរចាដែរ ប៉ុន្តែក្រោយការចចារហើយគាត់នៅតែមិនព្រមផ្ដល់សំណង ឬសងលុយឲ្យលោកទេ។ លោកសង្កត់ធ្ងន់ថា មកដល់ពេលនេះខ្លួនមិនទាន់ទទួលបានពន្លឺយុត្តិធម៌ និងសំណងទេ។

ដោយឡែកកាលពីកន្លងមក លោក សុខ រ៉ាស៊ី ធ្លាប់បានបញ្ជាក់ហើយថា នៅក្នុងពាក្យបណ្ដឹងរបស់លោកដែលដាក់ទៅតុលាការនោះ គឺប្ដឹងទាមទារលោក អ៊ិន សុភិន ចំនួន ២ ចំណុច គឺ ១.ប្ដឹងទារលុយដែលជំពាក់ថ្លៃជួលឆាកចំនួន ១៥ ៧០០ ដុល្លារ និង ២.ទាមទារសំណងជំងឺចិត្តចំនួន ៤០ លានរៀល។

ជុំវិញរឿងរ៉ាវខាងលើនេះ កម្ពុជាថ្មី នៅមិនទាន់អាចស្វែងរកការបកស្រាយពីលោក អ៊ិន សុភិន ដែលជាថៅកែផលិតកម្មមហាហង្សបាននៅឡើយទេ គិតរហូតមកទល់ពេលនេះ ខណៈមហាជន និងអ្នកគាំទ្រជាច្រើន កំពុងរង់ចាំមើលលទ្ធផលពីតុលាការផងដែរ៕

អត្ថបទ ៖ ចាន់រ៉ា