តារាសម្ដែងអាមេរិកាំង Annie ទទួលមរណភាពនៅអាយុ ៤៥ ឆ្នាំ ដោយសារជំងឺមហារីក

អ្នកស្រី Annie Wersching ល្បីក្នុងរឿងភាគ “24” ដើរតួជាភ្នាក់ងារ FBI ឈ្មោះ Renee Walker បានបាត់បង់ជីវិតនៅអាយុ ៤៥ ឆ្នាំកាលពីថ្ងៃអាទិត្យ ទី២៩ ក្នុងទីក្រុងឡូស អែនជែលឡែស ដោយសារជំងឺមហារីក ។

យោងតាមប្រភពច្បាស់លាស់បានឲ្យដឹងថា អ្នកស្រី Annie មានជំងឺមហារីកតាំងពីឆ្នាំ ២០២០ មកម្ល៉េះ ទោះបីជាប្រភេទជំងឺមហារីកនោះមិនត្រូវបានបញ្ជាក់ថាជាប្រភេទអ្វីក៏ដោយ ។

ក្នុងវិស័យការងារសិល្បៈជាង ២០ ឆ្នាំរបស់ ​Annie គាត់ធ្លាប់ចូលក្នុងកញ្ចក់ទូរទស្សន៍រាប់ភ្លេច ក្រៅពីនេះរឿងដំបូងបំផុតដែលគាត់សម្ដែងគឺរឿង “Star Trek: Enterprise” ។

បន្ថែមពីលើរឿងភាគ “24” តារាស្រីរូបនេះក៏ធ្លាប់ដើរតួក្នុងរឿងជាច្រើនទៀតដែរដូចជា “Bosch, Timeless, The Vampire Diaries, Runaways, The Rookie, និង Star Trek: Picard ជាដើម” ។

គ្រាន់តែទទួលដំណឹងមរណភាពភ្លាម មិត្តរួមការងារក្នុងវិស័យសិល្បៈជាច្រើននាំគ្នាតក់ស្លុតនិងចូលរួមចែករំលែកគ្រប់គ្នាព្រោះអ្នកស្រីធ្លាប់ជាមនុស្សល្អដែលសមតែស្ថិតក្នុងការចងចាំមនុស្សគ្រប់គ្នារហូតទៅ ។

ចំណែកឯបញ្ហាគ្រួសារវិញ អ្នកស្រីបានបន្សល់ទុកកូនៗជាទីស្រលាញ់ពីរនាក់ឲ្យតារាសម្ដែងលោក Stephen Full ជាស្វាមីមើលថែជំនួសគឺ Freddie អាយុ ១២ ឆ្នាំ និង Ozzie អាយុ ៩ ឆ្នាំ ៕

ប្រែសម្រួល ៖ វារី

ចុចអាន ៖ តារាចម្រៀង Lisa ទទួលមរណភាព បន្ទាប់ពីចប់កម្មវិធី Golden Globes

ចុចអាន ៖ កំពូលអ្នកច្នៃម៉ូដ Dame Vivienne Westwood ទទួលមរណភាពក្នុងអាយុ ៨១ ឆ្នាំ