MrBeast ជាមនុស្សដំបូងគេមានអ្នកតាមដានលើកម្មវិធី Threads មួយលាននាក់

Youtuber ជនជាតិអាមេរិក MrBeast ដែលមានអ្នកជាវ (Subscribe) នៅលើ YouTube ១៦៥ លាននាក់ ពេលនេះមានអ្នកតាមដាន នៅលើកម្មវិធី Threads ១ លាននាក់ មុនគេបង្អស់ ។

Threads គឺជាបណ្ដាញសង្គមថ្មីដែលមានលក្ខណៈស្រដៀងនឹង Twitter និងដាក់ឲ្យប្រើប្រាស់ជាផ្លូវការ កាលពីថ្ងៃទី០៥ ខែកក្កដា ។

MrBeast ដែលមានឈ្មោះពិតថា Jimmy Donaldson និងជាសេដ្ឋីមានប្រាក់ ៥០០ លានដុល្លារ ទទួលបានអ្នកតាមដាន ១ លាននាក់ត្រឹមម៉ោង ៨ និង ៤២ នាទីប៉ុណ្ណោះកាលពីយប់ថ្ងៃទី០៧ ខែកក្កដា ។

នៅក្នុងកម្មវិធី Threads នោះដែរ Youtuber រូបនេះ បានដាក់ជីវប្រវត្តិថា “អនាគតនាយកប្រតិបត្តិ Threads” ហើយក្រោយពីការបង្ហោះចំនួន ៣ ដងសោះ MrBeast ក៏ទទួលបានអ្នកតាមដាន ១ លាននាក់តែម្ដង ។

ការបង្ហោះលើកទី ១ លោកសរសេរថា “ដូច្នេះ យូរប៉ុណ្ណាទៀតទើបយើងនឹងញៀន App Threads នេះ?” ។ ចំណែកការបង្ហោះលើកទី ២ សរសេរថា “ចុច like ផុសនេះហើយ តើ Mark Zuckerberg គួរតែងតាំងខ្ញុំជានាយកប្រតិបត្តិដែរឬទេ” ខណៈការបង្ហោះទី៣ គឺ “ខ្ញុំមានអារម្មណ៍ថាកំពុងក្បត់ Twitter ដោយសារតែការប្រើប្រាស់ App នេះ” ។

ជាការពិតណាស់ Threads មានអ្នកប្រើប្រាស់ជាង ៣០ លាននាក់ហើយ ដោយសារតែវាងាយស្រួលប្រើប្រាស់ ពោលយើងគ្រាន់តែភ្ជាប់ជាមួយ Instagram ដែលកំពុងមានអ្នកប្រើប្រាស់ដល់ទៅ ២ ពាន់លាននាក់ឯណោះ ៕

ប្រែសម្រួល៖ វារី

ប្រភព៖ Guinnessworldrecords

ចុចអាន៖ ត្រឹមពេល ៤ ម៉ោង កម្មវិធី Threads មានអ្នកចូលប្រើប្រាស់ដល់ខ្ទង់លាននាក់

ចុចអាន៖ Youtuber ដែលធ្លាប់ជួយជនពិការកម្ពុជា ប៊ិះអស់ជីវិតដោយសារយាន Titan