អ្នកគាំទ្រប្ដឹងប៉ូលិស ព្រោះ Cardi B គប់មីក្រូហ្វូនខុសមនុស្ស

ស្ត្រីម្នាក់ដែលស្ថិតក្នុងហេតុការណ៍តារាចម្រៀងរ៉េប Cardi B ​គប់​មីក្រូហ្វូន​ដាក់អ្នកជះទឹកបានឲ្យដឹងថា តាមពិតអ្នកដែលត្រូវមួយមីក្រូហ្វូនមិនមែនគាត់ឡើយ ។

កាលពីថ្ងៃ ៣០ ខែកក្កដា Cardi បានសម្ដែងនៅក្លឹបកម្សាន្ត Drai ក្នុងទីក្រុង Las Vegas ដោយសារតែអាកាសធាតុក្ដៅនាងបានអនុញ្ញាតឲ្យអ្នកចូលរួមការប្រគំតន្ត្រីជះទឹកដាក់នាង ប៉ុន្តែមាននារីម្នាក់បានជះទាំងទឹកកកទៅទៀតបណ្ដាលឲ្យ Cardi ខឹងយ៉ាងខ្លាំងក៏គប់មីក្រូហ្វូនទៅ ។

មីក្រូហ្វូនបានហោះទៅត្រូវអ្នកគាំទ្រវ័យ ២៦ ឆ្នាំម្នាក់ទាំងដែលនាងមិនមែនជាអ្នកជះទឹកសោះ ទោះយ៉ាងណាក៏ដោយនារីមិនបង្ហាញអត្តសញ្ញាណនោះបានរាយការណ៍ប្រាប់ប៉ូលិសនៅថ្ងៃបន្ទាប់ទៅហើយ ។

ស្ត្រីរងគ្រោះបានប្រាប់ប៉ូលិសនៃទីក្រុង Las Vegas ថា អ្នកជះទឹកជានារីវ័យជាង ២០ ឆ្នាំ និងមានសក់ពណ៌ក្រហមព្រឿងៗ ចំណែកនាងវិញគ្រាន់តែឈរក្បែរប៉ុណ្ណោះបែរជាត្រូវមួយមីក្រូហ្វូនចំស្មាខាងស្ដាំបង្កការឈឺចាប់ជាពន់ពេក ដូច្នេះនាងត្រូវទៅផ្ទះដើម្បីសម្រាកព្យាបាល ។

ខណៈសកម្មភាពទាំងអស់ត្រូវបានថតជាវីដេអូនៅក្នុងទូរស័ព្ទរបស់នាង នាយកដ្ឋានប៉ូលិសទីក្រុង Las Vegas បានប្រាប់ Insider ដូចគ្នាថា ឧប្បត្តិហេតុនេះត្រូវបានចងក្រងជាឯកសារនៅលើរបាយការណ៍ប៉ូលិស ប៉ុន្តែមិនមានការចាប់ខ្លួន ឬដីការកោះហៅទេ” ៕

ប្រែសម្រួល៖ វារី

ប្រភព៖ insider

ចុចអាន៖ ក្រោយមានគេគប់ភេសជ្ជៈកណ្ដាលមុខ Cardi B ក្លាយជាតារារ៉េបប្រើហិង្សាមិនរើសមុខ