ឃ្លាតឆ្ងាយសិល្បៈ ៥ ឆ្នាំ ឌីជេ ក្តឹប ចង់ចូលច្រៀងវិញ តែគ្មានលុយធ្វើបទភ្លេង

តារា​ចម្រៀង​រ៉េប​លោក ចាន់ សំណាង ហៅ ឌីជេ ក្តឹប បន្ទាប់ពី​ស្ងប់ស្ងាត់ ឃ្លាតឆ្ងាយ​សិល្បៈ​អស់​រយៈពេល​ប្រមាណ ៥ ឆ្នាំ​កន្លង​មក​នោះ ស្រាប់តែ​ថ្មីៗ​នេះ លោក​បាន​បង្ហាញ​បំណង​ចង់​ចូល​វិស័យ​ចម្រៀង និង​ច្រៀង​វិញ ប៉ុន្តែ​ដោយសារ​ខ្វះ​លទ្ធភាព គ្មាន​លុយ​សម្រួល​បទ​ភ្លេង។

កន្លងមក ឌីជេ ក្តឹប បាន​ឃ្លាតឆ្ងាយ​ពី​វិស័យ​សិល្បៈ​ស្ទើរ​ទាំងស្រុង​តែម្ដង ចំណែក​អ្នកគាំទ្រ​វិញ​នៅតែ​បង្ហាញ​បំណង​ចង់​ឃើញ​លោក​ចេញ​បទ​ចម្រៀង​ស្នាដៃ​ថ្មីៗ ដើម្បី​បម្រើ​អារម្មណ៍​ទស្សនិកជន។

ទោះបី​មួយ​រយៈ​កន្លងទៅ លោក ចាន់ សំណាង ឬ ឌីជេ ក្តឹប មិន​សូវ​មាន​វត្តមាន​លើ​វិថី​សិល្បៈ​ក្ដី តែ​លោក​មិន​បាន​បង្ហាញ​ពី​ការ​បោះបង់​នោះ​ទេ។ ពោល លោក តែង​បង្ហាញ​ពី​ឆន្ទៈ​ស្រលាញ់ និង​ចង់​វិល​ចូល​វិស័យ​មួយ​នេះ។

យ៉ាងណា​រឿង​ដែល​គេ​ចាប់អារម្មណ៍​ទៀត​នោះ ឌីជេ ក្តឹប មាន​បំណង​ចង់​ចូល​ច្រៀង​វិញ តែ​គ្មាន​លុយ​ធ្វើ​បទ​ភ្លេង ជា​ហេតុ​ធ្វើ​ឲ្យ​លោក​ស្ទាក់ស្ទើរ​ក្នុង​រឿង​នេះ។

ឌីជេ ក្តឹប បាន​និយាយ​ពី​បំណង​របស់​ខ្លួន​ថា «ឃ្លាត​ឆ្ងាយ​ពី​សិល្បៈ​ជាង ៥ ឆ្នាំ​ហើយ ឥឡូវ​មាន​អារម្មណ៍​ថា ចង់​ប្រឡូក​នៅ​ក្នុង​វិស័យ​ចម្រៀង និង​ច្រៀង​វិញ​(​តែ​អត់​លុយ​សម្រួល​បទ​ភ្លេង​) វេទនា​ចិត្ត​ណាស់ៗ»។ តាមរយៈ​ការ​បង្ហើប​ពី​គោលបំណង និង​ក្ដី​ស្រមៃ​របស់​តារា​រ៉េប​ឌីជេ ក្តឹប ខាងលើ បាន​ធ្វើ​ឲ្យ​ទស្សនិកជន​សម្ដែង​ការ​គាំទ្រ​ដូចៗ​គ្នា ខណៈ​ខ្លះ​ជូនពរ​ឲ្យ​បំណង​ប្រាថ្នា​របស់ ឌី​ជេ រូប​នេះ សម្រេច​បាន​នា​ពេល​ឆាប់ៗ​ខាងមុខ។

សូម​បញ្ជាក់​ដែរ​ថា ឌីជេ ក្តឹប ក្រៅ​តែ​អាជីព​អ្នក​ចម្រៀង​រ៉េប​ល្បីឈ្មោះ គឺ នា​ពេល​កន្លងមក​លោក​ក៏​មាន​ជំនាញ​ផ្នែក​និពន្ធ​ចម្រៀង​បាន​យ៉ាង​ល្អ និង​ពីរោះ​ផង​ដែរ៕

អត្ថបទ ៖ ចាន់រ៉ា