ជីវិតកម្សាន្ដ

បញ្ញា សិទ្ធ នាំម្ដាយត្រឡប់មកដល់កម្ពុជាវិញហើយ ក្រោយចេញទៅព្យាបាលនៅថៃ

បានផុស

១០ ខែ មុន

នៅ

ថ្ងៃអង្គារ ៣០ ឧសភា ២០២៣

ដោយ

តារាសម្ដែងលោក បញ្ញា សិទ្ធ បានបញ្ជាក់ប្រាប់ឲ្យដឹងនៅថ្ងៃនេះថា អ្នកម្ដាយរបស់លោកបានវិលត្រឡប់មកដល់ប្រទេសកម្ពុជាវិញហើយ បន្ទាប់ពីចេញទៅព្យាបាលនៅប្រទេសថៃមួយរយៈ ខណៈអាការជំងឺក៏មានសភាពធូរស្រាលច្រើនជាងមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះដំណឹងនេះបានធ្វើឲ្យមហាជន និងអ្នកគាំទ្រ បង្ហាញការអបអរដែលសុខភាពម្ដាយរបស់លោកបានធូរស្រាលឡើងវិញ ក្រោយការឧបត្ថម្ភថវិកាដ៏ខ្ពង់ខ្ពស់ពី សម្ដេចទាំងទ្វេ។ លោក បញ្ញា សិទ្ធ បានឲ្យដឹងថា «ជម្រាបសួរបងប្អូន ថ្ងៃនេះ ខ្ញុំ និងអ្នកម្ដាយ បានមកដល់ប្រទេសកម្ពុជាយើងវិញហើយ»។ លោកសង្កត់ធ្ងន់ថា «សាជាថ្មីម្ដងទៀត កូនពិតជាថ្លែងអំណរអរគុណដល់ សម្ដេចពុក សម្ដេចម៉ែ និងបងបង បងប្អូនសិល្បៈ ដែលបានជួយដល់ជីវិតម្ដាយកូនសាជាថ្មីម្ដងទៀត»។

តារាសម្ដែងប្រុសសង្ហារូបនេះនិយាយទៀតថា «ពេលនេះ ខ្ញុំបាទ បានមកបម្រើអារម្មណ៍ពុកម៉ែបងប្អូនវិញហើយ និងសូមមករស់ក្រោមម្លប់សន្តិភាពបន្ត»។ ប្រាកដណាស់ តារាសម្ដែងលោក បញ្ញា សិទ្ធ គិតមកដល់ពេលនេះ លោកបានចាកឆ្ងាយពីវិស័យសិល្បៈមានរយៈពេលប្រមាណជិត ២ ឆ្នាំហើយ បន្ទាប់ពីតារាប្រុសរូបនេះបានចេញទៅធ្វើការងារនៅប្រទេសថៃ ដើម្បីយកលុយមកព្យាបាលជំងឺម្ដាយ។ ការបាត់វត្តមានរបស់លោក បញ្ញា សិទ្ធ មួយរយៈធំនេះ កន្លងមក ក៏បានធ្វើឲ្យអ្នកគាំទ្របង្ហាញការនឹករលឹកដល់លោកផងដែរ។

សូមបញ្ជាក់ថា បន្ទាប់ពីឃើញទុក្ខលំបាក និងក្តីអាណិតអាសូរដែលលោក បញ្ញា សិទ្ធ ជាកូនកតញ្ញូខិតខំប្រឹងរកលុយមកព្យាបាលម្ដាយ សម្ដេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានឧបត្ថម្ភថវិកាចំនួន ៣ ម៉ឺនដុល្លារ ដើម្បីជួយសង្គ្រោះជីវិតម្ដាយរបស់លោកដែលមានជំងឺធ្ងន់។

ក្រោយទទួលបានការឧបត្ថម្ភថវិកាជួយសង្គ្រោះជីវិតម្ដាយរបស់ សម្ដេចទាំងទ្វេ ថ្មីៗនេះ លោក បញ្ញា សិទ្ធ បានបញ្ជាក់ថា បច្ចុប្បន្នអាការជំងឺម្ដាយរបស់លោកបានធូរស្បើយប្រមាណជាង ៧០ ភាគរយហើយ។ ក្នុងនោះ លោកក៏បានប្រកាសត្រៀមខ្លួនវិលចូលសិល្បៈ និងឡើងឆាកតន្ត្រីជាលើកដំបូងទៀតផង៕

អត្ថបទ ៖ ចាន់រ៉ា