តារារ៉េប Nicki Minaj រងពាក្យបណ្ដឹងពីបទបំផ្លាញគ្រឿងអលង្ការកម្ចី

តារារ៉េប Nicki Minaj កំពុង​ប្រឈម​នឹង​ការ​ប្តឹង​ពី​ហាង​លក់​គ្រឿងអលង្ការ​មួយ​ក្នុង​ទីក្រុង Los Angeles ជុំវិញ​កិច្ច​សន្យា​ខ្ចី​អលង្ការ ក្រោយសងត្រឡប់ទៅម្ចាស់ដើមវិញទាំងមានការខូតខាត។

តារារ៉េបរូបនេះត្រូវបានថៅកែហាង Roseark ប្ដឹងផ្ដល់ជុំវិញការចុះកិច្ចសន្យាជាមួយអ្នករចនាម៉ូដ Brett Alan Nelson ដែលអនុញ្ញាតឱ្យនាងពាក់ត្បូងរបស់ក្រុមហ៊ុនសម្រាប់ការបង្ហាញខ្លួនជាសាធារណៈ។

ប្រធានក្រុមហ៊ុនបានអះអាងថា គ្រឿងអលង្ការចំនួន ៦៦គ្រឿងត្រូវបានប្រគល់មកវិញយឺតពេល ហើយក្រវិលមួយឈុត និងចិញ្ចៀនស្លឹកឈើត្រូវបានខូចខាត ពេលសងត្រឡប់មកហាងវិញ។ យោងទៅតាមប្រភពពី TMZ.com បានឱ្យដឹងថា ថៅកែហាង Roseark បានចុះហត្ថលេខាលើកិច្ចសន្យាជាមួយអ្នកច្នៃម៉ូដ Nelson ដែលក្នុងកិច្ចសន្យាចែងថា វត្ថុចាំបាច់ត្រូវតែប្រគល់មកវិញក្នុងពេល ១សប្តាហ៍នៃកម្ចី ហើយប្រសិនមានការខូចខាតណាមួយដែលអាចកើតមាន អ្នកខ្ចីត្រូវបង់សំណងជាដាច់ខាត។

នៅក្នុងពាក្យបណ្ដឹង ពួកគេបានដាក់ពាក្យប្តឹង Minaj និង Nelson ដោយចោទប្រកាន់ថា អ្នកទាំងពីរបានផ្ញើវិក្កយបត្រចំនួន ២៦,២៣៩.៥ ដុល្លារអាមេរិកមកហាង បូកនឹងការប្រាក់ផងដែរ ដើម្បីរ៉ាប់រងការខូចខាតដែលត្រូវបានចោទប្រកាន់ ប៉ុន្តែវាគ្រាន់តែជាវិក្កយបត្រប៉ុណ្ណោះ មិនទាន់ត្រូវបានទូទាត់ជាសាច់ប្រាក់នៅឡើយ។

ចំពោះរឿងនេះ ភាគីខាង Nicki អះអាងថា អលង្ការដែលខ្លួនកម្ចី ត្រូវបានប្រគល់ទៅវិញទាន់ពេល ហើយពុំមានការខូចខាតអ្វីនោះទេ។ ចំណែកមេធាវី Jordan Siev ដែលកំពុងតំណាងឱ្យ Minaj បញ្ជាក់ផងដែរថា តារារូបនេះមិនបានធ្វើអ្វីខុសទេ ហើយគ្រោងនឹងប្ដឹងតបវិញ ព្រោះខាងលោកមានភស្តុតាងដែលអាចបញ្ជាក់បានថា គ្មានគ្រឿងអលង្ការណាមួយត្រូវបានខូចខាតឡើយ ពេលប្រគល់ទៅឱ្យហាងវិញ៕

ប្រែសម្រួល៖ សន្យា

ចុចអាន៖ ម្ដាយមហាសេដ្ឋី Elon Musk នៅតែជាកំពូលតារាម៉ូដែលប្រជែងសម្រស់ជាមួយរលកក្រោយ