តារាសម្តែងសិង្ហបុរី Meixin បានទម្លាយថា ក្រោយពេលថតភាពយន្តនៅប្រទេសកម្ពុជា គឺនៅពេលនាងត្រឡប់ទៅស្រុកកំណើតវិញ មានវិញ្ញាណខ្មោចបានតាមនាងពីកម្ពុជា រហូតទៅដល់សិង្ហបុរី ព្រោះតែវិញ្ញាណខ្មោចនោះស្រឡាញ់នាង ហើយចង់រៀបការជាមួយនឹងនាង។

បទពិសោធន៍ដ៏ព្រឺឆ្អឹងខ្នងនេះបានកើតឡើងនៅពេលដែលតារាស្រីរូបនេះកំពុងថតភាពយន្តឯកសារអំពីភូមិបណ្តែតទឹកលើបឹងទន្លេសាប ក្នុងប្រទេសកម្ពុជា។ នៅភូមិបណ្តែតទឹកមានជនភៀសខ្លួនពីប្រទេសវៀតណាមមករស់នៅ ដោយមិនត្រូវបានអនុញ្ញាតឱ្យឡើងលើគោក រហូតដល់គាត់ស្លាប់ និងបូជាសព។

Meixin ប្រាប់សារព័ត៌មានក្នុងស្រុក 8days កាលថ្ងៃទី១៣ ខែមីនា ឆ្នាំ២០២៣ ថា “បន្ទាប់ពីខ្ញុំជិះយន្តហោះត្រឡប់ទៅផ្ទះវិញ មិត្តរបស់ខ្ញុំដែលចេះខាងអាគមងងឹត បានមកផ្ទះរបស់ខ្ញុំ។ ពេលនោះមិត្តរបស់ខ្ញុំបានដឹងថាមានវិញ្ញាណតាមខ្ញុំ ទើបគាត់សួរថាខ្ញុំថាបានខុសមាត់ខុសក ឬបានបំពានអ្វីនៅកម្ពុជាឬអត់? ខ្ញុំប្រាប់គាត់ថា ខ្ញុំមិនបាននិយាយឬធ្វើអ្វីដែលខុសពីអ្នកដឹកនាំរឿងប្រាប់នោះទេ ប៉ុន្តែខ្ញុំបានលេងទីបញ្ចុះសព” ។

ភ្លាមៗមិត្តរបស់ Meixin ប្រាប់ថា នាងបានជាន់ក្បាលផ្នូរដោយអចេតនា ពេលទៅលេងទីបញ្ចុះសព ហើយជំនួសដោយការខឹងសម្បារលើនាង ខ្មោចនោះចង់រៀបការជាមួយនាង ទើបបានជាតាមនាងរហូតដល់សិង្ហបុរី។ ក្រោយដឹងរឿងហេតុ មិត្តរបស់នាងបានធ្វើពិធីសុំខមាទោស ហើយឱ្យ Meixin ធ្វើបុណ្យឧទ្ទិសកុសលជូនវិញ្ញាណនោះផងដែរ។

យ៉ាងណាមិញ ហេតុការណ៍អប្បិយជំនឿរបស់ Meixin បានកើតឡើងតាំងពីនាងនៅជំទង់មកម្ល៉េះ ខណៈបច្ចុប្បន្ននាងមានវ័យ ៣៦ឆ្នាំហើយ៕

ប្រែសម្រួល៖ សន្យា

ប្រភព៖ Asianone

ចុចអាន៖ តារារ៉េប Cardi B សម្ញែងចិញ្ចៀនពេជ្រតម្លៃ ១៦លានដុល្លារ ផ្អើលកម្មវិធីជប់លៀង Oscar