តួ កុំកុំ ត្រូវមហាជនរិះគន់ពេញបណ្ដាញសង្គម ក្រោយជួលសន្តិសុខហែហមច្រើនពេក

តារាសម្ដែងហុងកុង កុំកុំ (Donnie Yen) ត្រូវមហាជនរិះគន់ពាសពេញអ៊ីនធឺរណិត ក្រោយពេលជួលសន្តិសុខការពារខ្លួន ដើរអមស្កេកស្កះពេញផ្លូវ កំលុងចូលរួមព្រឹត្តិការណ៍គាំទ្រផលិតផលមួយ នៅក្នុងទីក្រុង Shenyang ប្រទេសចិន កាលពីថ្ងៃសៅរ៍ ទី២ ខែកញ្ញា កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំឡុងចូលរួមព្រឹត្តិការណ៍នៅទីក្រុង Shenyang តារាក្បាច់គុន កុំកុំ បានទទួលការរិះគន់ឥតសំចៃពីសាធារណៈជនរាប់ម៉ឺននាក់ បន្ទាប់ពីតារាវ័យ ៥៩ឆ្នាំរូបនេះ បង្ហាញខ្លួនលើដងផ្លូវ ដោយមានសន្តិសុខហែហមប្រមាណ ១០នាក់ បណ្ដាលឱ្យមានភាពរញ៉េរញ៉ៃពេញផ្លូវ ជាពិសេសអាប្បកិរិយារបស់សន្តិសុខបានបង្កឱ្យមានការខឹងសម្បារពីទស្សនិកជន។

ក្នុងពេលបង្ហាញខ្លួនជាសាធារណៈ អ្នកគាំទ្រមួយចំនួនបានទៅចោមរោម និងស្រែកហ៊ោរកញ្ច្រៀវឱ្យតារាប្រុសជើងចាស់របស់ហុងកុង ប៉ុន្តែមនុស្សមួយចំនួនទៀតបានសម្ដែងការទើសទាល់ ក្រោយឃើញសន្តិសុខរុញច្រានអ្នកគាំទ្រដែលចង់ចាប់ដៃ និងថតរូបជាមួយ កុំកុំ។

ជាពិសេសអ្នកទស្សនាតាមបណ្ដាញ Weibo បានរិះគន់ កុំកុំ ថាជាតារាតំឡើងឬក ថែមស៊កសៀតជាសំណួរទៀតថា តើ​ផ្លូវ​ដែលលោកដើរ ​ជា​របស់​គ្រួសារ​លោក​ឬ​យ៉ាងណា ទើបបានជាច្រងេងច្រងាងពេញផ្លូវបែបនេះ? ពួកគេបន្ថែមទៀតថា “បើគ្រាន់តែចេញមុខដើរធម្មតាដោយគ្មានសន្តិសុខមិនបានឬអី? បែបនោះគ្មាននរណាចាប់អារម្មណ៍ដឹងថា តារាដូចជាអ្នកនៅទីនេះទេ។”

ទោះយ៉ាងណា អ្នកលេងអ៊ីនធឺរណិតមួយចំនួន បានចេញមុខការពារ កុំកុំ ដោយនិយាយថា រឿងកើតឡើងដោយសារតែក្រុមសន្តិសុខប៉ុណ្ណោះ ព្រោះក្រុមសន្តិសុខនៅភាគឦសាននៃប្រទេសចិនគឺបែបនេះ នៅពេលដែលពួកគេបានចាត់តាំងឱ្យការពារតារាធំៗ ពួកគេតែងគិតថាខ្លួនគេជាតារាធំដែរ។

ឆ្លើយតបនឹងការរិះគន់ កុំកុំ បានលើកឡើងនៅក្នុងការបង្ហោះ Weibo របស់លោក ដោយធ្វើការសុំទោសទស្សនិកជន និងស្នើកុំបន្ទោសក្រុមសន្តិសុខ ព្រោះកំហុសមកពីលោកនោះទេ។ តាមពិតលោកក៏ពុំបានដឹងថា ព្រឹត្តិការណ៍នេះ ចាំបាច់ចាត់តាំងសន្តិសុខច្រើនយ៉ាងនេះដែរ ហើយលោកសន្យាថា លោកនឹង​ប្រាស្រ័យ​ទាក់ទងល្អ​ជាមួយ​អ្នក​រៀបចំកម្មវីធី ​ដើម្បី​បញ្ចៀស​ស្ថានភាព​ស្រដៀង​គ្នានេះ​នៅពេលក្រោយ៕

ប្រែសម្រួល៖ សន្យា

ចុចអាន៖ តារាតៃវ៉ាន់ Wu Chun ចាយប្រាក់មហាសាល ទិញភូមិគ្រឹះនៅប្រទេសព្រុយណេ

ចុចអាន៖ ចុះសំបុត្រអាពាហ៍ពិពាហ៍ ២០ឆ្នាំ កុំកុំ ទើបដឹកដៃភរិយារៀបការយ៉ាងអភិជន