ជីវិតកម្សាន្ដ

ពេជ្រ វត្តីសារ៉ាវឌ្ឍី ឆក់យកបេះដូងអ្នកគាំទ្រជាថ្មី ក្នុងឈុតហែលទឹកពណ៌ក្រហមឆ្អិនឆ្អៅ

បានផុស

៣ years មុន

នៅ

ថ្ងៃពុធ ៩ សីហា ២០២៣

ដោយ

វត្តមាន នៃការដើរបង្ហាញក្នុងឈុតហែលទឹក(Swimsuit) ពីសំណាក់បវរកញ្ញាដែលជាម្ចាស់មកុដ MGC 2022 កញ្ញា ពេជ្រ វត្តីសារ៉ាវឌ្ឍី នៅក្នុងកម្មវិធី Miss Grand Cambodia 2023 កាលពីរាត្រីថ្ងៃទី ០៧ខែសីហា បាននិងកំពុងឆក់យកបេះដូងអ្នកគាំទ្រជាថ្មីក្នុងឈុតហែលទឹកពណ៌ក្រហមឆ្អិនឆ្អៅ។

ប្រាកដណាស់បវរកញ្ញា ពេជ្រ វត្តីសារ៉ាវឌ្ឍី មកទល់បច្ចុប្បន្ននាងនៅតែឆក់បានការគាំទ្រ និងរក្សាបាននូវប្រជាប្រិយភាពពីសំណាក់មហាជនទូទៅ។ ចំពោះការរក្សាបានប្រជាប្រិយភាពនេះ ដោយសារភាពរួសរាយ និងអត្តចរិត ខណៈកន្លងមកនាងក៏ជាបុគ្គលដ៏សំខាន់ម្នាក់ដែលបានតំណាងប្រទេសក្នុងការប្រកួតលើឆាកអន្តរជាតិផងដែរ។

ជាក់ស្ដែងតាមរយៈការបង្ហាញខ្លួននៅក្នុងកម្មវិធី Miss Grand Cambodia 2023 កញ្ញា វត្តីសារ៉ាវឌ្ឍី ដែលជាម្ចាស់មកុដកាលពីឆ្នាំ ២០២២ បានសម្ញែងដើរកាច់រាងក្នុងឈុតហែលទឹកពណ៌ក្រហមឆ្អិនឆ្អៅរំលេចដោយរំយោលភ្លឺផ្លេកដើរយ៉ាងជឿជាក់ និងស្វាហាប់ ឆក់យកបេះដូងអ្នកគាំទ្រដោយលាន់ឮសម្រែក នៃការស្រែកហោរស្ទើររង្គើឆាកក្នុងវគ្គ Swimsuit។

ត្រង់ចំណុចនេះបានធ្វើឲ្យអ្នកនិយមតាមដានស្នេហាវិស័យបវរកញ្ញានៅកម្ពុជាមើលឃើញថា ស្រីស្អាត ពេជ្រ វត្តីសារ៉ាវឌ្ឍី នៅតែមានសមត្ថភាពខ្លាំង និងអាចរក្សាបានលំនឹងប្រជាប្រិយភាពមិនឲ្យធ្លាក់ចុះ ឬ ថមថយបានឡើយ។ វត្តីសារ៉ាវឌ្ឍី ក៏ទទួលបានការសរសើរពីមហាជនចំពោះរូបសម្រស់ យ៉ាងស្រឡូនគួរឲ្យស្រលាញ់ទៀតផង។

គួររម្លឹកថា កន្លងមកកញ្ញា ពេជ្រ វត្តីសារ៉ាវឌ្ឍី គឺជាបវរកញ្ញាតំណាងកម្ពុជាក្នុងការចេញទៅប្រកួតលើឆាកអន្តរជាតិនាអំឡុងខែតុលា ចុងឆ្នាំ ២០២២។ យ៉ាងណាមិញទោះបីនាងមិនអាចឆ្លងចូលទៅ Top5 ក្នុងការប្រកួតវគ្គផ្ដាច់ព្រ័ត្រ MGI 2022 នៅឯប្រទេសឥណ្ឌូណេស៊ី ពិតមែន តែបវរកញ្ញារូបនេះ រក្សាបានការគាំទ្រ និងលើកទឹកចិត្តខ្លាំងពីសំណាក់ប្រជាជនកម្ពុជាគ្រប់រូប៕

អត្ថបទ ៖ ចាន់រ៉ា