ជីវិតកម្សាន្ដ

បញ្ញា សិទ្ធិ គោរពថ្លែងអំណរគុណ សម្ដេចទាំងទ្វេ ឧបត្ថម្ភ ៣ ម៉ឺនដុល្លារ សង្គ្រោះជីវិតម្ដាយ

បានផុស

៣ years មុន

នៅ

ថ្ងៃសុក្រ ២១ មេសា ២០២៣

ដោយ

តារាសម្ដែងលោក បញ្ញា សិទ្ធិ បានសម្ដែងក្តីរំភើបខ្លាំង បន្ទាប់ពី សម្ដេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ឧបត្ថម្ភថវិកាចំនួន ៣ ម៉ឺនដុល្លារ ដើម្បីជួយសង្គ្រោះជីវិតម្ដាយរបស់លោកកំពុងមានជំងឺធ្ងន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នា នៃការបង្ហាញក្តីរំភើបជាពន់ពេកនេះដែរ តារាចម្រៀង និងសម្តែងលោក បញ្ញា សិទ្ធិ បានគោរពថ្លែងអំណរគុណសម្តេចទាំងទ្វេ។ លោក បញ្ញា សិទ្ធិ បានរៀបរាប់ថា «កូនចៅរំភើបណាស់ អរគុណលោកពុកជាទីគោរពរបស់កូនៗគ្រប់គ្នា។ សែនរំភើបណាស់ អំពើល្អទេវតាដើរដី គឺលោកពុក និងអ្នកម្តាយជាទីគោរពរបស់កូនៗ ហ្នឹងហើយ ជាអ្នកជួយសង្គ្រោះម្តាយចៅលោកពុក»។

សូមបញ្ជាក់ថា បន្ទាប់ពីទទួលបានព័ត៌មានថា តារាសម្ដែងប្រុសសង្ហាលោក បញ្ញាសិទ្ធ បាត់មុខពីសិល្បៈមួយរយៈធំ ដើម្បីរកលុយព្យាបាលជំងឺម្ដាយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានចូលរួមឧបត្ថម្ភថវិកាចំនួន ៣ ម៉ឺនដុល្លារ សម្រាប់ចាត់ចែងព្យាបាលម្ដាយ។

សម្ដេចតេជោ បានសរសេរថា «ខ្ញុំទើបដឹងថា តារាសម្ដែង បញ្ញាសិទ្ធ បាត់មុខពីសិល្បៈ ដើម្បីរកប្រាក់ព្យាបាលជំងឺម្ដាយ។ ពេលនេះកូនកតញ្ញូម្នាក់នេះ កំពុងត្រូវការជំនួយដើម្បីជួយដល់ម្តាយ។ ខ្ញុំ និងភរិយា សូមចូលរួមចំនួន ៣ ម៉ឺនដុល្លារ (30,000$) សម្រាប់ក្មួយចាត់ចែងព្យាបាលម្ដាយឲ្យទាន់ពេល»។

សម្ដេចតេជោ បន្តថា «សូមក្មួយ បញ្ញាសិទ្ធ ទាក់ទងមក លោក សេង ទៀង ដែលកំពុងផ្ទេរប្រាក់តាមគណនីនៅ ABA របស់ក្មួយ តាមលេខទូរស័ព្ទ ០១២ ៩៦១ ៩៧១។ ប្រសិនមានការខ្វះខាត ខ្ញុំពិនិត្យតាមក្រោយទៀត។ ជូនពរដល់ម្តាយក្មួយឆាប់បានជាសះស្បើយ»។

បើតាមលោក បញ្ញា សិទ្ធិ បញ្ជាក់ថា ម្ដាយរបស់លោកមានជំងឺដូចជា តម្រងនោម,ពោះវៀន និងជំងឺជាច្រើនទៀត ដែលលោកបានមើលថែគាត់ដោយផ្ទាល់អស់រយៈពេលជាង ១០ ឆ្នាំមកហើយ។ ពេលនេះ លោកត្រូវការលុយមួយចំនួន ដើម្បីយកគាត់ទៅវះកាត់នៅប្រទេសថៃ នៅថ្ងៃទី ២៥ ខែមេសា ឆ្នាំ ២០២៣ នេះ៕

អត្ថបទ ៖ ចាន់រ៉ា